ຢາບ້າຈຳນວນ 19.800 ກວ່າເມັດຖືກຈູດທຳລາຍຢູ່ແຂວງສະຫວັນນະເຂດ
*(ຂປລ): ທຸກຂະແໜງການອ້ອມຂ້າງແຂວງສະຫວັນນະເຂດ ຮ່ວມກັນຈູດທຳລາຍຢາເສບຕິດປະເພດຢາບ້າຈຳນວນ 19.883 ເມັດ ແລະ ກັນຊາ 24 ກິໂລ ໃນວັນ ທີ 26 ມິຖຸນາ 2008 ຢູ່ສະໜາມກິລາ ກຸວໍລະວົງ ເມືອງໄກສອນພົມວິຫານ.
ຕາມການລາຍງານຂອງ ທ່ານ ພັນໂທ ບຸນລັງ ປິວແກ້ວປະເສີດ ຫົວໜ້າກອງບັນຊາການ ປກສ ແຂວງໃຫ້ຮູ້ວ່າ: ນັບແຕ່ວັນທີ 26 ມິຖຸນາ 2007 ຫາ 26 ມິຖຸນາ 2008, ປກສ ແຂວງ ສາມາດຈັບຄຸມເປົ້າໝາຍທີ່ຄ້າຂາຍຢາເສບຕິດ 33 ລາຍ, ຢຶດຂອງກາງຢາເສບຕິດປະເພດຢາບ້າ 55.534 ເມັດ, ເຮໂຣອິນ 14 ແທ່ງ, ກັນຊາອັດ 1 ແທ່ງ. ໃນນັ້ນສົ່ງໃຫ້ໄອຍະການແຂວງໄດ້ 19 ລາຍ, ຍັງດຳເນີນຄະດີ 14 ລາຍ. ສະເພາະ ສະຖິຕິຂອງຜູ້ເສບຢາບ້າ ມີ 1.791 ຄົນ, ເຂົ້າບຳບັດດັດສ້າງແລ້ວ 82 ຄົນ, ສຶກສາອົບຮົມປ່ອຍຕົວ 38 ຄົນ ແລະ ຍັງຝາກດັດສ້າງ 44 ຄົນ; ສະຖິຕິຜູ້ຄ້າຂາຍຢາເສບຕິດມີ 1.460 ຄົນ, ຈັບໄດ້ແລ້ວ 697 ຄົນ.
ສຳລັບຄະດີກ່ຽວກັບຢາເສບຕິດທີ່ສານຕັດສິນຢ່າງເດັດຂາດແລ້ວ 6 ລາຍ, ມີຂອງກາງຢາເສບຕິດປະເພດຢາບ້າ 8.910 ເມັດ. ຄະດີທີ່ສານຍັງບໍ່ທັນໄດ້ຕັດສິນ(ແກ້ໄຂປ່ອຍຕົວຂັ້ນກອງບັນຊາການ) 31 ລາຍ, ມີຂອງກາງຢາບ້າ 10.361 ເມັດ./.
ກັບສາລະບານ |
