ຂ່າວພາຍໃນປະເທດ

ຄະນະ​ຮັບຜິດຊອບ​ວຽກ​ງານ 3 ສ້າງ​ຕ້ອງ​ຄົ້ນຄວ້າ ກຳ​ແໜ້ນ​ມະຕິ​ຂອງ​ກົມ​ການ​ເມືອງ​ສູນ​ກາງ​ພັກ  

(ຂປລ) ປະຕິບັດ​ຕາມ​ມະຕິ​ຂອງ​ກົມ​ການ​ເມືອງ​ສູນ​ກາງ​ພັກ ວ່າ​ດ້ວຍ​ສ້າງ​ແຂວງ​ເປັນ​ຫົວໜ່ວຍ​ຍຸດ​ທະ​ສາດ, ສ້າງ​ເມືອງ​ເປັນ​ຫົວໜ່ວຍ​ເຂັ້ມ​ແຂງ​ຮອບດ້ານ ​ແລະ ສ້າງ​ບ້ານ​ເປັນ​ຫົວ ໜ່ວຍ​ພັດທະນາ. ​ໂດຍປະຕິບັດ​ມະຕິ​ຄຳ​ສັ່ງ​ຂອງ​ນາຍົກລັດຖະມົນຕີສະບັບ ​ເລກທີ 16/ນຍ, ລົງ​ວັນ​ທີ 15/6/2012 ​ແລະ ຄຳ​ສັ່ງ​ແນ​ະນຳ​ເພີ່ມ​ເຕີມ​ຂອງ​ຄະນະ​ເລຂາທິການ​ສູນ​ກາງ​ພັກ ​ເລກທີ 21/ ຄລສພ ລົງ​ວັນ​ທີ 7/8/2012, ອິງ​ຕາມ​ແຜນ​ດຳ​ເນີນ​ງານ​ຂອງ​ຄະນະ​ຮັບຜິດຊອບ​ເຮັດ​ທົດ​ລອງ​ຂັ້ນສູນ​ກາງ ​ເລກທີ 01/ຄລສພ ລົງ​ວັນ​ທີ 27/02/2012 ຄະນະ​ ຮັບຜິດຊອບ​ວ່າ​ດ້ວຍ 3 ສ້າງ​ໄດ້​ກະຊວງ​ຖະ​ແຫລ​ງຂ່າວ ວັດທະນະທຳ ​ແລະ ທ່ອງ​ທ່ຽວ​ ໄດ້ຈັດ​ກອງ​ປະຊຸມຂື້ນ​ໃນ​ວັນ​ທີ 18 ກັນຍາ 2012 ທີ່​ຫໍ​ວັດທະນະທຳແຫ່ງ​ຊາດ​ ນະຄອນຫລວງ​ວຽງ​ຈັນ​ ໂດຍ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ສຈ.ດຣ. ບໍ່​ແສງ​ຄຳ​ວົງ​ດາລາ ລັດຖະມົນຕີ​ວ່າ​ການ​ກະຊວງ ຖວທ, ມີ​ລັດຖະມົນຕີ​ຊ່ວຍ​ວ່າການ, ຫົວໜ້າ​ກົມ, ​ຮອງ​ ກົມອ້ອມ​ຂ້າງ​ກະຊວງ ​ແລະ ບັນດາ​ຫົວໜ້າ​ພະ​ແນ​ກ ຖວທ ຂອບ​ເຂດ​ທົ່ວ​ປະ​ເທດ​ເຂົ້າ​ຮ່ວມ.

