ຂ່າວພາຍໃນປະເທດ

ກະຊວງວິທະຍາສາດ-ເຕັກໂນໂລຊີ ເຊື່ອມຊຶມກົດລະບຽບພັກ ສະໄໝທີ IX

*(ຂປລ) ຄະນະພັກກະຊວງວິທະຍາສາດ ແລະ ເຕັກໂນໂລຊີ ຈັດກອງປະຊຸມເຊື່ອມຊຶມກົດລະບຽບ ຂອງພັກປະຊາຊົນປະຕິວັດລາວ ສະໄໝທີ IX ໃນວັນທີ 30 ພຶດສະພາ 2012 ທີ່ກະຊວງວິທະຍາສາດ ແລະ ເຕັກໂນໂລຊີ. ພາຍໃຕ້ການເປັນປະທານຂອງ ສະຫາຍ ບຸນຕີ ທະມິດ, ຄະນະພັກ, ຫົວໜ້າກົມຈັດຕັ້ງ ແລະ ພະນັກງານກະຊວງວິທະຍາສາດ ແລະ ເຕັກໂນໂລຊີ, ມີບັນດາສະມາຊິກພັກພາຍໃນກະຊວງເຂົ້າຮ່ວມ.

ສະຫາຍ ບຸນຕີ ທະມິດ, ຄະນະພັກ, ຫົວໜ້າກົມຈັດຕັ້ງ ແລະ ພະນັກງານກະຊວງວິທະຍາສາດ ແລະ ເຕັກໂນໂລຊີ ໄດ້ຂຶ້ນສະເໜີກົດລະບຽບຂອງ ພັກປະຊາຊົນ ປະຕິວັດລາວ ທີ່ຜ່ານໃນກອງປະຊຸມໃຫຍ່ຜູ້ແທນ ທົ່ວປະເທດຄັ້ງທີ IX ຂອງພັກ ແຕ່ວັນທີ 17-21 ມີນາ 2011 ແລະ ມີຜົນບັງຄັບໃຊ້ແຕ່ວັນທີ 1 ພຶດສະພາ 2011 ເປັນຕົ້ນໄປ, ຊຶ່ງກົດລະບຽບດັ່ງກ່າວ ມີທັງໝົດ 12 ໝວດ 51 ມາດຕາ. ໃນນັ້ນ ໝວດທີ I ກ່ຽວກັບສະມາຊິກພັກ; ໝວດທີ II ຫລັກການຈັດຕັ້ງ ແລະ ລະ ບົບສາຍ​ໃຍການຈັດຕັ້ງຂອງພັກ; ໝວດທີ III ການຈັດຕັ້ງຂອງ ພັກຢູ່ຂັ້ນສູນກາງ; ໝວດທີ IV ອົງການຈັດຕັ້ງພັກຢູ່ຂັ້ນທ້ອງຖິ່ນ; ໝວດທີ V ການຈັດຕັ້ງ ຮາກຖານພັກ; ໝວດທີ VI ພັກນຳພາລັດ, ແນວລາວສ້າງຊາດ, ບັນດາອົງການຈັດຕັ້ງມະຫາຊົນ ແລະ ອົງການຈັດຕັ້ງສັງ ຄົມ; ໝວດທີ VII ພັກນຳພາຄະນະ ຊາວໜຸ່ມປະຊາຊົນປະຕິວັດລາວ; ໝວດທີ VIII ພັກນຳພາກຳລັງປ້ອງກັນ ຊາດ-ປ້ອງກັນຄວາມສະຫງົບປະຊາຊົນ; ໝວດທີ IX ວຽກງານຕິດຕາມ, ກວດກາພັກ ແລະ ຄະນະກວດກາພັກ ແຕ່ລະຂັ້ນ; ໝວດທີ X ວ່າດ້ວຍການຍ້ອງຍໍ ແລະ ວິ​ໄນຂອງພັກ; ໝວດທີ XI ການເງິນຂອງພັກ ແລະ ໝວດທີ XII ການຈັດຕັ້ງປະຕິບັດ ແລະ ການປ່ຽນແປງກົດລະບຽບຂອງພັກ.

ພັກປະຊາຊົນປະຕິວັດລາວ ສືບທອດພາລະກິດຂອງພັກກອມມູນິດອິນດູຈີນ, ຊຶ່ງແມ່ນປະທານໄກສອນ ພົມວິຫານ ເປັນຫລັກແຫລ່ງໃນການນຳພາກໍ່ສ້າງ, ພັກໄດ້ນຳພາປະຊາຊົນລາວບັນດາເຜົ່າດຳເນີນການປະຕິວັດຊາດ ປະຊາທິປະໄຕ ເຮັດສຳເລັດພາລະກິດປົດປ່ອຍຊາດ, ລົບລ້າງລະບອບລ່າເມືອງຂຶ້ນ ແລະ ສັກດິນາ, ສະຖາປະນາ ສາທາລະນະລັດ ປະຊາທິປະໄຕ ປະຊາຊົນຂຶ້ນ. ພັກສືບຕໍ່ນຳພາປະຊາຊົນລາວ ປະຕິບັດສອງໜ້າ ທີ່ຍຸດທະສາດ ປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງປ່ຽນແປງໃໝ່ຂອງພັກ ເຮັດໃຫ້ປະເທດຊາດ ມີບາດກ້າວຂະຫຍາຍຕົວໃໝ່, ສິດເປັນເຈົ້າຂອງປະຊາ ຊົນລາວ ບັນດາເຜົ່າໄດ້ຮັບການ ເປີດກວ້າງ, ຄວາມສາມັກຄີ​ເປັນເອກະພາບທົ່ວປວງຊົນລາວທັງຊາດ ນັບມື້ໄດ້ຮັບການປັບປຸງດີຂຶ້ນ, ທີ່ຕັ້ງ ແລະ ບົດບາດ ອິດທິພົນ ຂອງປະເທດຊາດ ບົນເວທີສາກົນໄດ້ຮັບການເຊີດຊູສູງຂຶ້ນ. ພັກປະຊາຊົນປະຕິວັດລາວ ແມ່ນກອງນຳໜ້າທີ່ມີການຈັດຕັ້ງ, ເປັນອົງການຈັດຕັ້ງການ ເມືອງສູງສຸດ ຂອງຊົນຊັ້ນກຳມະກອນລາວ ເປັນຕົວແທນທີ່ຈົງຮັກພັກດີຕໍ່ສິດຜົນປະໂຫຍດຂອງຊົນຊັ້ນກຳມະກອນ ຊາວຜູ້ອອກແຮງງານທີ່ຮັກຊາດ ແລະ ຂອງຊາດລາວ ທັງໝົດ./.

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446