ຂ່າວພາຍໃນປະເທດ

ຄວາມຄືບໜ້າໂຄງການກໍ່ສ້າງເສັ້ນທາງເມືອງຫຼວງນ້ຳທາ-ເມືອງນາແລ

(ຂປລ): ທ່ານ ຄຳຜາຍ ຫົວໜ້າບໍລິສັດໄຊພະຈັນ ກໍ່ສ້າງຈຳກັດ ໃຫ້ຮູ້ໃນວັນທີ 1 ມີນາ 2012 ວ່າ: ໂຄງການກໍ່ສ້າງເສັ້ນທາງແຕ່ເມືອງຫຼວງນ້ຳທາ ຫາ ເມືອງນາ ແລ ແຂວງຫຼວງນ້ຳທາ ມີຄວາມຍາວ 66 ກວ່າກິໂລແມັດ, ກວ້າງ 8 ແມັດ, ຍົກລະດັບໜ້າທາງ, ປູຫີນ ລວມມູນຄ່າທັງໝົດ 68 ຕື້ 8 ຮ້ອຍລ້ານກີບ, ເຊິ່ງເປັນ ງົບປະມານຂອງລັດຖະບານ 100% ໂດຍແມ່ນບໍລິສັດໄຊພະຈັນ ກໍ່ສ້າງຈຳກັດເປັນຜູ້ຮັບເໝົາ, ເລີ່ມກໍ່ສ້າງແຕ່ວັນທີ 28 ພະຈິກ 2011 ມາຮອດ ປະຈຸບັນ ໄດ້ສຳເລັດພຽງ 13 ກິໂລແມັດ ເທົ່າກັບ 9% ຂອງໜ້າວຽກ ແລະ ຄາດວ່າຈະໃຫ້ສຳເລັດພາຍໃນປີ 2014.

ທ່ານຍັງໃຫ້ຮູ້ຕື່ມວ່າ:ໂຄງການຍົກລະດັບເສັ້ນທາງຂອບເມືອງຫຼວງນ້ຳທາ ແລະ ເສັ້ນ ທາງພາຍໃນເທດສະບານແຂວງ ມີຄວາມຍາວ 13.217 ແມັດ, ໜ້າທາງ ກວ້າງ 6 ແມັດ, ປູຢາງ 1 ຊັ້ນມີ ຄວາມຍາວ 4.400 ແມັດ ແລະ ປູຢາງ 2 ຊັ້ນ 8.800 ແມັດ,ມູນຄ່າການກໍ່ສ້າງທັງໝົດ 21 ຕື້ 6 ຮ້ອຍລ້ານກີບ. ເລີ່ມກໍ່ສ້າງ ມາແຕ່ວັນທີ 2 ກຸມພາ 2011 ມາຮອດປະຈຸບັນໄດ້ສຳເລັດ 65% ຂອງໜ້າວຽກ ແລະ ຄາດວ່າການກໍ່ສ້າງຈະໃຫ້ສຳເລັດພາຍໃນເດືອນເມສາ 2012ນີ້./.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446