ຂ່າວພາຍໃນປະເທດ

ເຈົ້າຄອງນະຄອນຫລວງວຽງຈັນ ລົງຊີ້ນຳ
ການປູກຝັງ-ລ້ຽງສັດ ບ້ານພັດທະນາດອນໄຮ່

ຂປລ. ໃນວັນທີ 22 ສິງຫາ 2013 ນີ້ທ່ານ ສຸກັນ ມະຫາລາດ ເຈົ້າຄອງນະຄອນຫລວງວຽງຈັນ ພ້ອມຄະນະໄດ້ລົງຊຸກຍູ້ ການປູກຝັງ-ລ້ຽງສັດ ແລະ ການຜະລິດກະສິກຳໃຫ້ ເປັນສິນຄ້າຢູ່ບ້ານພັດທະນາດອນໄຮ່ ເມືອງປາກງື່ມ ນະຄອນຫລວງວຽງຈັນ ໂດຍການຕ້ອນຮັບຂອງຄະນະພັກເມືອງ, ຄະນະ ພັກບ້ານ ແລະ ພໍ່ແມ່ປະຊາຊົນພາຍໃນບ້ານດອນໄຮ່ ເຂົ້າຮ່ວມ.

ໃນໂອກາດດັ່ງກ່າວທ່ານ ສຸກັນ ມະຫາລາດ ພ້ອມຄະນະກໍໄດ້ຮັບຟັງການລາຍງານ ໂດຍຫຍໍ້ສະພາບການພັດທະນາ ເສດຖະກິດ-ສັງຄົມ ຂອງບ້ານ ຈາກທ່ານ ຄຳຟອງ ຈັນທະສອນ ເລຂາຄະນະພັກບ້ານດອນໄຮ່ວ່າ: ບ້ານໂນນໄຮ່ມີ 31 ໜ່ວຍ ມີພົນລະເມືອງທັງໜົດ 1.700 ກວ່າຄົນ, ຍິງ 945 ຄົນ, ທົ່ວບ້ານມີເນື້ອທີ່ 2.000 ກວ່າເຮັກຕາ, ໃນນັ້ນ ເນື້ອທີ່ປູກສ້າງ 34,2 ເຮັກຕາ, ເນື້ອທີ່ທຳການຜະລິດ 934,9 ເຮັກຕາ. ການເຮັດນາການ ຜະລິດເຂົ້າເປັນພື້ນຖານ, ການຄ້າຂາຍເປັນສຳຮອງ, ການເຄື່ອນໄຫວວຽກງານໃນແຕ່ລະດ້ານ ເຊັ່ນ: ດ້ານການເມືອງ ແມ່ນໄດ້ນຳເອົາແນວທາງນະໂຍ ບາຍ, ມະຕິຄຳສັ່ງລົງໂຄສະນາເຜີຍແຜ່ເຊື່ອມຊຶມໃຫ້ປະຊາຊົນຮັບຮູ້ ແລະ ເຂົ້າໃຈແນວທາງຂອງພັກ-ລັດ ພິເສດແມ່ນການສ້າງບ້ານ ແລະ ກຸ່ມບ້ານ ພັດທະນາ, ຄຳສັ່ງ ແນະນຳເລັກທີ 09 ຂອງກົມການເມືອງສູນກາງພັກ, ຄຳສັ່ງເລກທີ 002, 003 ຂອງເຈົ້າຄອງນະຄອນຫລວງວຽງຈັນ ວ່າດ້ວຍ ຄວາມສະຫງົບສຸກ ແລະ ຄວາມສະອາດ.

