ຂ່າວພາຍໃນປະເທດ

ທ່ານ ຈູມມາລີ ໄຊຍະສອນ, ປະທານປະເທດ ແຫ່ງ ສປປ.ລາວ
ຕອບສຳພາດສະຖານີວິທະຍຸສາກົນແຫ່ງສປຈີນ ພາກພາສາລາວ (CRI)

ຂປລ.ໃນໄລຍະການຢ້ຽມຢາມ ສປ.ຈີນ ທ່ານ ຈູມມາລີ ໄຊຍະສອນ ເລຂາທິການໃຫຍ່ ປະທານປະເທດ ແຫ່ງ ສປປ.ລາວ ໄດ້ຕອບສຳພາດ ສະຖາ ນີວິທະຍຸສາກົນ ແຫ່ງປະເທດຈີນ ໃນວັນທີ 29 ກັນຍາ 2013 ທີ່ນະຄອນຄຸນມິງ ແຂວງຢຸນນານ ສປ.ຈີນ ກ່ຽວກັບການພັດທະນາ ສ້າງສາປະເທດ ຊາດ ແລະ ການພົວພັນຮ່ວມມື ສປປ.ລາວ ກັບ ສປ.ຈີນ ແລະ ບັນຫາຕ່າງໆ.

ກ່ອນ​ອື່ນ​, ທ່ານ ຈູມມາລີ ໄຊຍະສອນ ກໍສະ​ແດງ​ຄວາມ​ຂອບ​​ໃຈ​ຕໍ່​ວິທະຍຸ​ສາກົນ​​ ແຫ່ງ​ ປະ​ເທດຈີນ (CRI) ທິ່​ໄດ້​ໃຫ້​ຄວາມ​ສົນ​ໃຈຕໍ່ສະພາບ​ການ​ປົກ​ ຄອງ​ຂອງ ສ​ປ​ປ. ​ລາວ, ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ ​ກໍ​ຄືການ​ພົວພັນ​ ລາ​ວ-ຈີນ ​ໃນ​ໂອກາດ​ຢ້ຽມຢາມ​ສັນຖະວະ​ໄມ​ຕີ ສປ.ຈີນ ຢ່າງ​ເປັນ​ທາງ​ ການ​​ຂອງຂ້າ​ພະ​ເຈົ້າໃນ​ຄັ້ງ​ນີ້.​

ການ​ຢ້ຽມຢາມສັນຖະວະໄມຕີ ສປ ຈີນ ຢ່າງເປັນທາງການຂອງ​ຂ້າພ​​ະ​ເຈົ້າຄັ້ງ​ນີ້ ​ເປັນການ​ສືບ​ຕໍ່​ມູນ​ເຊື້ອອັນ​ດີງາມໃນ​ການ​ແລກປ່ຽນການ​ຢ້ຽມຢາມ​ເຊິ່ງກັນ ແລະ ​ກັນ ລະຫວ່າງ ການ​ນຳ​ຂັ້ນ​ສູງຂອງສອງ ພັກ, ສອງລັດ ລາວ-ຈີນ ​ເພື່ອປະກອບສ່ວນ​ເຂົ້າ​ໃນການ​ເສີມ​ຂະຫຍ​າຍ​ແລະ ຮັດ​ແໜ້ນ​ສາຍ​ພົວພັນ ​ມິດຕະພາບຖານ​ສະ​ຫາຍ ​ແລະ ຊຸກຍູ້​ການ​ຮ່ວມ​ມື​ຮອບດ້ານ​ລະຫວ່າງສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດ ລາວ-ຈີນ ​ໃຫ້​ຈະ​ເລີ​ນງອກ​ງາມ ​ແລະ ມີ​ປະສິດທິ​ຜົນ​ຍິ່ງໆ​ຂຶ້ນ.

