ຂ່າວພາຍໃນປະເທດ
 

 

​ ລາວ-ຫວຽດນາມ ເຊັນສັນຍາຮ່ວມມື ດ້ານກະສີກຳ ແລະ ພັດທະນາຊົນນະບົດ

*(ຂປລ): ພິທີເຊັນສັນຍາ ການຮ່ວມມືດ້ານກະສີກຳ ແລະ ພັດທະນາຊົນນະບົດ ແລະ ການ ຮ່ວມມື ດ້ານ ການປູກຢາງພາລາ ລະຫວ່າງ ກະຊວງກະສີກຳ ແລະ ປ່າໄມ້ ສປປ ລາວ ແລະ ກະຊວງກະສີກຳ ແລະ ພັດທະ ນາຊົນນະບົດສສ ຫວຽດນາມ ໄດ້ຈັດຂຶ້ນທີ່ແຂວງຈຳປາສັກ ໃນວັນທີ 24/7/2009 ຢູ່ທີ່ໂຮງແຮມ ແກຣນ ຈຳປາສັກ, ຝ່າຍລາວນຳໂດຍທ່ານ ສີຕາເຮັ່ງ ຣາຊະພົນ, ລັດຖະມົນຕີວ່າການ ກະຊວງ ກະສີກຳ ແລະ ປ່າໄມ້ແຫ່ງ ສປປ. ລາວ, ພ້ອມດ້ວຍຄະນະນຳຂັ້ນ ສູງຈາກ ກະຊວງ ແລະ ທ່ານ ກາວດຶກຟາດ, ລັດຖະມົນຕີ ວ່າ ການກະ ຊວງກະສີກຳ ແລະ ພັດທະນາ ຊົນນະບົດ ແຫ່ງ ສ.ສ ຫວຽດນາມ ພ້ອມດ້ວຍຜູ້ຕາງໜ້າ ກົງ ສູນໃຫຍ່ ແຫ່ງ ສສ. ຫວຽດນາມ ປະຈຳ ແຂວງຈຳປາສັກ. ການເຊັນສັນຍາດັ່ງກ່າວນີ້ ເປັນການປະຕິບັດເນື້ອໃນຕາມສັນຍາ ຂອງ ທັງສອງລັດຖະບານ ສປປ ລາວ ແລະ ສສ ຫວຽດນາມ ທີ່ໄດ້ເຊັນກັນໃນເດືອນ 1/2009 ທີ່ນະຄອນໂຮ່ຈີ່ມິນ.
ກ່ອນການເຊັນຍາດັ່ງກ່າວ ທັງສອງຝ່າຍໄດ້ເຂົ້າຮ່ວມກອງປະຊຸມພົບປະປະຈຳປີ ເພື່ອປຶກ ສາ ຫາ ລື ວຽກງານການຮ່ວມມືດ້ານ ກະສີກຳ-ປ່າໄມ້ ແລະ ພັດທະນາ ຊົນນະບົດ ບົນ ຈິດ ໃຈ ອ້າຍນ້ອງຊ່ວຍເຫຼືອເຊິ່ງກັນ ແລະ ກັນໂດຍໄດ້ມີການຕົກລົງຮ່ວມມືໃນຫຼາຍ ດ້ານ ເຊັ່ນ: ດ້ານກະສີກຳ, ລ້ຽງສັດ, ຊົນລະປະ ທານ, ຄົ້ນ ຄວ້າວິທະຍາສາດ ແລະ ພັດທະນາ ບຸກ ຄະລາກອນ ແລະ ພັດທະນາຊົນນະບົດ ລະຫວ່າງ ສອງກະຊວງ ແລະ ສອງລັດຖະບານ ລາວ-ຫວຽດນາມ ໂດຍສະເພາະ ການຮ່ວມມື ດ້ານການປູກ ຢາງພາລາ.
ຜ່ານກອງປະຊຸມພົບປະ ປະຈຳປີຄັ້ງນີ້, ທ່ານລັດຖະມົນຕີວ່າການກະຊວງ ກະສິກຳ-ປ່າໄມ້ ສີຕາເຮັ່ງ ຣາຊະພົນ ໃຫ້ຮູ້ວ່າ: ປະຈຸບັນການລົງທຶນຂອງ ນັກທຸລະ ກິດຫວຽດນາມດ້ານກະສີກຳ ແລະ ປ່າໄມ້ຢູ່ໃນ ສປປ. ລາວ ລວມທັງໝົດມີ 39 ໂຄງການ, ມີມູນຄ່າ 259 ລ້ານກວ່າໂດລາ, ມີທຶນຈົດທະບຽນທັງໝົດ 107 ກວ່າ ລ້ານໂດລາ, ໃນນັ້ນ 30 ໂຄງການພວມຈັດຕັ້ງປະຕິບັດ ແລະ ອີກ 9 ໂຄງການຍັງຢູ່ໃນ ຂັ້ນຕອນສະເໜີ ເພື່ອຂໍອະ ນຸມັດ. ທ່ານ ໄດ້ຕີລາຄາວ່າ: ການຮ່ວມມື ດັ່ງກ່າວ ໄດ້ຂະຫຍາຍຕົວຢ່າງແຂງແຮງ ໃນໄລຍະ 5 ປີຜ່ານມາ ແລະ ຈະເພີ່ມທະວີຂະຫຍາຍຕົວດີຂຶ້ນຕື່ມອີກໃນອະນາຄົດ.
