ຄູຝຶກເປຕັງຄົນເກັ່ງ ນຳພານັກກິລາປະສົບຜົນສຳເລັດໃນກິລາ ມ.ອາຊຽນ
ໂດຍ: ປ໋ອງປຽນ
ຍ້ອນປະສົບການສູງ ແລະ ຖອດທອດຄວາມຮູ້ແບບໝົດເປືອກ ແກ່ນັກກິລາເປຕັງ ບວກໃສ່ນັກກິລາເອງກໍມີຄວາມສາມາດສູງ ຈຶ່ງເຮັດໃຫ້ປະສົບຜົນສຳເລັດຢ່າງຍິ່ງໃຫຍ່ ດ້ວຍການຍາດໄດ້ 6 ຫລຽນຄຳ, 3 ຫລຽນເງິນ ແລະ 2 ຫລຽນທອງ ລວມ 11 ຫລຽນ ໃນມະຫະກຳກິລາ ມະຫາວິທະຍາໄລ ອາຊຽນ ຄັ້ງທີ 16, ພ້ອມນີ້ ຍັງກິລາເປຕັງທີ່ມີຜົນງານເຫລົ່ານີ້ ຈະຖືກຄັດເລືອກເປັນຕົວແທນໃຫ້ແກ່ທີມຊາດລາວ ກຽມເຂົ້າຮ່ວມການແຂ່ງຂັນ ຊີເກມ ຄັ້ງທີ 27 ທີ່ ມຽນມາ ໃນທ້າຍປີ 2013
ທ່ານ ຂັນຕິ ແກ້ວສະຫວັນ ຄູຝຶກນັກກິລາເປຕັງ ໃຫ້ສຳພາດວ່າ: ສຳລັບການຝຶກຊ້ອມຂອງນັກກິລາເປຕັງລາວ ກຽມໃສ່ງານ ມ. ອາຊຽນ ຄັ້ງທີ 16 ປະມານ 5 ເດືອນ, ນັກເປຕັງຂອງລາວ ມີຄວາມສາມາດສູງ ແລະ ເກັ່ງໝົດທຸກຄົນ, ກ່ອນຈະມາແຂ່ງຂັນ ພວກເຮົາໄດ້ຄັດເລືອກມາເປັນພິເສດ ນັກກິລາທຸກຄົນໄດ້ຝຶກຊ້ອມ ແລະ ຢູ່ຮ່ວມກັນຕະຫລອດ ຈຶ່ງເຮັດໃຫ້ນັກກິລາທຸກຄົນຫລິ້ນເຂົ້າກັນໄດ້ດີຕາມມາດຕະຖານທີ່ວາງໄວ້, ໃນໂອກາດນີ້ ຂໍຝາກຄວາມຂອບໃຈນຳພໍ່ແມ່ປະຊາຊົນ ທີ່ເປັນແຮງເຊຍໃຫ້ພວກເຮົາ ຈົນເຮັດໃຫ້ນັກກິລາເປຕັງ ກາຍເປັນປະເພດກິລາທຳອິດ ທີ່ຍາດໄດ້ ຫລຽນຄຳ ໃຫ້ແກ່ລາວ ໃນງານກິລາ ມ.ອາຊຽນ. ນອກຈາກ ໄດ້ເປັນຫົວໜ້າຄູຝຶກນັກກິລາ ເປຕັງ ເຂົ້າຮ່ວມງານ ມ.ອາຊຽນ ຄັ້ງທີ 16 ແລ້ວ, ໄລຍະຜ່ານມາກໍໄດ້ເປັນຄູຝຶກກິລາທີມຊາດ ມາຕະຫລອດ ເປັນຕົ້ນໄດ້ນຳພານັກກິລາໄປແຂ່ງຂັນ ຊີເກມ ຄັ້ງທີ 24 ຢູ່ ໂຄລາດ ໃນປີ 2007 ປະເທດໄທ ຍາດໄດ້ 2 ຫລຽນຄຳ, ຊີເກມ ຄັ້ງທີ 25 ປີ 2009 ທີ່ ສປປ ລາວ ເປັນເຈົ້າພາບ ກໍຍາດໄດ້ 2 ຫລຽນຄຳ ແລະ ຊີເກມ ຄັ້ງທີ 26 ຢູ່ ອິນໂດເນເຊຍ ປີ 2011 ຍາດໄດ້ 2 ຫລຽນຄຳ, ສ່ວນໃນງານ ກິລາ ມ.ອາຊຽນ ພວກເຮົາປະສົບຜົນສຳເລັດຢ່າງໜ້າເພິ່ງພໍໃຈ ເພາະຍາດໄດ້ 6 ຫລຽນຄຳ, 3 ຫລຽນເງິນ ແລະ 2 ຫລຽນທອງ ລວມ 11 ຫລຽນ
ໃນອີກບໍ່ເທົ່າເດືອນ ນັກກິລາເປຕັງທີມຊາດລາວ ກໍຈະເລີ່ມເຂົ້າສູນຝຶກຊ້ອມຢ່າງເປັນລະບົບ ເພື່ອຍົກສູງລະດັບຄວາມສາມາດຂອງຕົນໃຫ້ດີຍິ່ງຂຶ້ນ ກຽມໃສ່ການເຂົ້າຮ່ວມແຂ່ງຂັນ ຊີເກມ ຄັ້ງທີ 27 ໃນທ້າຍປີ 2013 ນີ້ ເຊິ່ງຄວາມຫວັງທີ່ຕັ້ງໄວ້ ຄືຫລຽນຄຳ ຢ່າງໜ້ອຍທີ່ສຸດບໍ່ໃຫ້ຫລຸດ 2 ຫລຽນ
ກັບສາລະບານ