ທ່ານ ສຈ.ດຣ. ບໍ່​ແສງ​ຄຳ​ ວົງ​ດາລາ ລັດຖະມົນຕີ​ວ່າ​ການ​ກະຊວງ ຖວທ ຂື້ນ​ກ່າວ​ຕໍ່​ກອງ​ປະຊຸມວ່າ: ​ເພື່ອ​ຈັດຕັ້ງປະຕິບັດ​ຕາມ​ມະຕິ​ຂອງ​ກົມ​ການ​ເມືອງ​ສູນ​ກາງ​ພັກວ່າ​ດ້ວຍ​ສ້າງ​ ແຂວງ ​ເປັນ​ຫົວໜ່ວຍ​ຍຸດ​ທະ​ສາດ, ສ້າງ​ເມືອງ​ເປັນ​ຫົວໜ່ວຍ​ເຂັ້ມ​ແຂງ​ຮອບດ້ານ ​ແລະ ສ້າງ​ບ້ານ​ເປັນ​ຫົວໜ່ວຍ​ພັດທະນາ ​ໃຫ້​ປະສົບ​ຜົນສຳ​ເລັດ. ​ເພື່ອ​ນຳ​ເອົາ​ມະຕິ ​ເລກທີ 03 ຂອງ​ກົມ​ການ​ເມືອງ​ສູນ​ກາງ​ພັກ​ເຂົ້າ​ສູ່​ການ​ຈັດຕັ້ງປະຕິບັດ​ຕົວ​ຈິງ ​ໃນ​ຂົງ​ເຂດ​ວຽກ​ງານ​ ຖວທ ທົດ​ລອງ​ປະຕິບັດ​ໃນ​ສົກ​ປີ 2012-2013 ​​ແລະ​ ສະຫລຸບ​ຕີ​ລາຄາ​ຖອດ​ຖອນ​ບົດຮຽນ ​ໃນ​ນີ້​ໄດ້​ມອບ​ວຽກ​ໃຫ້​ແຕ່ລະ​ຂະ​ແໜງ​ການ​ເພື່ອ​ຈັດຕັ້ງປະຕິບັດ ​ແລະ ​ໄດ້​ປະສານ​ສົມທົບ​ກັນ​ລະຫວ່າງ​ກະຊວງ​ກັບ​ແຂວງ,​ ເມືອງ. ກອງ​ປະຊຸມ​ຄັ້ງນີ້​ຈະ​ໄດ້​ແບ່ງ​ບາງ​ວຽກ​ງານ​ໃຫ້​ ແຂວງ​ຮັບຜິດຊອບສ້າງ​ແຂວງເປັນ​ຫົວໜ່ວຍ​ຍຸດ​ທະ​ສາດ​ໃຫ້​ໄດ້ ​ແລະ ​ໃຫ້​ແຂວງ​ແບ່ງ​ບາງ​ວຽກ​ໃຫ້​ເມືອງ​ເປັນ​ຫົວໜ່ວຍ​ເຂັ້ມ​ແຂວງ​ຮອບດ້ານ ​ເພື່ອ​ຊີ້​ນຳ​ໃຫ້​ບ້ານ​ມີ​ການ​ພັດທະນາ ສະນັ້ນ; ທິດ​ທາງ ​ແລະ ​ເປົ້າ​ໝາຍ​ຂອງ​ການ​ເຮັດ​ທົດ​ລອງ​ທາງ​ກະຊວງ​ໄດ້​ສຸມ​ໃສ່​ປະຕິບັດ​ພາລະ​ບົດບາດ​ຄຸ້ມ​ຄອງ​ມະຫາ​ພາກ​ເປັນຕົ້ນ​ຕໍ. ພ້ອມ​ກັນນັ້ນກໍ​ຫັນ​ເອົາ​ໂຄງການ​ວຽກ​ງານ, ຕຳ​ແໜ່​ງງານ-ວິຊາ​ການ ​ແລະ ຄວາມ​ຮັບຜິດຊອບ​ໄປ​ໃຫ້​ທ້ອງ​ຖິ່ນ, ​ເຮັດ​ໃຫ້​ວຽກ​ງານ ຖວທ ຢູ່​ທ້ອງ​ຖິ່ນ​ມີ​ຄວາມ​ເຂັ້ມ​ແຂງ​ຂື້ນ​ເທື່ອ​ລະ​ກ້າວ. ​ເສີມ​ຂະຫຍາຍ​ສິດ​ເປັນ​ເຈົ້າ ​ແລະ ຄວາມ​ຮັບຜິດຊອບ​ປະຕິບັດ​ພາລະ​ບົດບາດ​ຄຸ້ມ​ຄອງ​-ບໍລິຫານ ຕາມ​ການ​ມອບ​ໝາຍ​ຂອງ​ພັກ ​ແລະ ອົງການ​ປົກຄອງ​ທ້ອງ​ຖິ່ນກໍ​ຄື​ວຽກງານ​ຕາມ​ສາຍຕັ້ງ​ໃຫ້​ສຳ​ເລັດ​ຜົນ.