ຂ່າວພາຍໃນປະເທດ

ລັດຖະບານ​ຈີນ​ສືບຕໍ່​​ໂຄງການ​ຊ່ວຍ​ເຫລືອ
ໂທລະພາບ​ແຫ່ງ​ຊາດ​ລາວ​ຊ່ອງ 3 ​ໄລຍະ II


ຂປລ. ລັດຖະບານ​ ສປ. ຈີນ ສືບ​ຕໍ່​ໃຫ້ການຊ່ວຍ​ເຫລືອ ໃນ​​ໂຄງການ​ຮ່ວມ​ມື​ດ້ານ​ເຕັກນິກ​ ໂທລະພາບ​ແຫ່ງ​ຊາດ​ລາວ​ຊ່ອງ 3 ຂອງ ສປປ. ລາວ​ ໄລ ຍະ II ​ເພື່ອ​ຍົກ​ລະດັບລະບົບ​ເຕັກນິກ​ເຮັດ​ໃຫ້​​ໂທລະພາບ​ຊ່ອງ 3 ມີ​ຄວາມ​ສົມບູນ​ຍິ່ງ​ຂຶ້ນ​ ໂດຍ​ລັດຖະບານ​ຈີນ​ ໄດ້ສະໜອງ​ອຸ​ປະກ​ອນລະບົບ​ເຄື່ອງ​​ເຊີ​ເວີ​ ສົ່ງ​ອອກ​ອາກາດ 1 ຊຸດ, ລະບົບ​ຖ່າຍ​ທອດ​ສົດ​ເຄື່ອນ​ທີ່ 1 ຊຸດ ພ້ອມ​ດ້ວຍ​ອຸປະກອນ​ເຕັກນິກ​ຈຳນວນ​ໜຶ່ງ ພ້ອມ​ນີ້ ຍັງ​ໄດ້​ແຕ່ງຕັ້ງ​ຜູ້​ຊ່ຽວຊານ​ຈຳນວນ 5 ຄົນ ​ມາ​ປະ​ຈຳຢູ່ ສປປ.ລາວ ​ເປັນ​ເວລາ 2 ປີ ພ້ອມ​ດຽວ​ກັນນີ້​ ໄດ້ສົ່ງ​ຊ່ຽວຊານ​ທາງ​ດ້ານ​ເຕັກນິກ​ ຂອງບໍລິສັດ​ວິທະຍຸ​ໂທລະພາບ​ຈີນ  ​ເພື່ອ​ການ ​ຮ່ວມ​ມື​ທາງ​ດ້ານ​​ເສດຖະກິດ-​ເຕັກ​ນິກສາກົນ ມາ​ສຳ​ຫລວດ, ກວດກາ​ລະບົບ​ເຕັກນິກ,  ​ຊ່ວຍ​ບໍ​ລຸງ​ສ້າງ​ພະນັກງານ​ເຕັກນິກ, ສ້ອມ​ແປງ​ອຸປະກອນ​ທີ່​ເປ່​ເພ ຢູ່ໂທລະພາບ​ຊ່ອງ 3 ຕື່ມ​ອີກ, ​ໂຄງການຊ່ວຍ​ເຫລືອ​ຮ່ວມ​ມື​ທາງ​ດ້ານ​ເຕັກນິກ​​ໂທລະພາບ​ແຫ່ງ​ຊາດ​ລາວ​ຊ່ອງ 3 ​ຂອງ ລັດຖະບານ​ຈີນ ​ໄດ້​ເລີ່​ມມາ​ແຕ່​ປີ 2008 ປະກອບ​ມີ​ການ​ກໍ່ສ້າງອາຄານ, ແລະ ອຸປະກອນ​ຕ່າງໆ ​ເປັນຕົ້ນ​ແມ່ນ​ຊຸດ​ວີ​ດີ​ໂອ, ລົດ​ຖ່າຍ​ທອດ​ສົດ, ອຸປະກອນ​ເຄື່ອງ​ສົ່ງ​ພາກພພື້ນດິນ 20 ກິ​ໂລ​ວັດ ​ມູນ​ຄ່າ​ທັງ​ໝົດ 75 ລ້ານ​ຢວນ (ສະກຸນ​ເງິນ​ຈີນ) ​ເລີ່​ມນຳ​ໃຊ້​ມາ​ໄດ້ 4 ປີ ​ແລະ ​ໄດ້​ຮັບ​ໃຊ້​ງານ​ສຳຄັນ​ຕ່າງໆ​ຂອງ​ຊາດ ​ເຊັ່ນ: ກອງ​ປະ​ຊຸມ​ສຸດ​ຍອດ​​ ອາຊີ-ເອີຣົບ ຄັ້ງທີ 9,  ງານ​ມະຫະກຳ​ກິລາ​ ມະຫາວິທະຍາ​ໄລ​ອາ​ຊຽນ ຄັ້ງທີ 16 ​ແລະ ງານ​ອື່ນໆ​ຕື່ມ​ອີກ.

ພິທີ​ເຊັ່ນ​ສັນຍາ​ການ​ຮ່ວມ​ມື​ຊ່ວຍ​ເຫລືອ​ດັ່ງກ່າວ​ ໄດ້​ຈັດ​ຂຶ້ນ​ໃນ​ວັນ​ທີ 30 ສິງຫາ 2013 ຢູ່​ທີ່​ຫ້ອງ​ປະຊຸມ​ໂທລະພາບ​ແຫ່ງ​ຊາດ​ລາວ​ ຊ່ອງ 3 ລະຫວ່າງ ທ່ານ ດຣ. ບຸນ​ຈອມ ວົງ​ເພັດ ຜູ້​ອຳນວຍ​ການ​ໂທລະພາບ​ແຫ່ງ​ຊາດ​ລາວ ​ແລະ ທ່ານ ຫລີ​ວ ຕົງ ​ເຊີນ ຜູ້​ບໍລິຫານ​ບໍລິສັດວິທະຍຸ​ໂທລະພາບ​ຈີນ  ​ເພື່ອ​ ການ​ຮ່ວມ​ມື​ທາງ​ດ້ານ​​ເສດຖະກິດ-​ເຕັກ​ນິກສາກົນ ທັງ​ເປັນ​ຫົວໜ້າ​ທິມງານວິຊາ​ການ​ກວດກາ​ຂຶ້ນ​ແຜນ​ໂທລະພາບ​ແຫ່ງ​ຊາດ​ລາວ​ຊ່ອງ 3, ມີ​ບັນດາ​ຫົວ ໜ້າ​ກົມ, ຮອງ​ກົມ ​ແລະ ຜູ້ຕາງໜ້າ​ຈາກ​ສະຖານທູດ​ ຈີນ ປະ​ຈຳ ສປປ. ລາວ​ພ້ອມ​ດ້ວຍ​ພະນັກງານ​ທີ່​ກ່ຽວຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ./.

      

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446