ຄືດັ່ງບັນດາສະຫາຍໄດ້ຮູ້ແລ້ວ,ກອງ​ປະຊຸມ​ໃຫຍ່​ຂອງ​ພັກ​ປະຊາຊົນ​ປະຕິວັດ​ລາວ ຄັ້ງ​ທີ 9 ​ໄດ້ໄຂ​ຂຶ້ນ ໃນ​ເດືອນ​ມີນາ 2011 ທີ່ຜ່ານມາ, ມາ​ເຖິງ​ປະຈຸ​ ບັນ​ກໍເປັນ​ເວລາ 2 ປີ​ກວ່າ​​ແລ້ວ. ​ໃນ​ກາງ​ປີ 2013 ຜ່ານ​ມາ​, ພວ​ກ​ຂ້າພະ​ເຈົ້າ​ໄດ້​ຈັດກອງ​ປະຊຸ​ມຄົບ​ຄະນະ​ຄັ້ງ​ທີ 6 ສະ​ໄໝ​ທີ 9 ຂອງ​ຄະນະບໍລິຫານ ​ງານ​ສູ​ນກາງ​ພັກ ​​ໂດຍ​ໄດ້ຕີ​ລາຄາ​ການ​ຊີ້ນຳ​ນຳພາ​ຂອງ​ສູນ​ກາງ​ພັກ ຕໍ່​ສະພາບ​ການຈັດ​ຕັ້ງ​ປະຕິບັດ​ມະຕິກ​ອງປະ​ຊຸມ​ໃຫຍ່ຄັ້ງ​ທີ 9 ຂອງ​ພັກ, ​ແຜນ​ພັດ ທະນາ​ເສດຖະກິດ-ສັງຄົມ​ແຫ່ງ​ຊາດ 5 ປີ ຄັ້ງ​ທີ 7 ​ເຄິ່ງສະ​ໄໝ (2011-2013) ເຊິ່ງໂດ​ຍທົ່ວ​ໄປ​ແລ້ວຕະຫລອດ​ໄລຍະ 2 ປີ​​ເຄິ່ງຜ່ານ​ມາ,​ ສປປ.ລາວ​ ສືບ​ຕໍ່​ມີ​ສະຖຽນ​ລະ​ພາບທາງດ້ານການເມືອງຢ່າງຫນັກແຫນ້ນ, ສັງຄົມຍັງມີຄວາມສະຫງົບປອດ​ໄພ, ມີ​ຄວາມເປັນລະບຽບຮຽບຮ້ອຍ,​ ເສດຖະກິດ​ມີ​ຄວາມ​ ຫມັ້ນທ່ຽງໂດຍພື້ນຖານ, ມີ​ການ​ຂະຫຍາຍຕົວດ້ວຍອັດຕາ​ການ​ເຕີບ​ໂຕ​​ເພີ່ມ​ຂື້ນ​ 8,2% ຕໍ່ປີ, ລວມຍອດ​ມູນ​ຄ່າ GDP ​ສະ​ເລ່ຍຕໍ່​ຫົວ​ຄົນ ໃນ​ປີ 2012-2013 ​ໄດ້​ເພີ່ມ​ຂື້ນ​ເຖິງ 1.500 ​ໂດ​ລາ. ພວກ​ຂ້າ​ພະ​ເຈົ້າ ຖື​ວ່າ​ແມ່ນ​ຜົນ​ສຳ​ເລັດ​ທີ່​ຕັ້ງ​ໜ້າຂອງ ສ​ປ​ປ. ລາວ ເຊິ່ງ​ກໍ​ໄດ້​ມີ​ການ​ຖອດ​ຖອນ​ບົດ​ຮຽນ​ໃນ​ພາກ​ປະ​ຕິ​ບັດ ​ຕົວ​ຈິງ.

