ຂ່າວພາຍໃນປະເທດ

ຜະລິດຕະພັນກົນຈັກໜັກ ນິວຮອນແລນ ມີຂາຍຢູ່ລາວແລ້ວ

(ຂປລ): ບໍລິສັດ ເຄພີ ຈຳກັດ ໄດ້ຈັດງານເປີດໂຕ ລົດຕັກໜ້າຂຸດຫລັງ ນິວຮອນແລນ ໃໝ່ ລຸ້ນ ບີ 90 ບີ ໃນວັນທີ 3 ກັນຍາ 2012 ທີ່ສູບູໂດລາວ-ຍີ່ປຸ່ນ, ນະຄອນຫລວງວຽງ ຈັນ. ໂດຍມີທ່ານ ເຂັມຊາດ ພິລາພັນ​ເດດປະທານ ບໍລິສັດ ເຄພີ ຈຳກັດ, ມີຜູ້ຈັດການໃຫຍ່ ນິວຮອນແລນ ປະຈຳປະ​ເທດສິງກະໂປ, ປະທານທີ່ປຶກສາ ບໍລິສັດ ເຄພີ ຈຳກັດ ພ້ອມດ້ວຍບັນດາບໍລິສັດຕ່າງໆໃນນະຄອນຫລວງເຂົ້າຮ່ວມ.

ທ່ານ ຄຳບໍ ສີປະເສີດ ຫົວໜ້າຝ່າຍຂາຍ ນິວຮອນແລນ ປະຈຳລາວ ໄດ້ໃຫ້ຮູ້ວ່າ: ລົດຕັກໜ້າຂຸດຫລັງ ນິວຮອນແລນ ລຸ້ນ ບີ 90 ບີ ມີກຳລັງແຮງ ຂອງເຄື່ອງ 97 ແຮງມ້າ ທີ່ 2,200 ຮອບ/ນາທີ ແລະ ມີແຮງບິດສູງສຸດ 400 ນິວຕັນ-ຕາແມັດ, ລະບົບເກຍແບບແມນນວນ Power shuttle ດ້ານໜ້າ 4 ເກຍ/ຖອຍຫລັງ 4 ເກຍ ສາມາດບັງຄັບ ໄດ້ທັງສອງລໍ້ ແລະ 4 ລໍ້. ເຊິ່ງສາມາດນຳໃຊ້ເຂົ້າ ໃນຫລາກຫລາຍວຽກງານ ເປັນຕົ້ນແມ່ນ ວຽກງານຂົວ ທາງ-ຊົນລະ ປະທານ, ກະສີກຳການກະເສດ, ວຽກງານກໍ່ສ້າງ ແລະ ອື່ນໆ, ລົດດັ່ງກ່າວ ມີຈຸດເດັ່ນຄື ຫ້ອງຂັບໄດ້ຮັບການ ຕິດຕັ້ງຈາກໂຮງງານຜູ້ຜະລິດທີ່ໄດ້ມາດຕະຖານ ມີຄວາມປອດໄພ ROPS (ເມື່ອເກີດການພິກຄວ່ຳ) ແລະ FOPS (ເກີດມີວັດຖຸຕົກໃສ່ຫ້ອງຂັບ), ພາຍໃນຫ້ອງຂັບຖືກອອກແບບເພື່ອຄວາມສະດວກສະບາຍສູງສຸດໃນການປະຕິບັດງານ, ຊຸດ ແລະ ແຝງຄວບຄຸມອຸປະກອນທັງໝົດໃຊ້ງານໄດ້ງ່າຍ ແລະ ມີປະສິດທິພາບ./.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446