ຂ່າວພາຍໃນປະເທດ

ກອງປະຊຸມສະໄໝສາມັນເທື່ອທີ 5 ສະພາແຫ່ງຊາດຊຸດທີ VII ໄຂຂຶ້ນຢ່າງເປັນທາງການ  

ຂປລ. ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VII ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 8 ກໍລະກົດ 2013 ທີ່ຫໍສະພາແຫ່ງຊາດ ຊຶ່ງກອງປະຊຸມຕ້ອນຮັບການເຂົ້າຮ່ວມຂອງທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ, ມີບັນດາຜູ້ນຳພັກ-ລັດ, ພະນັກງານອາວຸໂສ-ບຳນານ, ຜູ້ຕາງໜ້າອົງ ການຈັດຕັ້ງມະຫາຊົນ, ສະມາຊິກສະພາແຫ່ງຊາດ, ບັນດານັກທຸລະກິດ ແລະ ພາກສ່ວນຕ່າງໆ ເຂົ້າຮ່ວມ.

ໃນໂອກາດກ່າວສູນທອນພົດ ໄຂກອງປະຊຸມຢ່າງເປັນທາງການ ຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຍົກໃຫ້ເຫັນຄວາມໝາຍຄວາມສຳຄັນຂອງປະຊຸມ ຊຶ່ງມີ ບາງຕອນວ່າ: ຕະຫລອດໄລຍະການດຳເນີນກອງປະຊຸມ 15 ວັນນັ້ນ ກອງ​ປະຊຸມ​ຈະ​ໄດ້​ພິຈາລະນາ​ບັນຫາ​ທີ່​ສຳຄັນຕ່າງໆ ເຊັ່ນ: ຮັບຟັງ ແລະ ຄົ້ນຄວ້າພິຈາລະນາ ບົດ​ລາຍ​ງານ​ ຂອງ​ລັດຖະບານກ່ຽວ​ກັບການຈັດຕັ້ງປະຕິບັດ ​ໄລຍະ​ກາງ​ສະ​ໄໝຂອງການຈັດຕັ້ງປະຕິບັດ ​ແຜນ​ພັດທະນາ​ເສດຖະກິດ-ສັງຄົມ ​ແຫ່ງ​ຊາດ 5 ປີ​ ຄັ້ງທີ VII (2011-2015), ບົດ​ ລາຍ​ງານ​ການຈັດຕັ້ງປະຕິບັດ​ ແຜນ​ພັດທະນາ​ເສດຖະກິດ-ສັງຄົມ 6 ເດືອນ​ຕົ້ນສົກ​ປີ, ວຽກ​ງານ​ຈຸດ​ສຸມ 6 ເດືອນ​ທ້າຍ​ປີ 2012-2013 ແລະ ທິດ​ທາງ​ແຜນການ​ສົກ​ປີ 2013-2014, ບົດ​ລາຍ​ງານ​ການຈັດຕັ້ງ​ປະຕິບັດ ແຜນ​ງົບປະມານ​ແຫ່ງ​ລັດ 6 ເດືອນ​ຕົ້ນສົກ​ປີ, ​ແຜນ​ສະ​ເໜີ​ດັດ​ແກ້​ງົບປະມານ​ແຫ່ງ​ລັດ 6 ເດືອນ​ທ້າຍ​ສົກ​ປີ 2012-2013 ແລະ ທິດ​ທາງ ​ແຜນການ​ງົບປະມານ​ແຫ່ງ​ລັດ ສົກ​ປີ 2013-2014, ລວມທັງ​ ບົດ​ລາຍ​ງານ​ຄວາມ​ພ້ອມ ຂອງ ສປປ.ລາວ ​ໃນ​ການ​ກະກຽມ​ເຂົ້າສູ່​ປະຊາ​ຄົມ​ອາ​ຊຽນ ໃນປີ 2015 ແລະ ປະກອບ ​ຄຳ​ເຫັນ​ ໃສ່​ຮ່າງ​ນະ​ໂຍບາຍ​ທີ່​ດິນ​ແຫ່ງ​ຊາດ. ​ຮັບ​ຟັງບົດ​ລາຍ​ງານ​ການ​ເຄື່ອນ​ໄຫວ​ວຽກ​ງານ ຂອງ​ອົງການ​ກວດ​ສອບແຫ່ງ​ລັດ ປະຈຳ​ສົກ​ປີ 2011-2012 ແລະ ທິດ​ທາງ​ແຜນການ ​ເຄື່ອນ​ໄຫວ​ປະຈຳ​ສົກ​ປີ 2012-2013, ຜົນ​ການກວດ​ສອບ​ບົດ​ສະຫລຸບ​ຂາດ​ຕົວ ການຈັດຕັ້ງ​ປະຕິບັດ ແຜນ​ງົບປະມານ​ແຫ່ງ​ລັດ ສົກ​ປີ 2010-2011.