ໃນປະຈຸ​ບັນພວກ​ຂ້າພະ​ເຈົ້າ​​ໄດ້​ເອົາ​ໃຈ​​ໃສ່ໃນການ​ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ​ ​ໂດຍຕິດ​ພັນ​ກັບການ​ປະຕິບັດມະຕິ​ຂອງ​ກົມ​ການ​ເມືອງ​ສູນ​ກາງ​ພັກ​ ກ່ຽວ​ກັບວຽກ​ງານ 3 ສ້າງ: ສ້າງ​ແຂວງ​ໃຫ້​ເປັນ​ຫົວໜ່ວຍ​ຍຸດ​ທະ​ສາດ, ສ້າ​ງ​ເມືອງ​ໃຫ້​ເປັນ​ຫົວໜ່ວຍ​ເຂັ້ມ​ແຂງ​ຮອບດ້ານ, ສ້າງ​ບ້ານ​ໃຫ້​ເປັນ​ຫົວໜ່ວຍ​ ພັດທະນາໂດຍ​ມີ​ການ​ເຮັດ​ທົດ​ລອງ​ຢູ່ 51​ ເມືອງ, 109 ບ້ານເປົ້າຫມາຍເພື່ອແກ້ໄຂຄວາມທຸກຍາກຂອງ ປະຊາຊົນ, ສູ້​ຊົນ​ບັນລຸ​ເປົ້າ​ໝາຍ​​ເຮັດໃຫ້​ ຄອບຄົວ​ທຸກ​ຍາກ​ທົ່ວ​ປະ​ເທດ​ຍັງ​ເຫລືອ​ບໍ່​ເກີນ 10% ​ໃນ​ປີ 2015.

ດ້ານ​ການ​​ເຄື່ອນ​ໄຫວຕ່າງປະ​ເທດ​ກໍໄດ້​ຮັບ​ການ​ເປີດ​ກວ້າງ, ​ເຫດການ​ເດັ່ນ​ແມ່ນ ການ​ເປັນ​ເຈົ້າພາບ​ກອງ​ປະຊຸມ​ອ​າ​ເຊັບ-7 ​ແລະ ອາ​ເຊັມ-9​ ​ໃນ​ປີ 2012 ຜ່ານ​ມາ.  ສປປ.ລາວ ໄດ້​ສືບ​ຕໍ່​ການພົວພັນ​ທີ່​ເປັນ​ມູນ​ເຊື້ອກັບ​ບັນດາ​ປະ​ເທດເພື່ອນ​ມິດ​ຍຸດ​ທະ​ສາດ​ຢ່າງ​ໜັກ​ແໜ້ນ ​ແລະ ​ເຂົ້າ​ສູ່​ລວງ​ເລິກ, ຕັ້ງໜ້າ ເຄື່ອນ​ໄຫວ​ໃນ​ຂອບ​ອາຊຽນ, ສອງ​ຝ່າຍ ​ແລະ ຫລາຍ​ຝ່າ​ຍ, ພິ​ເສດ ສປປ.ລາວ ​ໄດ້​ຖືກ​ຮັບ​ເຂົ້າ​ເປັນ​ສະມາຊິກ​ສົມບູນ ຂອງ​ອົງການ​ການ​ຄ້າ​ໂລກ ​ໃນ​ປີ 2012. ທັງ​ໝົດ​ໄດ້​ສືບ​ຕໍ່​​ເຊີດ​ຊູ​ ແລະ ​ເສີມ​ຂະຫຍາຍ​ບົດບາດ​ຂອງຕົນ​ໃນ​ເວທີ​ພາກ​ພື້ນ​ ແລະ ສາກົນ, ປະກອບສ່ວນ​ອັນ​ສຳຄັນ​ເຂົ້າ​ໃນ​ການ​ຍາດ ​ແຍ່ງການ​ຮ່ວມ​ມື ​ແລະ ​ເປີດ​ກວ້າງ​ເສ​ດຖະກິດ​ກັບ​ຕ່າງປະ​ເທດ. ປະຈຸ​ບັນ, ພວກ​ຂ້າພະ​ເຈົ້າ​ພວມຕັ້ງໜ້າ​ດຳ​ເນີນ​ການ​ກະກຽມ​ດ້ານ​ຕ່າງໆ​ ເພື່ອ​ກ້າວ​ເຂົ້າ​ສູ່​ ປະຊາ​ຄົມ ​​ເສດຖະກິດ​ອາ​ຊຽນ​ໃນ​ປີ 2015.

