ຂ່າວພາຍໃນປະເທດ

ເຜີຍ​ແຜ່​ວຽກ​ງານ 3 ສ້າງ​ ໃຫ້​ພະນັກງານ​ລັດຖະກອນ ​ກະຊວງ​ແຜນການ ແລະ ການລົງທຶນ

(ຂປລ) ກະຊວງ​ແຜນການ ​ແລະ ການ​ລົງທຶນ ຈັດ​ກອງ​ປະຊຸມ​ເຜີຍ​ແຜ່ບົດ​ຄຳ​ເຫັນ ຂອງທ່ານເລຂາທິການ​ໃຫຍ່​, ປະທານ​ປະ​ເທດ ຈູມ​ມາລີ ​ໄຊ​ຍະ​ສອນ, ຕໍ່​ກອງ​ປະຊຸມວຽກ​ງານ 3 ສ້າງ​ທົ່ວ​ປະ​ເທດ ທີ່​ໄດ້​ຈັດ​ຂຶ້ນ​ແຕ່​ວັນ​ທີ 4-5 ກຸມ​ພາ 2013 ທີ່ຜ່ານມາ ​ໃຫ້​ແກ່ພະນັກງານ-​ລັດຖະກອນ​ ພາຍ​ໃນ​ກະຊວງ ​ໃນ​ວັນ​ທີ 14 ກຸມພາ 2013 ເພື່ອ​ໃຫ້​ພະນັກງານ​- ລັດຖະກອນ​ ໄດ້​ມີ​ຄວາມ​ຮູ້​ຄວາມ​ເຂົ້າ​ໃຈ​ກ່ຽວ​ກັບ​ການຈັດຕັ້ງປະຕິບັດ​ວຽກ​ງານ 3 ສ້າງ​ຢ່າງ​ເລິກ​ເຊິ່ງ ​ແລະ ນຳ​ໄປ​ຈັດຕັ້ງປະຕິບັດ​ໄດ້​ຢ່າງ​ມີ​ປະສິດທິ​ຜົນ​.

ທ່ານ ສົມ​ດີ ດວງ​ດີ, ລັດຖະມົນຕີ​ວ່າການ​ກະຊວງ​ແຜນການ ​ແລະ ການ​ລົງທຶນ ​ໄດ້​ຍົກ​ໃຫ້​ເຫັນ​ຄວາມ​ໝາຍ​ຄວາມ​ສຳຄັນ ​ແລະ ​ເນື້ອ​ແທ້ ຂອງວຽກສາມ​ສ້າງ​ວ່າ: ວຽກງານສາມ ສ້າງ ແມ່ນ​ວຽກຍຸດ​ທະ​ສາດ​ຍາວ​ນານ ​ເພື່ອ​ບັນລຸ​ຈຸດໝາຍ​ເຮັດ​ໃຫ້​ລະບອບ ​ປະຊາທິປະ​ໄຕ ປະຊາຊົນ ມີ​ຄວາມໝັ້ນຄົງ, ປະ​ເທດ​ຊາດ​ມັ່ງ​ຄັ່ງ​ເຂັ້ມ​ແຂງ, ປະຊາຊົນ​ຮັ່ງມີ​ຜາ​ສຸກ, ສັງ ຄົມ​ມີ​ປະຊາທິປະ​ໄຕ, ຍຸຕິ​ທຳ ​ແລະ ສີວິ​ໄລ ຊຶ່ງ​ເນື້ອ​ແທ້​ເປັນ​ອຸດົມ​ການ​ສັງຄົມ​ນິຍົມ. ສະນັ້ນການ​ປະຕິບັດ​ວຽກງານ​ສາມ​ສ້າງ ​ໃຫ້​ບັນລຸ​ຈຸດໝາຍສັງຄົມ​ນິຍົມ ຕ້ອງ​ເລີ່​ມສ້າງ​ຮາກ ​ຖານ​ໃຫ້​ເຂັ້ມ​ແຂງ ຊຶ່ງ​ລວມ​ເອົາ​ຫລາຍ​ດ້ານ​ເຊັ່ນ: ດ້ານ​ການ​ເມືອງ, ​ເສດຖະກິດ, ສັງຄົມ-ວັດທະນະທຳ ​ແລະ ດ້ານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ. ວຽກງານ 3 ສ້າງ​ມີ​ລັກ ສະນະ​ຮອບດ້ານ ​ແລະ ​ເລັ່ງທວງ​ໃຫ້​ມີ​ຫລາຍ​ພາກສ່ວນ​ເຂົ້າ​ຮ່ວມ ​ແມ່ນໜ້າທີ່​ລວມຂອງ​ທົ່ວ ພັກ, ທົ່ວ​ລັດ ​ແລະ ທົ່ວ​ປວງ​ຊົນ, ເປັນ​ການ​ເສີມ​ຂະຫຍາຍ​ສິດ​ເປັນ​ເຈົ້າ​ໃຫ້​ແກ່​ທ້ອງ ​ຖິ່ນ​ຮາກ​ຖານ​ໃຫ້​ມີ​ຄວາມ​ຮັບຜິດຊອບຫລາຍ​ຂຶ້ນຕິດ​ພັນ​ກັບ​ການ​ໄດ້​ຮັບ​ຜົນ​ປະ​ໂຫຍ​ດຢ່າງ​ເໝາະສົມ ​ໂດຍ​ສະ​ເພາະ​ແມ່ນບັນດາເມືອງ ​ແລະ ບ້ານ​ເປົ້າໝາຍ ​ໃຫ້​ມີ​ຄວາມ​ເຂັ້ມ​ແຂງ ກໍ​ຈະ​ເປັນ​ພື້ນຖານ​ທີ່​ດີ​ໃນ​ການ​ປະຕິບັດ​ວຽກງານ 3 ​ສ້າງ​ບັນລຸ​ຜົນສຳເລັດ.

