ຂ່າວພາຍໃນປະເທດ

ກອງປະຊຸມ ຄະນະກຳມະການແມ່ຍິງ ອາຊຽນ ຄັ້ງທີ XI ຫາລືການສົ່ງເສີມບົດບາດຍິງ - ຊາຍແລະການເປັນຄູ່ຮ່ວມເພື່ອສິ່ງແວດລ້ອມທີ່ຍືນຍົງ

 

* ກອງປະຊຸມ ຄະນະກຳມະການແມ່ຍິງ ອາຊຽນ ຄັ້ງທີ XI (ASEAN Committee on Women 11 th) ໃນວັນທີ 16-17 ຕຸລາ ນີ້ຢູ່ໂຮງແຮມ ລາວພລາຊາ ພາຍໃຕ້ຫົວຂໍ້ “ ການສົ່ງເສີມບົດບາດຍິງ - ຊາຍ ແລະ ການເປັນຄູ່ຮ່ວມມືຂອງແມ່ຍິງອາຊຽນ ເພື່ອສິ່ງແວດລ້ອມແບບຍືນຍົງ ” (Enhancing Gender Perspective and ASEAN Women’s Partnership in Environmental Sustainability) ໂດຍການເປັນປະທານຂອງທ່ານ ບັນດິດ ປະທຸມວັນ ຮອງປະທານສູນກາງສະຫະພັນ ແມ່ຍິງລາວ , ທ່ານ ນາງ ເມກາ ໄອຣີນາ ຜູ້ຊ່ວຍຫົວໜ້າກົມປະຊາຄົມສັງຄົມ - ວັດທະນະທຳ ອາຊຽນ ທັງເປັນເລຂາ ອາຊຽນ , ມີຄະນະຜູ້ແທນຂັ້ນສູງແມ່ຍິງບັນດາປະເທດອາຊຽນ 10 ປະເທດ ເຂົ້າຮ່ວມ 60 ທ່ານ .

ກອງປະຊຸມ ໄດ້ທົບທວນຄືນການຈັດຕັ້ງແຜນປະຕິບັດງານແມ່ຍິງອາຊຽນ 2011-2015, ແຜນ ການສ້າງປະຊາຄົມອາຊຽນດ້ານເສດຖະກິດ-ສັງຄົມທີ່ພົວພັນເຖິງແມ່ຍິງ, ທົບ ທວນຄືນການຈັດຕັ້ງປະຕິ ບັດບັນດາວຽກງານທີ່ຮັບຮອງເອົາຢູ່ໃນກອງປະຊຸມຄະນະກຳມະການແມ່ຍິງອາຊຽນ ຄັ້ງທີ X ຢູ່ ບໍກຣໍ ປະເທດ ອິນໂດເນເຊຍ ໃນປີຜ່ານມາ. ໃນ ກອງປະຊຸມ, ບັນດາຕົວແທນແມ່ຍິງແຕ່ລະປະເທດ ໄດ້ປະກອບ ຄຳຄິດຄຳເຫັນຕໍ່ການຈັດຕັ້ງປະຕິບັດວຽກງານຂອງຄະນະກຳມະການແມ່ຍິງອາຊຽນສຳລັບປີ 2011- 2015 ໂດຍ ສະເພາະບັນຫາສິ່ງແວດລ້ອມ, ການຫລຸດຜ່ອນຄວາມແຕກໂຕນລະຫວ່າງຍິງ-ຊາຍ ໃນທຸກຂົງເຂດ, ການຫລຸດຜ່ອນຄວາມທຸກຍາກ, ການສົ່ງເສີມບົດບາດແມ່ຍິງ ທີ່ພົວ ພັນເຖິງການສ້າງຄວາມເຂັ້ມ ແຂງໃຫ້ແກ່ແມ່ຍິງ. ໂອກາດດັ່ງກ່າວ, ຕາງໜ້າສະຫະພັນແມ່ຍິງລາວ ໄດ້ນຳສະເໜີຜົນຂອງການຈັດຕັ້ງປະຕິບັດບົດບາດຍິງ-ຊາຍ ຕໍ່ການປົກ ປັກຮັກສາສິ່ງແວດລ້ອມຕາມຫົວຂໍ້ກອງປະຊຸມ ເພາະປັດຈຸບັນ ການ ຮ່ວມມືເພື່ອປົກປັກຮັກສາສິ່ງແວດລ້ອມເປັນບັນຫາສຳຄັນຢູ່ບັນດາປະເທດອາຊຽນ ກໍຄືຢູ່ໃນໂລກ. ສະນັ້ນ, ແມ່ຍິງບັນດາປະເທດ ອາຊຽນ ຈຶ່ງຄວນສ້າງຄວາມສາມາດໃຫ້ແກ່ແມ່ຍິງ ແລະ ຊຸກຍູ້ທັງຍິງ-ຊາຍ ປະກອບສ່ວນ ປົກປັກຮັກສາສິ່ງແວດລ້ອມ ເຊິ່ງມັນເປັນສາເຫດໜຶ່ງໃນ ຫລາຍສາເຫດທີ່ພາໃຫ້ເກີດການປ່ຽນແປງດິນຟ້າອາກາດ ແລະ ໄພພິບັດຕ່າງໆທີ່ເປັນຜົນກະທົບ ແລະ ສ້າງຄວາມເສຍຫາຍຕໍ່ຊີວິດ ແລະ ຊັບສິນຂອງປະຊາຊົນ ເປັນຈຳນວນ ມະ ຫາສານ .