ສຳລັບ ການຈັດຕັ້ງປະຕິບັດໂຄງການຮ່ວມມື ລະຫວ່າງສອງກະຊວງ ໃນໄລຍະຜ່ານມາ ແລະ ທິດ ທາງການຮ່ວມມືກັນໃນຕໍ່ໜ້າ ໃນການນຳສະເໜີ ແລະ ການ ສັງເກດຕີລາຄາຂອງ ທ່ານລັດຖະມົນຕີກະຊວງ ກະສີກຳ ແລະ ພັດທະນາຊົນນະບົດ ສສ. ຫວຽດນາມ ໃຫ້ເຫັນວ່າ: ພວມຈັດຕັ້ງປະຕິບັດ 3 ໂຄງການ ໃນການ ຮ່ວມມືຂອງສອງລັດຖະບານ, 3 ຫົວຂໍ້ ໃນຂອບການຮ່ວມມືຂອງສອງກະຊວງ ແມ່ນສະເໜີອະນຸມັດ ສືບຕໍ່ຈັດ ຕັ້ງປະຕິບັດ 3 ໂຄງການ ແລະ ສະເໜີໃໝ່ 6 ໂຄງການ ໃນຂອບການຮ່ວມມືຂອງສອງລັດຖະບານ ແລະ 8 ຂໍ້ ໃນການຮ່ວມຂອງ 2 ກະຊວງຕາມທີ່ໄດ້ສະເໜີ. ສຳລັບປີນີ້ຖືວ່າມີລັກສະນະພິເສດກວ່າເກົ່າ ຊຶ່ງ ຈະໄດ້ພິຈາ ລະນາ ເຊັນສັນຍາຮ່ວມມືລົງທຶນສົ່ງເສີມການຜະລິດສິນຄ້າກະສີກຳ ແລະ ປ່າໄມ້ ໂດຍສະເພາະແມ່ນການຄຸ້ມ ຄອງການລົງທຶນໃສ່ໂຄງ ການປູກ ຢາງພາລາໃຫ້ມີປະສິດທິຜົນກວ່າເກົ່າ ໂດຍຮັບຮູ້ ແລະ ປະຕິບັດຄວາມ ຈຳເປັນການເສີມ ຂະຫຍາຍໝາກຜົນຂອງສັນຍາ ກ່ຽວກັບການຮ່ວມມືດ້ານເສດຖະກິດ, ວັດທະນະທຳ, ວິທະ ຍາສາດເຕັກນິກ ລະຫວ່າງ ລັດຖະບານ ສປປ ລາວ ແລະ ລັດຖະບານ ສສ. ຫວຽດນາມໃນໄລຍະປີ 2006-2010 ທີ່ໄດ້ເຊັນກັນເມື່ອວັນທີ 4/1/2006 ແລ້ວນັ້ນ ແລະ ໃນປີນີ້ ທັງສອງຝ່າຍໄດ້ເຫັນດີເປັນເອກະພາບໃນ 9 ມາດຕາຂອງສັນຍາທີ່ໄດ້ເຊັນກັນ ໃນວັນທີ 24/7/2009 ທີ່ແຂວງຈຳປາສັກ ຄັ້ງນີ້ຄື: ສ້າງເງື່ອນໄຂ ແລະ ຄວາມ ສະດວກ ເພື່ອດຶງດູດການລົງທຶນ ຂອງບັນດາພາກສ່ວນເສດຖະກິດທີ່ເຂົ້າມາລົງທຶນຢູ່ລາວ ໂດຍສະເພາະ ແມ່ນການຜະລິດ ແລະ ປຸງແຕ່ງຜະລິດຕະພັນກະສີກຳ ແລະ ປ່າໄມ້, ການປູກໄມ້ອຸດສະຫະກຳ ຊຶ່ງລວມໄປເຖິງ ການປູກໄມ້ຢາງພາລາຢູ່ພາກຕ່າງໆ, ການແກ້ໄຂບັນຫາ ຂໍ້ຂັດ ແຍ້ງທີ່ເກີດຂຶ້ນ ລະຫວ່າງ ບໍລິສັດທີ່ລົງທຶນຈະ ໄດ້ຖືກແກ້ໄຂໂດຍການປຶກສາຫາລືຮ່ວມກັນ ບົນພື້ນຖານຄວາມສາມັກຄີແບບພິເສດ ສັນຍາສະບັບນີ້ ແມ່ນມີ ຜົນສັກສິດ ແລະ ນຳໃຊ້ໃນໄລຍະເວລາ 5 ປີນັບແຕ່ມື້ລົງລາຍເຊັນເປັນຕົ້ນໄປ./.

ກັບສາລະບານ

 
ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446