ຂ່າວພາຍໃນປະເທດ

ຊາວໜຸ່ມລາວ-ຈີນສືບຕໍ່ເພີ່ມທະວີການພົວພັນຮ່ວມມືກັນ

(ຂປລ) ທ່ານ ດຣ ຄຳຜາ ພິມມະສອນ, ຮອງເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ ແລະ ຄະນະ ໄດ້ຕ້ອນຮັບ ແລະ ພົບປະກັບ ທ່ານ ນາງ ຫລູ ເມ໋ຍ, ຮອງຄະນະບໍລິຫານງານຊາວ ໜຸ່ມກອມມູນິດຈີນ ແລະ ຄະນະໃນວັນທີ 2 ມີນາ 2012 ນີ້ ຢູ່ທີ່ໂຮງແຮມລາວພລາຊາ, ນະຄອນ ຫລວງວຽງຈັນ ເນື່ອງໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຕາມຄຳເຊີນຂອງຄະນະ ບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ແຕ່ວັນທີ 1-4 ມິນາ 2012ນີ້

ການພົບປະໃນຄັ້ງນີ້ ສອງຝ່າຍໄດ້ເຫັນດີເປັນເອກະພາບ ໃນການສືບຕໍ່ສຶກສາ ອົບຮົມຊາວໜຸ່ມ-ເຍົາວະຊົນສອງຊາດ ລາວ-ຈີນ ໄດ້ຮັບຮູ້ເຂົ້າໃຈຢ່າງຖືກ ຕ້ອງກ່ຽວກັບມິດຕະພາບ ແລະ ການພົວພັນຮ່ວມມືລາວ-ຈີນ ໂດຍສະເພາະໃນ ທິດຄູ່ຮ່ວມມືຍຸດທະສາດຮອບດ້ານ, ເຫັນມີໃຫ້ມີການ ເພີ່ມທະວີ ການແລກ ປ່ຽນຂໍ້ມູນຂ່າວສານ ຊຶ່ງກັນ ແລະ ກັນ ເພື່ອສົ່ງເສີມໃຫ້ແກ່ການພົວພັນ ຂອງອົງການຊາວໜຸ່ມສອງປະເທດ, ແລກປ່ຽນທາງດ້ານວິທະຍາສາດ ແລະ ວັດທະ ນະທຳ ອັນດີງາມຂອງສອງປະເທດ, ລວມທັງການສົ່ງເສີມການຮ່ວມມືກັນລະຫວ່າງນັກທຸລະກິດຊາວໜຸ່ມສອງປະເທດ, ຊຸກຍູ້ການສ້າງສູນມິດຕະພາບຊາວ ໜຸ່ມລາວ-ຈີນ ຢູ່ ສປປ ລາວ, ພ້ອມນີ້ຝ່າຍຈີນ ຍິນດີເຊື້ອເຊີນທ່ານ ເລຂາຄະນະບໍລິຫານງານສູນກາງ ຊປປ ລາວ ພ້ອມດ້ວຍຄະນະ ໄປຢ້ຽມຢາມ ຢ່າງເປັນທາງການ ໃນປີ 2012 ນີ້ ເພື່ອລົງນາມບົດບັນທຶກຊ່ວຍຈຳ ລະຫວ່າງອົງການຊາວໜຸ່ມສອງປະເທດ ສົກປີ 2012-2014, ຊຸກຍູ້ອາສາສະໜັກຊາວ ໜຸ່ມ ນະຄອນຊຽງໄຮ້, ແຂວງຢຸນນານ ແລະ ແຂວງອື່ນໆ ເພື່ອມາປະຕິບັດໜ້າທີ່ຢູ່ລາວ, ຝ່າຍຈີນຍິນດີຄົ້ນຄ້ວາຄວາມ ເປັນໄປໄດ້ໃນການຊ່ວຍເຫລືອລ້າ ຕໍ່ອົງການຊາວໜຸ່ມລາວ, ທັງຊຸກຍູ້ພາກສ່ວນຕ່າງໆຂອງຕົນ, ເພື່ອໃຫ້ການຊ່ວຍເຫລືອແກ່ອົງການຊາວໜຸ່ມຂອງລາວ, ບົນພື້ນຖານທີ່ໄດ້ໃຫ້ທຶນໄປຝຶກອົບຮົມ ທິດສະດີຊາວໜຸ່ມ-ເຍົາ ວະຊົນຢູ່ ສປ ຈີນ, ຈຳນວນ 40 ທຶນ ແລະ ໃຫ້ທຶນໄປທັດສະນະສຶກສາຢູ່ ສປ ຈີນ 30 ທຶນ ຕໍ່ປີ, ຝ່າຍຈີນຈະເພີ່ມທຶນ ຕາມຈຳ ນວນທີ່ເໝາະສົມ, ເຫັນດີ ຊຸກຍູ້ໃຫ້ທຶນ ຊື້ອຸປະກອນກອງດຸລິຍາງຂອງເຍົາວະຊົນ ໃຫ້ແກ່ສູນກາງຊາວໜຸ່ມປະຊາ ຊົນ ປະຕິວັດລາວ ຈຳນວນ 200.000 ຢວນ (ປະມານ 250 ລ້ານ​ກີບ), ຄະນະເຈົ້າໜ້າທີ່ອາວຸໂສ ຈາກສູນກາງ ຊາວໜຸ່ມ ກອມມູນິດຈີນໄດ້ມາເຄື່ອນ ໄຫວຢ້ຽມຢາມເຮັດວຽກຢູ່ ສປປ ລາວ, ໂດຍຈະໄດ້ຄົ້ນຄວ້າ ໃຫ້ພາກສ່ວນ ທີ່ກ່ຽວຂ້ອງຂອງຈີນເພື່ອຊ່ວຍເຫລືອລົດຕູ້ໃໝ່ ແລະ ລົດຈັກໄຟຟ້າຕາມຈຳນວນທີ່ເໝາະສົມ, ໂດຍອີງຕາມທີ່ ສະຫາຍ ລູ້ຜິງ, ຮອງເລຂາຄະນະຊາວໜຸ່ມ ກອມມູນິດຈີນ, ແຂວງຢຸນນານ ທີ່ໄດ້ມາ ຢ້ຽມຢາມເຮັດວຽກຢູ່ ສປປ ລາວ ໃນລະຫວ່າງວັນທີ 19-24 ພະຈິກ 2011 ໄດ້ເອກະພາບວ່າ ຄະນະຊາວໜຸ່ມ ແຂວງຢຸນນານ ຈະໜອງທຶນໃຫ້ແກ່ຊາວໜຸ່ມລາວ ໄປຝຶກອົບຮົມດ້ານເຕັກນິກຢູ່ ເຂດຊາຍແດນລາວ-ຈີນ ໂດຍຕາມຄວາມສາມາດຂອງຝ່າຍຈີນ, ເພື່ອເຮັດ ໃຫ້ບັນດາຫົວ ຂໍ້ຕ່າງໆ ທີ່ປຶກສາຫາລືກັນ ຕາມທີ່ກ່າວມາຂ້າງເທິງນັ້ນ ທັງສອງຝ່າຍໄດ້ເປັນເອກະພາບ ເຮັດບົດບັນທຶກການ ເຮັດວຽກຄັ້ງນີ້ ໄວ້ເພື່ອເປັນບ່ອນ ອິງໃນການຈັດຕັ້ງປະຕິບັດຂັ້ນຕໍ່ໄປ./.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446