ການ​ຢ້ຽມຢາມສປຈີນເທື່ອ​ນີ້, ກໍ​ໄດ້​ພົບປະເຈລະຈາກັບ​ສະຫາຍ ສີ ຈີນຜິ​ງ, ​ເລຂາທິການ​ໃຫຍ່​ສູນ​ກາງ​ພັກ​ກອມ​ມູນິດ​ຈີນ, ປະທານ​ປະ​ເທດ​ຈີນຜູ້ໃໝ່​, ລົງ ​ນາມ​ໃນ​ແຜນ​ປະຕິບັດ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ລະຫວ່າງ​ ລາວ-ຈີນ ​ໃຫ້​ຫັນ​ເປັນອັນ​ລະອຽດ. ລາວ ​ແລະ ຈີນ ໄດ້​ສ້າງຕັ້ງສາຍ​ພົວ ພັນ​ການ​ທູດ​ນຳ​ກັນ​ໃນ​ວັນ​ທີ 25 ເມສາ 1961, ນັບ​ແຕ່​ນັ້ນ​ເປັນຕົ້ນ​ມາ, ​ການ​ພົວພັນ​ຮ່ວມ​ມື​ສອງ​ຝ່າຍ​ໄດ້​ຮັບ​ການຖະນຸຖະໜອມ​ບຳລຸງ​ກໍ່ສ້າງ ​ແລະ ຂະ ຫຍາຍຕົວຢ່າງ​ບໍ່​ຍຸດ​ຢັ້ງ ແລະ ມີ​ໝາກຜົນ​ຕົວ​ຈິງ. ພັກ, ລັດຖະບານ ແລະ ປະຊາຊົນຂອງສອງປະເທດ ມີຄວາມຜູກພັນ, ສະຫນິດສະໜົມ, ໄວ້ເນື້ອ​ເຊື້ອ​ໃຈ​ຊຶ່ງ​ກັນ ແລະ ກັນ ​ຫລາຍ​ຂື້ນ. ປີ 2009 ຜູ້​ນຳ​ສອງ​ປະ​ເທດ​ຈຶ່ງໄດ້​ຕົກລົງ​ຍົກ​ລະດັບ​ການ​ພົວພັນ​ລາວ-ຈີນ ຂື້ນ​ເປັນ​ການ​ພົວພັນ​ແບບ “ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ”, ອັນ​ນີ້, ​ໄດ້​ກາຍ​ເປັນ​ພື້ນຖານ​ອັນ​ໃໝ່ ແລະ ໜັກ​ແໜ້ນ​ສຳລັບ​ການ​ຂະຫຍາຍ​ສາຍ​ພົວພັນ​ ລະຫວ່າງ ລາວ-ຈີນ ໃນ​ໄລຍະ​​ໃໝ່ ເພື່ອ​ໃຫ້​ສອງ​ປະ​ເທດ​ກາຍ​ເປັນ​ຄູ່ຮ່ວມ​ມື “ 4 ດີ” ຄື: ບ້ານ​ໃກ້​ເຮືອນ​ຄຽງ​ທີ່​ດີ, ​ເພື່ອນ​ມິດ​ທີ່​ດີ, ສະຫາຍ​ທີ່​ດີ ແລະ ຄູ່​ຮ່ວມ​ມື​ທີ່​ດີ ຢ່າງ​ແທ້​ຈິງ.

ຫລັງ​ຈາກ​ນັ້ນ, ສອງ​ຝ່າຍ​ໄດ້​ສືບຕໍ່ປຶກສາ​ຫາລື​ແບບ​ສັນຖະວະ​ໄມຕີ ແລະ ​ເຮັດ​ວຽກ​ຮ່ວມ​ກັນຢ່າງໃກ້ຊິດເພື່ອ​ຄົ້ນຄວ້າ, ລົງ​ເລິກ​​ແຕ່​ລະ​ດ້ານ​ຂອງ​ຂົງ​ເຂດ​ ການ​ຮ່ວມ​ມື ແລະ ​ໄດ້ເຫັນ​ດີ​ເປັນ​ເອກະ​ພາບ​ກັນ ​ທາງດ້ານ​ເນື້ອ​ໃນ​ຂອງ “​ແຜນ​ປະຕິບັດ​ງານ​ວ່າ​ດ້ວຍ​ການ​ຜັນ​ຂະຫຍາຍສາຍ​ພົວພັນ​ຄູ່​ຮ່ວມ​ມື​ ຍຸດ​ທະ​ສາດ​ຮອບດ້ານ​ລະຫວ່າງ ລາວ-ຈີນ” ແລະ ​ໄດ້​ພ້ອມ​ກັນ​ເປັນ​ສັກຂີ​ພິຍານ​ໃນ​ພິທີລົງ​ນາມ​ຮ່ວມມື 10 ສະບັບກ່ຽວກັບການພົວພັນລະຫວ່າງ ສປປ.ລາວ ແລະ ສປ.ຈີນ ໃນ​ຄັ້ງນີ້.