ພ້ອມ​ກັນນີ້ ທ່ານລັດຖະມົນຕີ ຍັງ​ໄດ້​ເນັ້ນ​ໃຫ້​ພະນັກງານ​ພາຍ​ໃນ​ກະຊວງ​ແຜນການ ​ແລະ ການ​ລົງທຶນ ​ເຂົ້າ​ໃຈ​ກ່ຽວ​ກັບ​ການ​ປະຕິບັດ​ວຽກ 3 ສ້າງ ​ໃນ​ຂະ​ແໜງ​ແຜນການ ​ແລະ ການ​ລົງທຶນ ພາຍຫລັງ​ທີ່​ມີ​ການຈັດຕັ້ງປະຕິບັດຢ່າງ​ຕັ້ງໜ້າ ​ແລະ ​ເປັນ​ຮູບ​ປະ​ທຳ​ມາ​ໃນ​ໄລຍະ​ໜຶ່ງ​ແລ້ວ ​ໂດຍ​ທ່ານ​ໄດ້​ຍົກ​ໃຫ້​ເຫັນ​ຂໍ້​ສະດວກ, ຄວາມ​ຫຍຸ້ງ​ຍາກ​ໃນ​ການ​ຈັດຕັ້ງ ປະຕິບັດ​ຜ່ານ​ມາ ​ເພື່ອ​ເປັນ​ບົດຮຽນ​ໃຫ້​ແກ່​ພະນັກງານ​ທີ່​ກຳລັງ​ລົງ​ເຮັດ​ວຽກ​ຢູ່ 17 ​ແຂວງ 51 ​​ເມືອງ 108 ບ້ານ ​ໃຫ້​ຈັດຕັ້ງປະຕິບັດ​ຢ່າງ​ຖືກຕ້ອງ​ຕາມ​ທິດ​ນຳ ​ແລະ ​ໃຫ້​ໄດ້​ຮັບ ​ຜົນສຳ​ເລັດ ຊຶ່ງ​ໃນ​ປະຈຸ​ບັນ​ທົ່ວ​ຂະ​ແໜງ​ແຜນການ​ກຳລັງ​ຂຸ້ນຂ້ຽວ ກະກຽມ​ສ້າງ​ແຜນ​ງານ​ໂຄງການ​ລົງທຶນ​ຂອງ​ລັດ ​ເຂົ້າ​ໃນ​ເມືອງ 3 ສ້າງ 51 ​ເມືອງ ພ້ອມ​ກັນນັ້ນ ກໍ​ໄດ້​ເອົາ​ໃຈ​ໃສ່​ ກຳນົດ​ໂຄງການ​ຜະລິດ​ເປັນ​ສິນຄ້າ ​ແລະ ການ​ບໍລິການ​ທີ່​ສ້າງ​ລາຍ​ຮັບ​ໃຫ້​ແກ່​ປະຊາຊົນ ​ໂດຍ​ການ​ລົງທຶນ​ຂອງ​ພາກສ່ວນ​ຕ່າງໆ​ໃຫ້​ບັນດາ​ບ້ານ​ເປົ້າ​ໝາຍ./.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446