ເລີ່ມກໍ່ສ້າງຫໍຫລັກເມືອງວຽງຈັນ ມໍລະດົກຂອງຊາດ
*(ຂປລ): ກະຊວງຖະແຫລງຂ່າວ ແລະ ວັດທະນະທຳ ຮ່ວມກັບຄະນະກຳມະການຮັບຜິດຊອບໂຄງ ການກໍ່ສ້າງຫໍຫລັກເມືອງວຽງຈັນ ໄດ້ຈັດພິທີວາງສີລາ ລືກ ໂຄງການກໍ່ສ້າງຫໍຫລັກເມືອງວຽງຈັນ ໃນວັນທີ 24 ກຸມພາ 2010 ຢູ່ທີ່ບ້ານເພຍວັດ, ເມືອງສີສັດຕະນາກ, ນະຄອນຫລວງວຽງຈັນ ໂດຍໃຫ້ກຽດເຂົ້າ ຮ່ວມຂອງ ທ່ານ ຈູມມາລີ ໄຊຍະສອນ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ, ທ່ານ ບົວສອນ ບຸບຜາວັນ, ນາຍົກລັດຖະມົນ ຕີ, ທ່ານ ຫມູນແກ້ວ, ອໍລະບູນ, ລັດຖະມົນຕີ ວ່າ ການຖະຊວງ ຖະແຫລງຂ່າວ ແລະ ວັດທະນະທຳ, ປະທານຄະນະກຳມະການຮັບຜິດຊອບ ໂຄງການກໍ່ສ້າງ ຫໍ ຫລັກເມືອງ ວຽງຈັນ, ມີບັນດາລັດຖະມົນຕີວ່າການ, ຊ່ວຍວ່າການ, ຫົວໜ້າ ກົມ, ຮອງກົມ, ເຈົ້າເມືອງທັງ 9 ຕົວເມືອງ ໃນ ນະຄອນຫລວງວຽງຈັນ ແລະ ພະ ນັກງານຂະແໜງການຕ່າງ ພ້ອມດ້ວຍມວນຊົນຊາວ ນະຄອນ ຫລວງວຽງ ຈັນ. ທ່ານ ຈູມມາລີ ໄຊຍະສອນ ໄດ້ກ່າວວ່າ: ໂຄງການກໍ່ສ້າງຫໍຫລັກເມືອງວຽງຈັນ ແມ່ນສັນຍະລັກແຫ່ງຄວາມສາມັກຄີ ເປັນອັນໜຶ່ງອັນດຽວຂອງ ຊົນຊາດ ລາວ ເຮົາ ໃນຍຸກສະໄໝກ່ອນ ທັງເປັນການຢັ້ງ ຢືນເຖິງຄວາມເຂັ້ມແຂງ, ຄວາມອົງ ອາດກ້າຫານໃນການຕໍ່ສູ້ ປົກປັກຮັກສາບ້ານເມືອງແລະຄວາມຮຸ່ງ ເຮືອງເຫຼືອງ ເຫຼື້ອມ ຂອງນະຄອນຫລວງວຽງຈັນ ສະໄໝອານາຈັກລ້ານຊ້າງ. ຫໍຫລັກເມືອງ ທີ່ຈະສ້າງນີ້ ແມ່ນຫລັກຖານປະຫວັດສາດອັນສຳຄັນຂອງຊາດເຮົາ ຊຶ່ງຈະ ກາຍ ເປັນສັນ ຍະລັກ ຂອງນະຄອນຫລວງວຽງຈັນໃນຍຸກໃໝ່, ຍຸກສະໄໝແຫ່ງຄວາມຈະເລີນສີວິໄລ ແລະ ທັນສະໄໝ ຢູ່ພາຍໃຕ້ແສງສະຫ່ວາງການນຳພາທີ່ສະ ຫລາດສ່ອງ ໃສຂອງພັກ ປະຊາຊົນ ປະຕິວັດລາວ. ພ້ອມນີ້ ທ່ານຍັງຮຽກຮ້ອງມາຍັງທຸກພາກສ່ວນສັງຄົມ ຈົ່ງໄດ້ໃຫ້ການຮ່ວມມື ແລະ ຮ່ວມແຮງ, ຮ່ວມຈິດຮ່ວມໃຈ ປະກອບ ສ່ວນກໍ່ສ້າງຫໍຫລັກເມືອງແຫ່ງນີ້ ໃຫ້ເປັນມໍລະດົກຂອງຊາດບ້ານເມືອງສືບຕໍ່ໄປ ໃນພາຍພາກໜ້າ. ໂຄງການກໍສ້າງຫໍຫລັກເມືອງວຽງຈັນດັ່ງກ່າວ ໄດ້ເກີດຂຶ້ນພາຍຫຼັງທີ່ໄດ້ມີການຄົ້ນພົບ ເສົາຫລັກ ເມືອງວັດຖຸບູຮານ ທີ່ເຮັດດ້ວຍຫີນຈຳນວນ 193 ຫລັກ, ໃນຄັ້ງ ວັນທີ 16 ມັງກອນ 2007, ໄລຍະຕໍ່ມາ ໃນວັນທີ 29 ທັນວາ 2009 ໃນຂະນະທີ່ມີການຂຸດສຳຫລວດ ເພື່ອກຽມພື້ນທີ່ໃຫ້ແກ່ການກໍ່ສ້າງຫໍຫລັກເມືອງວຽງຈັນ, ນັກ ບູຮານວິທະຍາ, ກົມມໍລະດົກກະຊວງຖະແຫລງຂ່າວ ແລະ ວັດທະນະທຳ ກໍໄດ້ພົບເຫັນເສົາຫລັກເມືອງອີກຈຳນວນ 225 ຫລັກ ແລະ ຄັ້ງທີ 3 ໃນວັນທີ 7 ມັງ ກອນ 2010 ຈຳນວນ 55 ຫລັກ, ລວມທັງໝົດ 473 ຫລັກ. ການກໍ່ສ້າງຫໍດັ່ງກ່າວ ແມ່ນເພື່ອເປັນສະຖານທີ່ເຕົ້າໂຮມ ແລະ ຈັດວາງສະແດງ ເສົາຫລັກເມືອງ ວຽງ ຈັນບູ ຮານທັງໝົດທີ່ໄດ້ຂຸດພົບ, ນອກຈາກຫໍຫລັກເມືອງແລ້ວ ຍັງປະກອບມີຫໍວາງສະແດງສອງຊັ້ນ ທີ່ຈະປຸກສ້າງຂຶ້ນໃນບໍລິເວນດຽວກັນ ຊຶ່ງຈະໃຊ້ສຳລັບ ຈັດ ວາງສະແດງວັດຖຸບູຮານຕ່າງໆ ທີ່ຢັ້ງຢືນເຖິງປະຫວັດສາດຂອງນະຄອນຫລວງວຽງຈັນ ໃນຍຸກສະໄໝອານາຈັກລ້ານຊ້າງ ທັງຈະກາຍເປັນສະຖານທີ່ທາງ ດ້ານ ວັດທະນະທຳ ແລະ ທ່ອງທ່ຽວແຫ່ງໃໝ່ ໃນນະຄອນຫລວງວຽງຈັນ, ລວມມູນຄ່າການກໍ່ສ້າງທັງໝົດປະມານ 15 ຕື້ກວ່າກີບ, ຄາດວ່າຈະສຳເລັດສົມບູນໃນທ້າຍປີ 2011 ນີ້ ໂດຍແມ່ນບໍລິສັດເພັດຕະພາບກໍ່ສ້າງເຄຫາ ແລະ ຂົວທາງຈຳກັດ ເປັນຜູ້ຮັບເໝົາ./.
ກັບສາລະບານ