ພ້ອມທັງ ​ຮັບ​ຟັງບົດ​ລາຍ​ງານ​ການ​ເຄື່ອນ​ໄຫວ​ວຽກ​ງານ ສົກ​ປີ 2012-2013 ແລະ ທິດ​ທາງ​ແຜນການ​ສົກ​ປີ 2013-2014 ຂອງ​ສານ​ປະຊາຊົນ​ສູງ​ສຸດ ​ແລະ ອົງການ​ໄອ​ຍະ​ການ ​ປະຊາຊົນ​ສູງ​ສຸດ. ສຳລັບ​ວຽກ​ງານ​ຂອງ​ສະພາ​ແຫ່ງ​ຊາດ ​ແມ່ນ​ຈະ​ໄດ້​ຮັບ​ຟັງ​ບົດ​ລາຍ​ງານ​ການ​ເຄື່ອນ​ໄຫວ​ວຽກງານ​ກາງ​ສະ​ໄໝ ​ຂອງ​ແຜນການ 5 ປີ ຂອງ​ສະພາ​ແຫ່ງ​ຊາດ​ ຊຸດ​ທີ VII ແລະ ຕີ​ລາຄາ​ການ​ເຄື່ອນ​ໄຫວ​ວຽກ​ງານ​ສົກ​ປີ 2012-2013 ແລະ ທິດ​ທາງ​ວຽກ​ງານ​ສົກ​ປີ 2013-2014, ບົດ​ປະກອບ​ຄຳ​ເຫັນ​ ຂອງ​ອົງການ​ຈັດຕັ້ງມະຫາຊົນ​ຂັ້ນສູນ​ກາງ ຕໍ່​ການ​ເຄື່ອນ​ໄຫວ​ວຽກ​ງານ​ຂອງ​ສະພາ​ແຫ່ງ​ຊາດ. ກອງ​ປະຊຸມ​ຍັງ​ຈະ​ໄດ້ພິຈາລະນາ​ກົດໝາຍ ​ຈຳນວນ 5 ສະບັບ, ​ໃນນັ້ນ ມີ​ກົດໝາຍ​ສ້າງ​ໃໝ່ 3 ສະບັບ ຄື: ກົດໝາຍ​ວ່າ​ດ້ວຍ ​ວິທະຍາສາດ ​ແລະ ​ເຕັກ​ໂນ​ໂລ​ຊີ, ກົດໝາຍ​ວ່າ​ດ້ວຍ​ການ​ປະກັນ​ສັງຄົມ ​ແລະ ກົດໝາຍ​ວ່າ​ດ້ວຍ​ສະຫະພັນ​ແມ່ຍິງ. ກົດໝາຍສະບັບ​ປັບປຸງ ​ຈຳນວນ 2 ສະບັບ​ຄື: ກົດໝາຍ​ວ່າ​ດ້ວຍ​ອາຫານ ແລະ ກົດໝາຍ​ວ່າ​ດ້ວຍ​ການທ່ອງທ່ຽວ./.

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446