​ ແຂວງ ​ໄຊ​ຍະ​ບູລີ ຕັ້ງຢູ່​ທິດຕາ​ເວັນ​ຕົກ​ສ່ຽງ​ເໜືອ​ຂອງ ສປປ ລາວ. ທິດຕາ​ເວັນ​ອອກ ຕິດ​ກັບແຂວງ ອຸດົມໄຊ, ແຂວງ ຫຼວງພະບາງ ແລະ ແຂວງ      ວຽງຈັນ; ທິດເໜືອ ຕິດກັບແຂວງ ບໍ່ແກ້ວ; ທິດຕາເວັນຕົກ ແລະ ທິດໃຕ້ຕິດກັບ 6 ແຂວງຣາຊະອານາຈັກໄທ.ຄື: ຊຽງຣາຍ, ພະເຍົາ, ອຸດຕະຣາດິດ,      ພິດສະນຸໂລກ, ນ່ານ ແລະ ເລີຍ.

  ແຂວງ ໄຊຍະບູລີ ມີເນື້ອທີ່ 16.899 ກິໂລຕາແມດ, ມີປະຊາກອນ 353.123 ຄົນ, ຍິງ 175.733 ຄົນ, ມີ 448 ບ້ານ,. 67.080 ຄອບຄົວ (ສະຖິຕິ      2009). ຄວາມໜາແໜ້ນຂອງ ປະຊາກອນ ສະເລ່ຍ 21 ຄົນ ຕໍ່ 1 ກິໂລຕາແມດ.

  ແຂວງ ໄຊຍະບູລີ ແບ່ງອອກເປັນ 11 ເມືອງ ຄື: ເມືອງ ໄຊຍະບູລີ, ເມືອງ ຄອບ, ເມືອງ ຊຽງຮ່ອນ, ເມືອງ ເງິນ, ເມືອງ ຫົງສາ, ເມືອງ ພຽງ, ເມືອງ      ປາກລາຍ, ເມືອງ ແກ່ນ ທ້າວ, ເມືອງ ບໍ່ແຕນ, ເມືອງ ທົ່ງມີໄຊ ແລະ ເມືອງ ໄຊສະຖານ..ທີ່ວ່າການແຂວງ ຄື ເມືອງ ໄຊຍະບູລີ.

  ແຂວງ ໄຊຍະບູລີ ປະກອບ​ດ້ວຍ 8 ຊົນ​ເຜົ່າ ຄື:​ ເຜົ່າລາວ, ເຜົ່າລື້, ເຜົ່າຍວນ, ເຜົ່າໄທ ດຳ, ເຜົ່າກຶມມຸ, ເຜົ່າໄປຼ, ເຜົ່າອິວມຽນ ແລະ ເຜົ່າມົ້ງ.      ປະຊາກອນບາງເຜົ່າ ຍັງປາກເວົ້າ ແລະ ນຸ່ງຖືຕາມປະເພນີຂອງເຜົ່າຕົນ.

  ພື້ນຖານເສດຖະກິດຂອງແຂວງ ໄຊຍະບູລີ ໄດ້ຮັບການຂະຫຍາຍຕົວຢ່າງຕໍ່ເນື່ອງ. ລວມຍອດຜະລິດຕະພັນພາຍໃນ (GDP) ບັນລຸໄດ້ 8,5%,      ສະເລ່ຍລາຍຮັບໃສ່ຫົວຄົນ ໄດ້ 1.057 ໂດລາຕໍ່ຄົນຕໍ່ປີ (ປີ 2010)

  ບຸນປະເພນີທີ່ສຳຄັນ ໄດ້ແກ່ບຸນປີໃໝ່, ບຸນຊວງເຮືອ (ຈັດຂຶ້ນພ້ອມກັບບຸນຊ່ວງເຮືອ ນະຄອນຫຼວງວຽງຈັນ), ເທດສະການບຸນຊ້າງ      (ຈັດຂຶ້ນໃນ      ລະຫວ່າງ ກາງເດືອນກຸມພາ), ບຸນປປີໃໝ່ຂອງເຜົ່າມົ້ງ, ບຸນປົດປີ (ບຸນປີໃໝ່) ຂອງເຜົ່າກຶມມຸ, ບຸນຂຶ້ນເຮືອນໃໝ່.

  ແຂວງ ໄຊຍະບູລີ ເປັນແຂວງທີ່ມີພູດອຍຫຼາຍຊຶ່ງເນື້ອທີ່ຫຼາຍກວ່າ 3/4 ເປັນພູສູງ, ແຕ່ແຂວງ      ຍັງອຸດົມສົມບູນໄປດ້ວຍຊັບພະຍາກອນທຳມະ      ຊາດ ເຊັ່ນ: ປ່າ​ໄມ້ ກວມ 50%. ອາຊີບຕົ້ນຕໍຂອງ​ປະຊາຊົນ ແມ່ນ​ການ​ປູກ​ຝັງ, ລ້ຽງສັດ ​ແລະ      ບໍລິການ​ຄ້າ​ຂາຍ​ຈຳນວນ​ໜຶ່ງ.

  ສຳລັບ​ຜູ້​ທີ່​ຈະ​ເດີນທາງ​ໄປ​ແຂວງ ​ໄຊ​ບະ​ບູລີ ສາມາດ​ໄປ​ດ້ວຍ​ທາງ​ລົດ, ທາງນ້ຳ ແລະ ຍົນ.

 

(ຂໍ້​ມູນ​ຈາກ ນາງ ວຽງ​ໄຊ ຈັນ​ຟອງ, ສະຖານີ​ວິທະຍຸ ​ແລະ ​ໂທລະພາບ​ ​ແຂວງ ​ໄຊ​ຍະ​ບູລີ).

​ໂທ 22411895, ຫ້ອງການ: (074) 211180.

 

 

 

ກັບຫນ້າສາລະບັນ