ຂ່າວພາຍໃນປະເທດ

ເຊີນເຂົ້າຮ່ວມປະກວດ ນາງສາວລາວ ປີ 2012

(ຂປລ): ຄະນະຮັບຜິດຊອບໂຄງການປະກວດນາງສາວລາວ, ໄດ້ເຊື້ອເຊີນບັນດາຍິງສາວ ທີ່ມີສັນຊາດລາວ ໃນທົ່ວປະເທດ ອາຍຸແຕ່ 18-26 ປີ ເຂົ້າຮັບສະໝັກປະກວດນາງສາວ ລາວ ປະຈຳປີ 2012 ຊຶ່ງໄດ້ກຳນົດເອົາ 4 ຈຸດເພື່ອຮັບສະໝັກ ຄື: ນະຄອນຫລວງວຽງຈັນ, ສະຫວັນນະເຂດ, ຈຳປາສັກ ແລະ ແຂວງຫລວງພະບາງ. ໂດຍນາງສາວລາວ ຜູ້ທີ່ ຈະໄດ້ເຂົ້າຮອບສຸດທ້າຍ ມີທັງໝົດ 20 ຄົນເທົ່ານນັ້ນ ແລະ ຈະມີການຄັດເລືອກເອັາຜູ້ທີ່ມີ ຮູບຮ່າງບຸກຄະລິກສະຫງ່າງາມ, ມີປະຫວັດການເຄື່ອນໄຫວດີ, ຫລີກເວັ້ນຜູ້ທີ່ມີພຶດ ຕິກຳບໍ່ດີ, ມີສຽງຕຳນິວິຈານ ແລະ ການສ່ອງແສງຈາກສັງຄົມ.

ທ່ານ ສີແພງ ວົງປັນຍາ, ຫົວໜ້າກົມວັດທະນະທຳມະຫາຊົນ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ຫົວໜ້າຄະນະຮັບຜິດຊອບ ໂຄງການປະກວດນາງສາວ ລາວ ປະຈຳປີ 2012 ໄດ້ແຫລງຂ່າວຕໍ່ສື່ມວນຊົນ ໃນວັນທີ 17 ກັນຍາ 2012 ນີ້ວ່າ: ການປະກວດຄັ້ງນີ້ ໄດ້ຈັດຂຶ້ນເປັນປີທີ 4. ໃນການຈັດປະກວດ 3 ຄັ້ງຜ່ານມາ ໄດ້ຮັບ ຜົນສຳເລັດເປັນຢ່າງດີ ອັນໄດ້ສ້າງຊື່ສຽງ ບົດບາດໃຫ້ແມ່ຍິງ-ໄວໜຸ່ມລາວ ໄດ້ປະຕິບັດໜ້າທີ່ບັນລຸຕາມຈຸດປະສົງ, ສ້າງຜົນປະໂຫຍດໃຫ້ແກ່ສັງຄົມ ແລະ ປະເທດຊາດ. ເຊັ່ນ ດຽວກັບຜູ້ທີ່ຈະໄດ້ຮັບຄັດເລືອກເປັນນາງສາວລາວປີນີ້ ກໍຈະໄດ້ເປັນຕົວແທນໃຫ້ຍິງສາວລາວ ເຮັດໜ້າທີ່ເຜີຍແຜ່ວັດທະນະທຳລາວ, ທັງເປັນແບບຢ່າງແກ່ຍິງໜຸມລາວ ໃນ ການປົກປັກຮັກສາຮີດຄອງປະເພນີອັນດີງາມຂອງຊາດ ຕໍ່ພາຍໃນ ແລະ ຕ່າງປະເທດ. ໂຄງການນີ້ ຍັງເປັນກິດຈະກຳໜຶ່ງທີ່ສ້າງສັນສັງຄົມ ຕາມແນວທາງສົ່ງເສີມຄວາມກ້າວໜ້າ ຂອງແມ່ຍິງລາວ ກໍຄື ການສ້າງທຸກເງື່ອນໄຂອຳນວຍໃຫ້ເອື້ອຍນ້ອງແມ່ຍິງ ໄດ້ປະກອບສ່ວນເຂົ້າໃນພາລະ ກິດປົກປັກຮັກສາ ແລະ ພັດທະນາປະເທດຊາດ ໃນເງື່ອນໄຂໃໝ່.

