ຂ່າວພາຍໃນປະເທດ

ທູດລາວເຂົ້າຢ້ຽມຄຳນັບປະທານສະພາສູງຟີລິບປິນ

*(ຂປລ): ທ່ານນາງ ມະໄລວຽງ ສາກົນນິຍົມ, ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ຟີລິບປິນ ໄດ້ເຂົ້າຢ້ຽມຄຳນັບ ທ່ານ Juan Ponce Enril, ປະທານສະພາສູງ ຟິລິບປິນ ໃນວັນທີ 3 ພຶດສະພາ 2011 ຢູ່ສຳນັກງານສະພາສູງ ທີ່ມະນີລາ.

ໃນໂອກາດດັ່ງກ່າວ ທູດລາວໄດ້ນຳເອົາຄວາມເຄົາລົບນັບຖື ແລະ ການຢື້ຢາມຖາມຂ່າວ ອັນອົບອຸ່ນ ຂອງທ່ານ ປະທານສະພາແຫ່ງຊາດລາວ ມາຍັງ ທ່ານປະທານສະພາສູງ Juan Ponce Enril. ພ້ອມກັນນີ້ ກໍໄດ້ ແຈ້ງໃຫ້ຊາບໂດຍລວມ ເຖິງການຮັບເອົາແຜນພັດທະນາເສດຖະກິດ-ສັງຄົມ 5 ປີຄັ້ງທີ VII (2011-2015) ແລະ ຜົນການເລືອກຕັ້ງສະມາຊິກສະພາແຫ່ງຊາດຊຸດທີ VII ຄັ້ງງວັນທີ 30 ເມສາ 2011. ທ່ານ ປະທານສະພາສູງ Juan Ponce Enril ໄດ້ໃຫ້ການໂອ້ລົມ ແລະ ສະແດງຄວາມຍິນດີທີ່ໄດ້ຕ້ອນຮັບທູດລາວ ແລະ ຖືວ່າ ສປປ ລາວ ເປັນເພື່ອນມິດທີ່ສຳຄັນ ສະນັ້ນ ຈຶ່ງຍິນດີທີ່ຈະສືບຕໍ່ໃຫ້ ການຮ່ວມມືເພື່ອສົ່ງເສີມການພົວພັນ ລະຫວ່າງ ສອງ ປະເທດ. ທ່ານ Juan Ponce Enril ໄດ້ໃຫ້ຄວາມສົນໃຈເປັນພິເສດກ່ຽວກັບ ສປປ ລາວ ໃນຫລາຍ ບັນຫາເຊັ່ນ: ເນື້ອທີ່ການຜະລິດ ແລະ ຜະລິດຕະພັນສົ່ງອອກຕົ້ນຕໍຂອງລາວ; ເສັ້ນທາງຄົມມະນາຄົມ ແລະ ເສັ້ນທາງເຊື່ອມຕໍ່ ລະຫວ່າງ ລາວ ແລະ ປະເທດ ອ້ອມຂ້າງ; ລະບົບການເມືອງຂອງລາວ; ການຄຸ້ມຄອງ ແລະ ການສຳປະທານ ທີ່ດິນ; ເນື້ອທີ່ປ່າໄມ້ປົກຫຸ້ມ ແລະ ໄມ້ປະເພດຕ່າງໆ; ດ້ານການຂຸດຄົ້ນບໍ່ແຮ່; ລະບົບການຄຸ້ມຄອງການເກັບພາ ສີ ແລະ ອາກອນລາຍໄດ້; ການປູກຕົ້ນໄມ້ກະສິກຳ ເປັນຕົ້ນແມ່ນຢາງພາລາ ແລະ ຕົ້ນປາມ.

ໃນຕອນທ້າຍ ທ່ານ Juan Ponce Enril ຍັງໃຫ້ການຢືນຢັນວ່າ: ຈະສືບຕໍ່ຮ່ວມມືກັບ ສປປ ລາວ ເພື່ອຮັດແໜ້ນການພົວພັນ ໃຫ້ມີການຂະຫຍາຍຕົວຕະ ຫລອດໄປ ໂດຍສະເພາະ ແມ່ນການພົວພັນດ້ານລັດຖະສະ ພາ./.

 

ກັບສາລະບານ

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446
ເວັບໄຊ ໂທ: 212444, E-mail: webkpl@yahoo.com