ບານສົ່ງຫາດຊາຍ ພ້ອມເຂົ້າຮ່ວມແຂ່ງຂັນ ໃນອາຊຽນ
* ສະຫະພັນ ບານສົ່ງແຫ່ງຊາດລາວ ວາງແຜນການເຄື່ອນໄຫວໃຫ້ແກ່ນັກກິລາບານສົ່ງ ທັງ ຍິງ-ຊາຍ ໂດຍຈະສົ່ງເຂົ້າຮ່ວມແຂ່ງຂັນ ໃນລະດັບ ອາຊຽນ ເຊິ່ງ ຮອບທຳອິດ ຈະເລີ່ມຢູ່ປະເທດ ໄທ, ມາເລເຊຍ ແລະ ຫວຽດນາມ ເຊິ່ງນັກກິລາລາວ ໄດ້ຮັບການສະຫນັບສະຫນູນຈາກສະມາຄົມບານສົ່ງ ໄທ ໂດຍ ທີມ ບານ ສົ່ງຂອງລາວ ຈະເຂົ້າຮ່ວມການແຂ່ງຂັນລະດັບ ອາຊຽນ ຢູ່ຫນອງຄາຍ ປະເທດ ໄທ ໃນວັນທີ 4-5 ເດືອນ ມີນາ ນີ້ ໂດຍຈະມີນັກກິລາເຂົ້າຮ່ວມທັງຫມົດ 10 ທີມ ແລະ ເດືອນດັ່ງກ່າວ ຖືວ່າຈົບການແຂ່ງຂັນໃນຮອບທຳອິດ, ສ່ວນຮອບທີ 2 ຈະສືບຕໍ່ຈັດການແຂ່ງຂັນໃນເດືອນ ເມສາ ຢູ່ ມາເລເຊຍ ແລະ ຫວຽດນາມ. ທ່ານ ອິນທະພອນ ເຈັງສະຫວ່າງ ຄູຝຶກບານສົ່ງຫາດຊາຍ ໃຫ້ຮູ້ວ່າ: ເຖິງວ່າສະຫະພັນ ບານສົ່ງ ຍັງຂາດເຂີນດ້ານທຶນຮອນເຂົ້າໃນ ການຈັດການແຂ່ງ ຂັນລະ ດັບຊາດກໍຕາມ, ແຕ່ກໍຫວັງວ່າ ອຸປະກອນທີ່ນຳໃຊ້ໃນໄລຍະ ຊີເກມ ຈະເປັນສິ່ງຊ່ວຍໃຫ້ນັກກິລາມີທ່າແຮງໃນການເຂົ້າຮ່ວມແຂ່ງຂັນບານສົ່ງ ອາຊຽນ ທົວນາ ເມັນ ທີ່ຈະມາເຖິງນີ້. ຫລາຍປີຜ່ານມາ, ພະແນກ ກິລາ ນະຄອນຫລວງວຽງຈັນ ໄດ້ຈັດການແຂ່ງບານສົ່ງຫາດຊາຍຂຶ້ນ ໃນໄລຍະບຸນປີໃຫມ່, ແຕ່ກໍຍັງບໍ່ທັນ ກວ້າງ ຂວາງເທົ່າທີ່ຄວນ ຈຶ່ງເຮັດໃຫ້ໄວຫນຸ່ມບໍ່ໄດ້ເຂົ້າຮ່ວມການແຂ່ງຂັນດັ່ງກ່າວຫລາຍ. ຈາກນີ້, ສະຫະພັນ ບານສົ່ງແຫ່ງຊາດ ຈະມີສ່ວນຮ່ວມຫລາຍຂຶ້ນ ໃນ ການເປັນເຈົ້າການຈັດການແຂ່ງຂັນບານສົ່ງຫາດຊາຍ ໃນໄລຍະບຸນປີໃຫມ່ ເພື່ອເຮັດໃຫ້ການແຂ່ງຂັນເປີດກວ້າງຂຶ້ນ ແລະ ຈະເປັນຜົນດີໃຫ້ແກ່ສະຫະພັນ ທີ່ ຈະມີໂອກາດຄັດເລືອກນັກກິລາທີ່ມີຄວາມສາມາດເຂົ້າມາເປັນນັກກິລາທີມຊາດ. ຖ້າຫາກວ່າ ສະຫະພັນ ບໍ່ສາມາດຈັດການແຂ່ງຂັນລະດັບສູງໄດ້ ກໍຍາກທີ່ ຈະ ເຮັດໃຫ້ນັກກິລາໄດ້ພັດທະນາຕົນເອງ ແລະ ສະຫະພັນ ກໍຈະຫຍຸ້ງຍາກໃນການສົ່ງເສີມກິລາປະເພດນີ້ໃຫ້ເປັນທີ່ນິຍົມຫລິ້ນກັນແຜ່ຫລາຍໃນທົ່ວປະເທດ. ໃນມະຫະກຳ ກິລາແຫ່ງຊາດ ຄັ້ງທີ 9 ໃນປີຫນ້ານີ້ຢູ່ ແຂວງຫລວງພະບາງ ຈະບັນຈຸກິລາບານສົ່ງໃນຮົ່ມ ແລະ ຫາດຊາຍເຂົ້າຮ່ວມນຳ, ສ່ວນໃນການແຂ່ງຂັນ ມະຫະກຳ ຊີເກມ ຄັ້ງທີ 26 ຢູ່ ອິນໂດເນເຊຍ ໃນປີ 2011 ນັ້ນ, ທາງສະຫະພັນ ຍັງບໍ່ທັນແນ່ໃຈວ່າ ນັກກິລາບານສົ່ງ ຈະໄດ້ເຂົ້າຮ່ວມແຂ່ງຂັນຫລືບໍ່? ແນວ ໃດກໍດີ, ໃນ ຊີເກມ ຄັ້ງທີ 25 ຜ່ານມາຢູ່ ນະຄອນຫລວງວຽງຈັນ ນັກກິລາບານສົ່ງຫາດຊາຍ ເພດຊາຍ ໄດ້ເຂົ້າພຽງຮອບ 4 ທີມສຸດທ້າຍເທົ່ານັ້ນ./
ກັບສາລະບານ
