ຂ່າວພາຍໃນປະເທດ

ກະຊວງແຮງງານ ແລະ ສະຫວັດດີການສັງຄົມ ຈັດຕັ້ງເຜີຍແຜ່ເອກະສານສຳຄັນ

ຂປລ. ໃນວັນທີ 9 ເມສາ 2013 ນີ້, ທີ່ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຈັດຕັ້ງເຜີຍແຜ່ມະຕິກອງປະຊຸມຄົບຄະນະຂອງຄະນະບໍລິຫານງານ ສູນກາງ ພັກ ປະຊາຊົນ ປະຕິວັດລາວຄັ້ງທີ 5 ສະໄໝທີ່ IX, ບົດໂອ້ລົມຂອງທ່ານ ຈູມມະລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ກ່ຽວກັບ ວຽກງານສາມສ້າງ ແລະ ຮັບຟັງການເລົ່າມູນເຊື້ອ ວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນລາວຄົບຮອບ 52 ປີຂຶ້ນ. ໂດຍການເປັນປະທານ ຂອງທ່ານ ບຸນຄົງ ຫລ້າສຸກັນ, ລັດຖະມົນຕີຊ່ວຍວ່າການກະຊວງແຮງງານ ແລະ ສະຫວັດດີການສັງຄົມ, ມີຄະນະກົມ, ອົງການ ແລະ ບັນດາສູນ ທີ່ຂຶ້ນກັບກະຊວງ, ຕະຫລອດຮອດພະນັກງານ ຫລັກແຫຼ່ງຂອງ ກະຊວງເຂົ້າຮ່ວມ.

ທ່ານ ບຸນຄົງ ຫລ້າສຸກັນ ໄດ້ໃຫ້ກຽດເຜີຍແຜ່ມະຕິຂອງກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ, ຄັ້ງທີ 5 ສະໄໝທີ່ IX, ຊຶ່ງທ່ານໄດ້ຍົກໃຫ້ເຫັນກ່ຽວກັບ ການຕີ ລາຄາຄືນສະພາວະຄວາມເປັນຈິງ ຂອງວິສາຫະກິດທີ່ສັງກັດໃນພາກສ່ວນເສດຖະກິດຕ່າງໆ ຢູ່ປະເທດເຮົາ ແລະ ທິດທາງໃນການປັບປຸງກໍ່ສ້າງວິສາຫະກິດໃນຕໍ່ໜ້າ, ເຊິ່ງຜ່ານມາ ບັນດາວິສາຫະກິດຕ່າງໆນັບທັງຂອງລັດ, ລັດຮຸ້ນສ່ວນ, ເອກະເທດ - ເອກະຊົນ ແລະ ເສດຖະກິດຮ່ວມມືຂອງປະຊາຊົນ, ໄດ້ມີການພັດທະນາ ແລະ ເຕີບໃຫຍ່ ຂະຫຍາຍຕົວ ດ້ວຍຈັງຫວະໄວພໍສົມຄວນ, ປະກອບສ່ວນເຮັດໃຫ້ລວມຍອດມູນຄ່າຜະລິດຕະພັນພາຍໃນເພີ່ມຂຶ້ນ ແຕ່ຈະຕ້ອງໄດ້ມີການປັບປຸງແກ້ໄຂໃນຫລາຍດ້ານ, ເປັນຕົ້ນ ດ້ານນິຕິກຳ, ລະບົບການຄຸ້ມຄອງ ແລະ ກົນໄກແບບແຜນວິທີເຮັດວຽກຕ່າງໆເພື່ອເຮັດ ໃຫ້ການດຳເນີນທຸລະກິດຢູ່ປະເທດເຮົາສອດຄ່ອງຕາມເເນວທາງນະໂຍບາຍຂອງພັກ ທີ່ວາງອອກ, ພ້ອມນັ້ນ ຍັງໄດ້ເວົ້າເຖິງວຽກງານຕ່າງປະເທດ ແລະ ຜົນການດຳເນີນກອງປະຊຸມສຸດຍອດອາເຊັມ ແລະ ຜົນການຊີນຳນຳພາຂອງກົມການເມືອງ ແລະ ຄະນະເລຂາ ທິການສູນກາງພັກ ແລະ ວຽກງານຈຸດສຸມໃນຕໍ່ໜ້າ.

ໃນຕອນບ່າຍຂອງວັນດຽວກັນ ໄດ້ຮັບຟັງການປາຖະກະຖາເລົ້າມູນເຊື້ອວັນສ້າງຕັ້ງກຳລັງປ້ອງກັນຄວາມສະຫງົບ ປະຊາຊົນລາວຄົບຮອບ 52 ປີ. ເປັນກຽດເລົ່າມູນເຊື້ອດັ່ງກ່າວ ແມ່ນ ທ່ານ ພັນເອກ ດຣ ທອງເຄນ ບຸນໝັ້ນ, ຄະນະພັກ, ຮອງຫົວໜ້າກົມໃຫຍ່ ປກສ ກະຊວງປ້ອງກັນຄວາມສະຫງົບ ຊຶ່ງທ່ານໄດ້ເລົ່າຄືນຄວາມເປັນມາຂອງກຳລັງປ້ອງກັນ ຄວາມສະຫງົບ ນັບແຕ່ການສ້າງຕັ້ງມາເຖິງປະຈຸບັນ ເຫັນວ່າກຳລັງປ້ອງກັນຄວາມສະຫງົບ ແມ່ນນັບມື້ເຕີບໃຫຍ່ຂະຫຍາຍຕົວປະກອບສ່ວນອັນໃຫຍ່ຫລວງເຂົ້າໃນການຕໍ່ສູ້ກູ້ຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍດີ.%

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446