ຂ່າວພາຍໃນປະເທດ

ລາວ-ໄທ ເສີມຂະຫຍາຍການຮ່ວມມືດ້ານວິຊາການ

ຂປລ. ລາຍງານຂ່າວຈາກກະຊວງການຕ່າງປະເທດ ໃຫ້ຮູ້ວ່າ: ກອງປະຊຸມຮ່ວມມືດ້ານວິຊາການ ລາວ-ໄທ ຄັ້ງທີ 19 ໄດ້ຈັດຂຶ້ນໃນລະຫວ່າງວັນທີ 23-25 ມິຖຸນາຜ່ານມານີ້ ທີ່ ຈັງຫວັດນະຄອນຣາຊະສີມາ, ຣາຊະອານາຈັກໄທ ໂດຍການເປັນປະທານ ຮ່ວມຂອງທ່ານ ພວງແກ້ວ ລັງສີ ຫົວໜ້າກົມອາຊີ-ປາຊີຟິກ ແລະ ອາຟຣິກາ, ກະຊວງການຕ່າງປະເທດ ສປປ. ລາວ ແລະ ທ່ານ ພິຣຸນ ລາຍສະມິດ, ຜູ້ອຳນວຍການສຳນັກງານ ຄວາມຮ່ວມມືເພື່ອການພັດທະນາລະຫວ່າງປະເທດ, ກະຊວງການຕ່າງປະເທດໄທ.

ໃນກອງປະຊຸມຄັ້ງນີ້ ທັງສອງຝ່າຍໄດ້ສະແດງຄວາມຊົມເຊີຍ ຕໍ່ຜົນການຈັດຕັ້ງຜັນຂະຫຍາຍເນື້ອໃນຂອງບົດບັນທຶກ ກອງປະຊຸມຄັ້ງທີ 18 ປະຈຳສົກປີ 2012-2013 ເປັນຕົ້ນ ການພັດທະນາຊັບພະຍາກອນມະນຸດ ແມ່ນລັດຖະບານໄທ ໄດ້ອະນຸມັດທຶນການສຶກສາໃຫ້ແກ່ພະນັກງານລາວ ໄປສຶກສາຢູ່ປະເທດໄທ ໃນລະດັບປະລິນຍາເອກ 1 ທຶນ, ປະລິນ ຍາໂທ 39 ທຶນ ແລະ ທຶນຝຶກອົບຮົມ, ທັດສະນະສຶກສາ 180 ທຶນ ໃນຈຳນວນ 27 ຫລັກສູດ. ສ່ວນໂຄງການຮ່ວມມື ກໍໄດ້ດຳເນີນໄປດ້ວຍດີ ແລະ ມີປະສິດທິຜົນສູງພໍ ສົມຄວນ ຊຶ່ງມີທັງໝົດ 31 ໂຄງການ, ໃນນັ້ນປະກອບມີ ໂຄງການດ້ານການສຶກສາ 17 ໂຄງການ, ດ້ານກະສິກຳ 5 ໂຄງການ, ດ້ານສາທາລະນະສຸກ 5 ໂຄງການ ແລະ ດ້ານອື່ນໆ 4 ໂຄງການ. ໃນຈຳນວນ 31 ໂຄງການນີ້ ມີ 9 ໂຄງການ ໄດ້ສຳ ເລັດແລ້ວໃນປີ 2012 ແຕ່ຝ່າຍໄທຍິນດີສືບຕໍ່ໃຫ້ການຊ່ວຍເຫລືອ ຜູ້ທີ່ກຳລັງສຶກສາຢູ່ປະເທດໄທ ຈົນສຳເລັດ.

ເພື່ອສືບຕໍ່ເສີມຂະຫຍາຍການຮ່ວມມືດ້ານວິຊາການ ລາວ-ໄທ ທັງສອງຝ່າຍໄດ້ຮ່ວມກັນປຶກສາຫາລື ແຜນການຮ່ວມມື ສຳລັບສົກປີ 2013-2014 ຊຶ່ງລັດຖະບານໄທ ຈະໃຫ້ ການສະໜັບສະໜູນ ດ້ານການພັດທະນາຊັບພະຍາກອນມະນຸດແກ່ລາວ ໂດຍເພີ່ມທຶນການສຶກສາ ໃນລະດັບປະລິນຍາເອກຂຶ້ນເປັນ 2 ທຶນ, ປະລິນຍາໂທ 40 ທຶນ ແລະ ຝຶກອົບຮົມ, ທັດສະນະສຶກສາ 200 ທຶນ. ພ້ອມນີ້ ທັງສອງຝ່າຍເຫັນດີຊຸກຍູ້ບັນດາໂຄງການໃໝ່ ໃຫ້ໄດ້ຮັບການຈັດຕັ້ງປະຕິບັດໂດຍໄວ ເພື່ອໃຫ້ສຳເລັດຕາມແຜນການ./.

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446