ຂ່າວພາຍໃນປະເທດ

ຄາດໝາຍສູ້ຊົນ ພັດທະນາເສດຖະກິດ-ສັງຄົມ ເມືອງຮົ່ມ ແລະ ເມືອງໄຊສົມບູນ

ຂປລ. ໃນສົກປີ 2013-2014 ນີ້, ແຂວງວຽງຈັນ ໄດ້ວາງທິດທາງວຽກງານຈຸດສຸມ ເພື່ອສືບຕໍ່ພັດທະນາເສດຖະກິດ-ສັງຄົມ ເມືອງຮົມ ແລະ ເມືອງ ໄຊສົມບູນ ເພື່ອສ້າງເງື່ອນໄຂໃຫ້ສອງເມືອງຈຸດສຸມຂອງລັດຖະບານ ກໍຄື ແຂວງວຽງຈັນ ໃຫ້ກາຍເປັນເມືອງເຂັ້ມແຂງຮອບດ້ານ, ສ້າງບ້ານໃຫຍ່ໃຫ້ກາຍ ເປັນຕົວເມືອງນ້ອຍໃນຊົນນະບົດ ຊຶ່ງຕົ້ນຕໍແມ່ນສືບຕໍ່ເສີມຂະຫຍາຍຈຸດດີ, ແກ້ໄຂ້ຈຸດອ່ອນຂໍ້ຄົງຄ້າງຢູ່ໃນແຕ່ລະຂົງເຂດ ເປັນຕົ້ນແມ່ນຂົງເຂດການເມືອງ- ແນວຄິດ, ປ້ອງກັນຊາດ-ປ້ອງກັນຄວາມສະຫງົບ, ຂົງເຂດເສດຖະກິດ, ວັດທະນະທຳ-ສັງຄົມ ໃຫ້ມີການຫັນປ່ຽນຢ່າງຕັ້ງໜ້າ ແລະ ມີໝາກຜົນດີຂຶ້ນເປັນ ກ້າວໆ.

ຕໍ່ກັບທິດທາງແຜນການດັ່ງກ່າວ, ທ່ານ ຄຳເມິງ ພົງທະດີ ເຈົ້າແຂວງໆວຽງຈັນ ໄດ້ລາຍງານໃຫ້ຮູ້ໃນກອງປະຊຸມ ສະຫລຸບການພັດທະນາເມືອງຮົມ ແລະ ເມືອງໄຊສົມບູນ ສົກປີ 2012-2013   ແລະ ໃນນີ້ ທ່ານຍັງໄດ້ໃຫ້ຮູ້ເຖິງຄາດໝາຍລວມເພື່ອພັດທະນາເຂດເມືອງດັ່ງກ່າວ ຊຶ່ງກ່ອນອື່ນໝົດຕ້ອງ ແກ້ໄຂແນວຄິດເອື່ອຍອີງ, ທຳມາຫາກິນແບບທຳມະຊາດ, ອັກຄະຕິ ແລະ ແນວຄິດຫລົງໄຫລນຳການຕົວະຍົວະຫລອກລວງຂອງພວກກຸ່ມຄົນບໍ່ດີ, ສ້າງ ຈິນຕະນາການໃໝ່ທີ່ເຊື່ອໝັ້ນການນຳພາຂອງພັກ, ເຊື່ອໝັ້ນອະນາຄົດຂອງຊາດ, ສ້າງໃຫ້ໄດ້ແນວຄິດເປັນເຈົ້າຕົນເອງໃນການປະຕິບັດບັນດາສິດ ແລະ ພັນທະຂອງພົນລະເມືອງຕາມກົດໝາຍ; ພັດທະນາ 2 ເມືອງ ໃຫ້ມີການຫັນປ່ຽນຢ່າງຮອບດ້ານກວ່າເຂດອື່ນໆ, ສ້າງໃຫ້ເຂດດັ່ງກ່າວກາຍເປັນເຂດ ເຊື່ອມຈອດກັບຫລາຍທິດ; ສຸມໃສ່ສ້າງໃຫ້ມີການຫັນປ່ຽນຈາກໂຄງປະກອບເສດຖະກິດກະສິກຳທຳມະຊາດເປັນຕົ້ນຕໍ ໃຫ້ເປັນໂຄງການປະກອບກະສິກຳ ສະອາດ, ອຸດສາຫະກຳ ແລະ ການບໍລິການຕາມທິດທັນສະໄໝ; ແກ້ໄຂຄວາມທຸກຍາກຂອງປະຊາຊົນ ເພື່ອບັນລຸບັນດາເປົ້າໝາຍສະຫັດສະວັດ ດ້ານການພັດທະນາ; ສຸມໃສ່ພັດທະນາເຂດນີ້ໃຫ້ກາຍເປັນເຂດໃຈກາງຂອງ ການທ່ອງທ່ຽວວັດທະນາທຳບັນດາເຜົ່າ ແລະ ທ່ອງທ່ຽວທຳມະຊາດ. ຮອດປີ 2015 ເຮັດໃຫ້ເມືອງຮົ່ມ ແລະ ເມືອງໄຊສົມບູນ ມີຄວາມສະຫງົບຢ່າງໜັກແໜ້ນ, ສ້າງເງື່ອນໄຂອຳນວຍ ແລະ ຄວາມເຊື່ອໝັ້ນໃນການລົງທຶນ ແລະ ການທ່ອງທ່ຽວ.

ໄປຄຽງຄູ່ກັນນີ້, ກໍຕ້ອງໄດ້ມີການປັບປຸງລະບົບການເມືອງໃຫ້ເຂັ້ມແຂງ ເປັນຕົ້ນ ແມ່ນຄະນະພັກຮາກຖານ, ໜ່ວຍພັກ ຮາກຖານ, ອົງການປົກຄອງບ້ານ, ອົງການຈັດຕັ້ງແນວໂຮມບ້ານ, ສະຫະພັນນັກຮົບເກົ່າ, ອົງການຈັດຕັ້ງຊາວໝຸ່ມ, ແມ່ຍິງຂັ້ນບ້ານ ເຮັດໃຫ້ການຈັດຕັ້ງເຫລົ່ານີ້ມີຄວາມເຂັ້ມແຂງຮອບ ດ້ານ./.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446