ທ່ານ ສີແພງ ວົງປັນຍາ ຍັງແຈ້ງອີກວ່າ: ງານປະກວດຄັ້ງນີ້ ຈະໄດ້ຈັດຂຶ້ນໃນວັນທີ 7 ທັນວາ 2012, ສະນັ້ນ ຈຶ່ງຂໍເຊີນຊວນຍິງສາວລາວ ທີ່ມີເງື່ອນໄຂທົ່ວປະເທດ ເຂົ້າຮ່ວມ ງານຢ່າງກວ້າວຂວາງ. ສຳລັບລາງວັນຜູ້ໄດ້ຮັບຕຳແໜ່ງ ນາງສາວລາວປີ 2012 ຈະໄດ້ຮັບລົດເກ໋ງ ປະຈຳຕຳແໜ່ງ ຍີ່ຫໍ້ສະປາກ ຈາກ ບໍລິສັດ ເຊັບໂລ ເລບ-ລາວ ຈຳກັດ 1 ຄັນ, ພ້ອມ ເງິນສົດ 50 ລ້ານກີບ, ມົງກຸດເພັດປະຈຳຕຳແໜ່ງ ມູນຄ່າ 25 ລ້ານກີບ, ທຶນການສຶກສາປະປະລິນຍາໂທ 2 ປີ ທີ່ວິທະຍາໄລຄອມເຊັນເຕີ, ຊຸດປະດັບຄຳ 3 ບາດ ແລະ ຍັງມີ ລາງວັນອີກຫລາກຫລາຍ. ຮອງອັນດັບ 1 ຈະໄດ້ຮັບຂອງລາງວັນ ມູນຄ່າ 20 ລ້ານກີບ ພ້ອມສາຍສະພາຍ ແລະ ດອກໄມ້ກຽດຕິຍົດ. ຮອງອັນດັບ 2 ຈະໄດ້ຮັບຂອງລາງວັນ ມູນຄ່າ 15 ລ້ານກີບ, ພ້ອມສາຍສະພາຍ ແລະ ດອກໄມ້ກຽດຕິຍົດ. ຮອງອັນດັບ 3 ຈະໄດ້ຮັບຂອງລາງວັນ ມູນຄ່າ 10 ລ້ານກີບ, ພ້ອມສາຍສະພາຍ ແລະ ດອກໄມ້ ແລະ ຂອງທີ່ລະນຶກ. ສ່ວນລາງວັນຂັວນໃຈມວນຊົນ ຈະໄດ້ຮັບຂອງລາງວັນມູນຄ່າ 5 ລ້ານກີບ, ພ້ອມສາຍສະພາຍ ແລະ ດອກໄມ້ກຽດຕິຍົດ. ລາງວັນຂວັນໃຈຊ່າງພາບ ຈະໄດ້ຮັບ ຂອງລາງວັນ ມູນຄ່າ 5 ລ້ານກີບ, ພ້ອມສາຍສະພາຍ ແລະ ດອກໄມ້ກຽດຕິຍົດ. ຂັວນໃຈມິດຕະພາບ ຈະໄດ້ຮັບຂອງລາງວັນ ມູນຄ່າ 5 ລ້ານກີບ, ພ້ອມສາຍສະພາຍ ແລະ ດອກໄມ້ກຽດຕິຍົດ ແລະ ນາງສາວຜິວໃສ ສຸຂະພາບດີ ຈະໄດ້ຮັບຂອງລາງວັນມູນຄ່າ 5 ລ້ານກີບ, ພ້ອມສາຍສະພາຍ ແລະ ດອກໄມ້ກຽດຕິຍົດ. ຈາກຜະລິດຕະພັນນ້ຳດື່ມກາ ຫົວເສືອ ບໍລິສັດເບຍລາວ ຈຳກັດ./.

ກັບສາລະບານ

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446