ບັນດາການນຳແມ່ຍິງຂອງແຕ່ລະປະເທດ ຍັງໄດ້ຄົ້ນຄວ້າປະກອບຄຳເຫັນໃສ່ຮ່າງເນື້ອໃນພື້ນຖານ ເພື່ອເຮັດໃຫ້ການນຳຂັ້ນສູງຂອງແຕ່ລະປະເທດ ພິຈາລະນາ ແລະ ຮັບຮອງ ເອົາ ບັນດາເນື້ອໃນສຳຄັນໃນ ການຮ່ວມມມື ພັດທະນາແມ່ຍິງໃນ ອາຊຽນ ແລະ ຖະແຫລງການວຽງຈັນກ່ຽວກັບການສົ່ງເສີມບົດບາດ ຍິງ-ຊາຍ ແລະ ການເປັນ ຄູ່ຮ່ວມ ມື ຂອງແມ່ ຍິງອາຊຽນ ເພື່ອສິ່ງແວດລ້ອມແບບຍືນຍົງເພື່ອສະເໜີຕໍ່ກອງປະຊຸມລັດຖະມົນຕີອາຊຽນຮັບຜິດຊອບວຽກງານແມ່ຍິງຄັ້ງທີ I ທີ່ຈະຈັດຂຶ້ນໃນວັນທີ 19 ຕຸລານີ້. ນອກນີ້ ໃນກອງປະຊຸມ ຍັງປຶກສາຫາລືບັນຫາຕ່າງໆທີ່ພົວພັນເຖິງການພັດທະນາແມ່ຍິງ ເພື່ອຄວາມເປັນເອກະ ພາບ ແລະ ນຳສະເໜີຕໍ່ກອງປະຊຸມຄະນະກຳມະການແມ່ຍິງອາຊຽນ +3 ຄັ້ງທີ 4 ຕື່ມອີກ .

ບັນດາປະເທດສະມາຊິກອາຊຽນ ໄດ້ນຳສະເໜີແຜນວຽກ, ກິດຈະກຳ ທີ່ນອນໃນແຜນວຽກຂອງຄະ ນະກຳມະການແມ່ຍິງອາຊຽນ 2011-2015, ມີ 21 ໂຄງການ ແລະ 1 ໃນນັ້ນ , ລາວ ໄດ້ຮັບຜິດຊອບຫົວຂໍ້ ລຶບລ້າງຄວາມສ່ຽງ ແລະ ຜົນກະທົບຂອງເອດສ ແລະ ໄດ້ຈັດກອງປະຊຸມບັນຫາດັ່ງກ່າວໃນວັນທີ 24-25 ກັນຍາ 2012 ຢູ່ ແຂວງ ຫລວງພະບາງ ໂດຍການເຂົ້າຮ່ວມຂອງຄະນະຜູ້ແທນ 10 ປະເທດ ອາຊຽນ

ທ່ານນາງ ບັນດິດ ປະທຸມມະວົງ ກ່າວວ່າ : ຫົວຂໍ້ຫລັກທີ່ນຳມາປຶກສາຫາລືໃນກອງປະຊຸມນີ້ມີຄວາມ ສຳຄັນ ແລະ ຖືກຕາມສະພາບການຕົວຈິງ . ດ້ວຍເຫດ ນີ້ຈິ່ງ ຮຽກ ຮ້ອງ ສະມາ ຊິກທຸກທ່ານຈົ່ງຮ່ວມມືກັນ ປະ ກອບຄຳຄິດຄຳເຫັນ ແລະ ວິທີການແກ້ໄຂ ເພື່ອເຮັດໃຫ້ແມ່ຍິງມີບົດບາດ ແລະ ມີສ່ວນຮ່ວມແກ້ໄຂບັນ ຫາທີ່ເກີດຂຶ້ນໃນ ສັງຄົມ ໃຫ້ນັບ ມື້ນັບ ຫລາຍຂຶ້ນ .

 

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446