​ ຈັດ​ສັນ​ເອົາ​ ບັນດາ​ໂຄງການ​ລົງທຶນ ​ແລະ​ ໜ້າ​ວຽກ​ຄຸ້ມ​ຄອງ​ບໍລິຫານ ​ເຂົ້າ​ມາ​ແຜນ​ພັດທະນາ​ຂະ​ແໜງ​ການ​ຢູ່ທ້ອງຖິ່ນ​ໃຫ້​ມີ​ປະສິດ​ທິຜົນ​ຂື້ນ​ກວ່າ​ເກົ່າ, ພ້ອມ​ກັນນັ້ນ; ກໍ​ສາມາດ​ຊ່ວຍ​ທ້ອງ​ຖິ່ນ ​ເສີມ​ຂະຫຍາຍ​ທ່າ​ແຮງ​ດ້ານ​ຊັບພະຍາກອນ​ທຳ​ມະ​ຊາດ​ ໃຫ້​ເອື້ອ​ອຳນວຍ​ຄວາມ​ສະດວກ ​ໃນ​ການ​ພັດທະນາ​ທ້ອງ​ຖິ່ນ​ຂອງ​ຕົນ ​ໃຫ້​ຂະຫຍາຍຕົວ​ນັມື້​ນັບ​ສູງ​ຂື້ນ. ສະນັ້ນ​ໄດ້​ຮຽກຮ້ອງ ​ໃຫ້​ຄະນະ​ຮັບຜິດຊອບ​ວຽກ​ງານ 3 ສ້າງ​ຕ້ອງ​ຄົ້ນຄວ້າ ກຳ​ແໜ້ນ​ມະຕິ​ຂອງ​ກົມ​ການ​ເມືອງ​ສູນ​ກາງ​ພັກ ​ແລະ ບັນດາ​ມະຕິ​ຄຳ​ສັ່ງ​ກ່ຽວ​ກັບ 3​ ສ້າງ​ໃຫ້​ເລີກ​ເຊິ່ງ. ປະຕິບັດ​ລະບອບ​ ປະຈຳການ ຕິດຕາມ​, ຊຸກ​ຍູ້, ກວດກາ​ແຕ່ລະ​ຂັ້ນຕອນ ​ແລະ ບາດກ້າວ​ປະຕິບັດ​ຢ່າງ​ຈົດຈໍ່ ມີ​ການ​ສະຫລຸບ​ລາຍ​ງານ ສ່ອງ​ແສງ​ສະພາບ​ການ​ໃຫ້​ຄະນະ​ຮັບຜິດຊອບ​ຂັ້ນຕ່າງໆ​ຕາມ​ລຳດັບ, ຈັດຕັ້ງປະຕິບັດ​ການ​ລົງ​ຮາກ​ຖານ​ເປັນ​ປົກ​ຄະຕິ ​ເພື່ອ​ຊຸກ​ຍູ້​ຕິດຕາມ​ສະພາບ​ຄວາມ​ຄືບໜ້າ ຂອງ​ໜ້າ​ວຽກ​ທີ່​ໄດ້​ແບ່ງ​​ໃຫ້​ທ້ອງ​ຖິ່ນ​ປະຕິບັດ ພ້ອມ​ທັງ​ຊອກ​ເຫັນ​ບັນຫາ​ທີ່​ບໍ່​ທັນ​ໄດ້​ປະຕິບັດ ​ເພື່ອ​ແກ້​ໄຂ​ທັນ​ເວລາ ​ແລະ ຄົ້ນຄວ້າ ​ແລະ ຕົກລົງ​ງົບປະມານ​ດັ່ງກ່າວ​ສະໜອງ​ໃຫ້​ທັນ​ເວລາ ​ເພື່ອ​ເຮັດ​ໃຫ້ການ​ຈັດຕັ້ງປະຕິບັດ​ວຽກ​ງານ​ນີ້​ໄດ້​ຢ່າງ​ສະດວກ​ດີ ​ແລະ ຕໍ່​ເນື່ອງ.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446