ແຜນປະຕິບັດງານດັ່ງກ່າວຖື​ວ່າ​ແມ່ນ​ເອກະສານ​ພື້ນຖານ​ທີ່​ສຳຄັນ ​ຕໍ່​ການ​ເສີມ​ຂະຫຍາຍ​ສາຍພົວພັນ​ລາວ-ຈີນ ໃນ​ອະນາຄົດ, ​ໂດຍ​ໄດ້​ກຳນົດ​ມາດ​ຕະ ການ​ຂອງ​ການ​ຊຸກຍູ້ການ​ຮ່ວມ​ມື​ລະຫວ່າງ​ສອງ​ຝ່າຍ​ຢ່າງ​ຊັດ​ເຈນ ແລະ ກວມ​ເອົາ​ທຸກໆ​ຂົງ​ເຂດ​ຂອງ​ການ​ຮ່ວມ​ມື ເປັນຕົ້ນ​ແມ່ນ: ການ​ຮ່ວມ​ມື​ດ້ານ​ການ ​ເມືອງ, ດ້ານ​ວຽກ​ງານ​ປ້ອງ​ກັນຊາດ-ປ້ອງ​ກັນ​ຄວາມ​ສະຫງົບ, ການ​ຮ່ວມ​ມື​ດ້ານ​ເສດຖະກິດ-ການ​ຄ້າ, ​ໂຄງ​ລ່າງ​ພື້ນຖານ​ດ້ານ​ຄົມມະນາຄົມ, ດ້ານ​ກະສິກຳ, ດ້ານ​ຊັບ ພະຍາກອນ​ແຮ່​ທາດ ​ແລະ ການ​ປຸງ​ແຕ່ງ, ດ້ານ​ພະລັງງານ, ດ້ານ​ການທ່ອງທ່ຽວ, ວັດທະນະ​ທຳ-ສັງຄົມ, ພັດທະນາຊັບພະຍາກອນມະນຸດ, ດ້ານ​ການ​ຫລຸດຜ່ອນ​ຄວາມທຸກ​ຍາກ, ການ​ຮ່ວມ​ມືໃນເວທີພາກພື້ນ ແລະ ສາກົນ ແລະ ດ້ານອື່ນໆ, ຊຶ່ງ​ແຜນ​ປະຕິບັດ​ງານ​ດັ່ງກ່າວ ​ບໍ່​ພຽງ​ແຕ່​ສອດ ຄ່ອງ​ກັບ​ຜົນ​ປະ​ໂຫຍ​ດພື້ນຖານ​ຂອງ​ທັງ​ສອງ​ປະ​ເທດ​ລາວ-ຈີນ ເທົ່າ​ນັ້ນ, ​ແຕ່​ຍັງ​ມີ​ຜົນ​ດີ​ຕໍ່​ສັນຕິ​ພາບ, ສະຖຽນລະ​ພາບ ແລະ ຄວາມວັດທະນາຖາວອນ ຂອງພາກພື້ນອີກດ້ວຍ.

10 ປີແຫ່ງການສ້າງການພົວພັນຄູ່ຮ່ວມມືຍຸດທະສາດລະຫວ່າງອາຊຽນກັບຈີນ. ເຫັນວ່າ ການຮ່ວມມື ແລະ ການແລກປ່ຽນກັນລະຫວ່າງອາຊຽນກັບຈີນ ຂ້າພະເຈົ້າຕີລາຄາສູງຕໍ່ການຮ່ວມມືອາຊຽນ-ຈີນ ຕະຫລອດໄລຍະຜ່ານມາທີ່ມີໝາກມີຜົນອັນໃຫຍ່ຫລວງໃນຫລາຍດ້ານກວມເອົາທຸກຂົງເຂດ: ການ ເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ ອັນໄດ້ເຮັດໃຫ້ ສປ.ຈີນ ກາຍເປັນຄູ່ຮ່ວມຍຸດທະສາດ ປະເທດທຳອິດຂອງອາຊຽນໃນປີ 2003. ຕະຫລອດໄລຍະ 10 ປີ ຂອງການເປັນຄູ່ຮ່ວມຍຸດທະສາດ, ການຮ່ວມມື ອາຊຽນ-ຈີນ ​ໄດ້​ຮັບ​ການ​ເສີມ​ຂະຫຍາຍ​ເປັນ​ກ້າວໆ​ມາ​ ໂດຍ​ສະ​ເພາະ​ ໃນ​ຂົງ​ເຂດ​ການ​ຄ້າ, ການ​ລົງທຶນ, ການ​ສຶກສາ, ວັດທະນະ​ທຳ-ສັງຄົມ ແລະ ການທ່ອງທ່ຽວ. ສິ່ງດັ່ງກ່າວໄດ້​ກາຍ​ເປັນ​ພື້ນຖານ​ໃຫ້ແກ່ການ​ເພີ່ມທະວີ ການຮ່ວມມື, ຄວາມ​ເຂົ້າອົກເຂົ້າ​ໃຈ​ຊຶ່ງ​ກັນ​ ແລະ ກັນ ບົນພື້ນຖານການເປັນເພື່ອນບ້ານທີ່ດີຊຶ່ງບໍ່ສະເພາະ ແຕ່ໄດ້ນຳຜົນປະໂຫຍດມາສູ່ອາຊຽນ ແລະ ສປ.ຈີນ ເທົ່ານັ້ນ, ແຕ່ຍັງເປັນການປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາໃນພາກ ພື້ນອາຊີຕາເວັນອອກ ແລະ ໃນໂລກອີກດ້ວຍ. ດັ່ງນັ້ນ, ຂ້າພະເຈົ້າຈຶ່ງເຫັນວ່າ ສາຍພົວພັນລະຫວ່າງ ອາຊຽນ-ຈີນ ເປັນສາຍພົວພັນຍຸດທະສາດ ທີ່ເຂັ້ມແຂງ, ຮອບດ້ານ ແລະ ຕ່າງຝ່າຍຕ່າງມີຜົນປະໂຫຍດຊຶ່ງອາຊຽນ ແລະ ສປ.ຈີນ ຄວນສືບຕໍ່ຮັກສາການຮ່ວມມືອັນດີນີ້ ແລະ ພ້ອມກັນເສີມ ຂະຫຍາຍໃຫ້ນັບມື້ນັບແຕກດອກອອກຜົນ.

ເພື່ອສືບຕໍ່ເພີ່ມທະວີການຮ່ວມມືກໍຄືການເປັນຄູ່ຮ່ວມຍຸດທະສາດ ອາຊຽນ-ຈີນ ໃຫ້ກ້າວຂຶ້ນສູ່ລະດັບສູງຂຶ້ນເລື້ອຍໆໃນຊຸມປີຕໍ່ໜ້ານັ້ນ, ຂ້າພະເຈົ້າເຫັນວ່າ ອາຊຽນ ແລະ ຈີນຄວນເພີ່ມທະວີການຮ່ວມມືກັນບາງດ້ານຄື:

1. ພວກເຮົາຄວນເພີ່ມທະວີການແລກປ່ຽນການຢ້ຽມຢາມສອງຝ່າຍ ແລະ ການໄປມາຫາສູ່ກັນຂອງປະຊາຊົນຂອງ​ພວກເຮົາຊຶ່ງກໍເປັນໜຶ່ງ ໃນປັດໃຈທີ່ ສຳຄັນໃນການສ້າງຄວາມເຂົ້າອົກເຂົ້າໃຈ ແລະ ຄວາມໄວ້ເນື້ອເຊື່ອໃຈ ຊຶ່ງກັນ ແລະ ກັນ.

