ສຳເລັດການແຂ່ງຂັນສຸດຍອດມວຍລາຍລາວ
ໂດຍ: ປ໋ອງປຽນ
ຜ່ານການແຂ່ງຂັນຊົກມວຍລາຍການ ສຸດຍອດມວຍລາຍລາວ (ມວຍຮອບ) ນັບແຕ່ ເດືອນ ຕຸລາ 2012 ເປັນຕົ້ນມາ ບັນດານັກມວຍທັງ 10 ຄົນ ໄດ້ແຂ່ງຂັນແບບໝູນວຽນ ຈົນ ມາ ຮອດວັນທີ 12 ມັງກອນ ທີ່ ເວທີມວຍຊົ່ວຄາວ ໂຮງກາຍະສິນແຫ່ງຊາດ ຈຶ່ງໄດ້ສຳເລັດລົງ ເຊິ່ງແຊ໋ມຕົກເປັນຂອງ ທ້າວ ໄຊວິເດດ ກະຊວງ ປກສ ໄດ້ຮັບສາຍແອວແຊ໋ມ, ເງິນ 10 ລ້ານກີບ ແລະ ຂັນລາງວັນໄປຄອງ
ຄູ່ຊີງຊະນະເລີດ ລະຫວ່າງ ທ້າວ ໄຊວິເດດ ກະຊວງ ປກສ ກັບ ທ້າວ ສິງໂຕທອງ ສິດຊຽນນິຍົມ ປະກົດວ່າ: ທ້າວ ໄຊວິເດດ ກະຊວງ ປກສ ຊົກໄດ້ດີ ແລະ ເຂົ້າເປົ້າຫລາຍກວ່າ ຈຶ່ງ ໄດ້ແຊ໋ມໄປຄອງ ພ້ອມຮັບສາຍແອວແຊ໋ມ, ເງິນ 10 ລ້ານກີບ ແລະ ຂັນລາງວັນ 1 ໜ່ວຍ, ອັນດັບທີ 2 ໄດ້ແກ່ ທ້າວ ສິງໂຕທອງ ສິດຊຽນນິຍົມ ໄດ້ຮັບເງິນສົດ 5 ລ້ານກີບ ພ້ອມຂັນລາງວັນ, ທີ 3 ໄດ້ແກ່ ທ້າວ ສິນໄຊນ້ອຍ ສໍກຸນລະວົງ ໄດ້ຮັບເງິນສົດ 3 ລ້ານກີບ ພ້ອມຂັນລາງວັນ ແລະ ທີ 4 ໄດ້ແກ່ ທ້າວ ຟ້າໃສ ສິດຫົງຄຳ ໄດ້ຮັບເງິນສົດ 2 ລ້ານກີບ ພ້ອມຂັນລາງວັນ
ເປັນກຽດມອບລາງວັນ ໂດຍ ທ່ານ ພັນໂທ ແສນອາໄລ ບົວອາພອນ ຫົວໜ້າກົມກິລາ ກະຊວງ ປກສ, ທ່ານ ຄຳຜອງ ພັນວົງສາ ຮອງປະທານສະມາຄົມວິທະຍາສາດ ແລະ ວິຊະ ວະ ກຳ ແຫ່ງຊາດ
ກັບສາລະບານ
