ຂ່າວພາຍໃນປະເທດ

ເປີດວາງສະແດງສິນຄ້າຫັດຖະກຳ ຮັບໃຊ້ອາແຊັບ 7

(ຂປລ): ທ່ານ ສຈ ດຣ ບໍ່ແສງຄຳ ວົງດາລາ, ລັດຖະມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ຕາງໜ້າ​ໃຫ້​ຄະນະ​ກຳມະການ​ຊີ້ນຳ​ລະດັບ​ຊາດ ກໍ​ຄື​ ອະ​ນຸກຳມະການ​ໂຄສະນາ​ຂ່າວສານ ສິລະ​ປະ​ທ່ອງ​ທ່ຽວ ​ແລະ ປະດັບ​ປະດາ ​ເພື່ອ​ກະກຽມ​ໃຫ້​ແກ່​ກອງ​ປະຊຸມ​ການ​ເປັນ​ຄູ່​ຮ່ວມ​ລັດຖະສະພາ​ອາຊີ-​ເອີຣົບ ຄັ້ງທີ 7 ໄດ້ເຂົ້າຮ່ວມ ແລະ ກ່າວເປີດງານວາງສະແດງສິນຄ້າຫັດຖະກຳ ຮັບໃຊ້ກອງປະຊຸມ ອາແຊັບ 7 ໃນວັນທີ 2 ຕຸລາ 2012 ທີ່ໂຮງແຮມດອນຈັນພາເລດ, ນະຄອນຫລວງວຽງຈັນ ແລະ ມີພາກ ສ່ວນກ່ຽວຂ້ອງ​ເຂົ້າຮ່ວມ.

ທ່ານ ສຈ ດຣ ບໍ່ແສງຄຳ ວົງດາລາ, ໄດ້ກ່າວເຖິງຈຸດປະສົງຂອງ ງານວາງສະແດງສິນຄ້າຫັດຖະກຳໃນຄັ້ງນີ້ ກໍເພື່ອເປັນການເຜີຍແຜ່ສິນຄ້າຂອງຄົນລາວ ອອກສູ່ສາຍຕາ ຂອງ ບັນດາຄະນະ ຜູ້ແທນເຂົ້າຮ່ວມກອງປະຊຸມທີ່ມາຈາກ ພາກພື້ນອາຊີ-ເອີຣົບ ໄດ້ເບິ່ງໄດ້ຊົມ. ພ້ອມກັນນີ້ ຍັງເປັນການ ປະກອບສ່ວນຊຸກຍູ້ກອງປະຊຸມການເປັນຄູ່ຮ່ວມລັດຖະ ສະພາອາຊີ-ເອີຣົບ ໃນຄັ້ງນີ້ ໃຫ້ມີບັນຍາກາດດີຂຶ້ນ.

ສຳລັບສິນຄ້າທີ່ນຳມາວາງສະແດງໃນຄັ້ງນີ້ ປະກອບມີ ຮ້ານກາເຟສີນຸກ, ກາເຟດາວເຮືອງ, ເບຍລາວ, ບັນດາຮ້ານຫັດຖະກຳຜ້າ​ໃໝລາວ, ຫັດຖະກຳຈັກ-ສານ, ຮ້ານເຄື່ອງເງິນ-ຄຳ ທີ່ເປັນສີໄມ້ລາຍມື ທັງແມ່ນຫົວຄິດປະດິດສ້າງຂອງບັນດານັກທຸລະກິດລາວເຮົາ ໄດ້ປະດິດສ້າງຂຶ້ນ.

ນອກຈາກນີ້ ຍັງໄດ້ມີການວາງສະແດງ ຮູບພາບ, ສາຍວີດີໂອ ກ່ຽວກັບຜົນຮ້າຍຂອງລະເບີດທີ່ຕົກຄ້າງຢູ່ ສປປ ລາວ ສະ​​ໄໝສົງຄາມ ໂດຍຈະໄດ້ວາງສະແດງແຕ່ວັນທີ 02-05 ຕຸລາ 2012./.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446