2. ຄວນເພີ່​ມທະວີ​ການ​ຮ່ວມ​ມື​ດ້ານເສດຖະກິດ ອາ​ຊຽນ-ຈີນ ໂດຍການກ້າວໄປເຖິງການລຶບລ້າງ​ສິ່ງ​ກີດ​ຂວາງທາງການ​ຄ້າ ​ແລະ ການ​ລົງທຶນ​ທີ່​ ບໍ່​ແມ່ນ​ກຳ​ແພງ​ພາສີ ເພື່ອອຳນວຍ​ຄວາ​ມສະດວກໃຫ້​ແກ່​ການຈັດຕັ້ງປະຕິບັດ​ເຂດການ​ຄ້າ​ເສລີ​ອາ​ຊຽນ-ຈີນ ໃຫ້​ໄດ້​ຮັບ​ໝາກຜົນ​ຫລາຍຂື້ນ​ເລື້ອຍໆ.

3. ຄວນເພີ່ມທະວີ​ການ​ຮ່ວມ​ມືໃນ​ການພັດທະນາດ້ານການເຊື່ອມຈອດ ໂດຍສະເພາະ ດ້ານ​ໂຄງ​ລ່າງ​ພື້ນຖານເພື່ອເປັນສິ່ງອຳນວຍ​ຄວາມ​ສະດວກ​ໃຫ້​ ແກ່​​ການສົ່ງ​ເສີມ​ການ​​ຄ້າ, ການ​ລົງທຶນ, ທ່ອງ​ທ່ຽວ ​ແລະ ການ​ໄປມາ​ຫາ​ສູ່​ກັນຂອງປະຊາຊົນຂອງ​ບັນດາ​ປະ​ເທດ ອາ​ຊຽນ ​ແລະ ສປ ຈີນ. ອັນນີ້ກໍຈະ​​ ເປັນການ​ປະກອບສ່ວນສຳຄັນເຂົ້າ​ໃນ​ການ​ຮັດ​ເຂບ​ຄວາມ​ແຕກ​ໂຕນດ້ານ​ການພັດທະນາ​ພາຍ​ໃນ​ອາ​ຊຽນ ​ແລະ ຄວາມ​ພະຍາຍາມ​ຂອງ​ອາ​ຊຽນ​ໃນ​ການ ​ບັນລຸ​ເປົ້າ​ໝາຍ​ການ​ສ້າງ​ປະ​ຊາ​ຄົມ​ອາ​ຊຽນ ​ໃນ​ປີ 2015.

4. ເພີ່ມທະວີການຮ່ວມມືດ້ານ​ການ​ພັດທະນາຊັບ​ພະຍາກອນ​ມະນຸດ ໃຫ້​ແກ່ປະ​ເທດ​ສະມາຊິກ​ໃໝ່​ອາ​ຊຽນເພື່ອຮອງຮັບໃຫ້ແກ່ການ​ສ້າງ​ປະຊາຄົມອາຊຽນ ໃນປີ 2015.

ຕອນທ້າຍທ່ານ ເລຂາທິການໃຫຍ່ ປະທານປະເທດແຫ່ງ ສປປ.ລາວ ສະແດງຄວາມຊົມເຊີຍຕໍ່ລາຍການກໍຄືເວັບໄຊຂອງວິທະຍຸສາກົນແຫ່ງ ສປ.ຈີນ ທີ່ໄດ້ນຳສະເໜີຂ່າວທີ່ມີເນື້ອໃນດີ ແລະ ອວຍພອນໃຫ້ ເວັບໄຊຂອງ (CRI) ສືບຕໍ່ພັດທະນາອັນໃໝ່ຂື້ນໄປເລື້ອຍໆ.

         
ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446