ຜ່ານການເຄື່ອນໄຫວວຽກງານ ສາມາດຕີລາຄາໄດ້ດັ່ງນີ້: ປະຊາຊົນຕື່ນຕົວທາງດ້ານການເມືອງ ແລະ ສະແດງອອກໃນການປະກອບສ່ວນຮ່ວມພັດທະ ນາຕ່າງໆ ແລະ ເປັນເຈົ້າຕົນເອງ ໃນການປົກປັກຮັກສາຄວາມສະຫງົບ, ຄວາມສະອາດໃນຂອບເຂດຄວາມຮັບຜິດຊອບຂອງຕົນເປັນຢ່າງດີ. ດ້ານເສດ ຖະກິດມີຫົວໜ່ວຍການຄ້າ ແລະ ການບໍລິການທັງໝົດ 39 ໜ່ວຍ, ການຜະລິດເຂົ້ານາປີສາມາດຜະລິດໄດ້ 2.400 ໂຕນ ສະເລ່ຍໃຫ້ຫົວຄົນລະໄດ້ 1.300 ກິໂລຕໍ່ປີ, ມີສັດລ້ຽງ ຄື: ຄວາຍ 50 ໂຕງົວ 155 ໂຕ ແລະ ສັດອື່ນໆ. ຕໍ່ການເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບ ມີອົງການຈັດຕັ້ງ ປກຊ-ປກສ ແລະ ໄດ້ຈັດຕັ້ງປ້ອງກັນເວັນຍາມປົກກະຕິ ແລະ ສາມາດແກ້ໄຂປະກົດການຕ່າງໆພາຍໃນບ້ານໄດ້ເປັນຢ່າງດີ.

           
ໃນໂອກາດນີ້ ທ່ານ ສຸກັນ ມະຫາລາດ ກໍໄດ້ກ່າວສະແດງຄວາມຊົມເຊີຍ ຕໍ່ຄະນະພັກບ້ານທີ່ໄດ້ນຳພາພໍ່ແມ່ປະຊາຊົນ ພາຍໃນຂອງຕົນ ໃນການພັດ ທະນາສ້າງສາບ້ານດອນໄຮ ໃຫ້ດີຂຶ້ນເທື່ອລະກ້າວ ພ້ອມດຽວກັນນີ້ ທ່ານເຈົ້າຄອງກໍໄດ້ເນັ້ນໜັກ ໃຫ້ອຳນາດການປົກຄອງບ້ານສືບຕໍ່ພັດທະນາບ້ານໃນ 6 ວຽກງານທີ່ສຳຄັນ ຄື: ໃຫ້ພະນັກງານເມືອງ ກໍຄື ອຳນາດການປົກຄອງບ້ານ ສືບຕໍ່ຊຸກຍູ້ປະຊາຊົນໃຫ້ເອົາໃຈໃສ່ການຜະລິດກະສິກຳໃຫ້ເປັນ ສິນຄ້າຫລາຍຂຶ້ນ, ໃນນັ້ນ ຊຸກຍູ້ໃຫ້ບ້ານໜື່ງມີໜຶ່ງຜະລິດຕະພັນຂອງຕົນ ແລະ ໃຫ້ 1 ເມືອງໃນນະຄອນຫລວງວຽງຈັນ ມີ 5 ຜະລິດຕະພັນ. ໃຫ້ບ້ານ ເອົາໃຈໃສ່ເກັບລາຍຮັບໃຫ້ລື່ນຄາດໝາຍ. ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ແກ້ໄຂບັນດາປະກົດການຫຍໍ້ທໍ້ພາຍ ໃນບ້ານໃຫ້ ທັນການ. ໂຄສະນາ ແລະ ປຸກລະດົມປະຊາຊົນ ພ້ອມກັນອະນາໄມໃນມື້ວັນເສົາແດງເປັນປົກກະຕິ ເພື່ອສ້າງຄວາມສະອາດຄວາມສວຍງາມພາຍໃນ ບ້ານ. ຈັດຕັ້ງກຸ່ມການຜະລິດ, ກຸ່ມປູກຝັງ, ກຸ່ມລ້ຽງສັດ ແລະ ເອົາໃຈໃສ່ວຽກງານລົງກໍ່ສ້າງຮາກຖານການ ເມືອງເປັນປະຈຳ.

 

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446