ຂ່າວພາຍໃນປະເທດ

ຂໍໃຫ້ປະຊາຊົນລະວັງ​! ຝົນ​ຈະ​ສືບ​ຕໍ່ຕົກອີກ​ໃນ​ບາງ​ແຂວງ​ລະຫວ່າງ 10-12 ​ກໍລະກົດ​ນີ້

*( ຂປລ) ກົມອຸຕຸນິຍົມ-ອຸທົກກະສາດໄດ້ແຈ້ງເຕືອນໃນລະ​ຫວ່າງວັນທີ 9 ກໍລະກົດ 2012 ນີ້ວ່າ: ໃນໄລຍະນັບແຕ່ວັນທີ 10-12 ກໍລະກົດ 2012 ຈະເກີດມີຝົນຕົກໃນດັບທີ່ ຄ່ອຍ ແລະ ແຮງພ້ອມມີຟ້າຄະນອງໃນຫລາຍຂົງເຂດສຳລັບພາກກາງ, ພາກເໜືອ, ພາກໃຕ້ ສ່ວນ​ນະຄອນຫລວງ​ວຽງ​ຈັນ​ ຈະ​ມີ​ຝົນ​ຕົກ​ຕິດ​ຕໍ່​ກັນ​ເປັນ​ເວລາ 3 ວັນ (10-12 ກໍລະ ກົດ​ນີ້) ອັນເນື່ອງມາຈາກ ຄວາມກົດດັນຂອງກາດຮ້ອນພັດຜ່ານກໍ່ເຮັດໃຫ້ມີອາກາດປັ່ນປ່ວນສະນັ້ນຈິ່ງເຕື່ອນໃຫ້ປະຊາຊົນ ທີ່ອາໃສ່ຢູ່ເຂດທີ່ມີຄວາມສ່ຽງຕ້ອງເພີ່ມຄວາມລະມັດ ລະວັງ ຂຶ້ນຕື່ມສ່ວນຜູ້ເດີນທາງໄປມາຫລື ຂັບ-ຂີ່ລົດ ກໍຄວນຕິດຕາມສະພາບອາກາດຢ່າງໄກ້ຊິດເພື່ອຫລີກລ້ຽງບັນຫາອາດຈະເກີດຂຶ້ນໄດ້ງ່າຍ. ຂະນະ ທີ່ກະຊວງສາທາລະນະສຸກ ກໍໄດ້ເຕື່ອນໃຫ້ປະຊາຊົນຕ້ອງເພີ່ມຄວາມລະມັດລະວັງໃນການໃຊ້ຊີວິດ ໂດຍສະເພາະການຮັກສາສຸຂະພາບລະຫວ່າງລະດູຝົນຄື:ການກິນ-ການຢ່າງແລະການຮັກສາ ຄວາມອົບອຸ່ນ ຂອງຮ່າງກາຍໃຫ້ຖືກຕາມລະບົບເພື່ອຫລຸດຜ່ອນບັນຫາອາດເກີດຂຶ້ນໄດ້ງ່າຍເປັນຕົ້ນ: ໄຂ້ຫວັດ ແລະ ພະຍາດຖອກທ້ອງ.

ສະພາບຝົນຕົກຈະເກີດຂຶ້ນໃນ 3 ວັນຕໍ່ໜ້ານີ້ປະກອບມີ: ແຂວງຊຽງຂວາງໃນວັນ 10-11 ​ໃນ​ຂອບ​ເຂດ​ບໍລິ​​ເວນທົ່ວ​ແຂວງ​ນັ້ນ​ຈະ​ມີ​ນ້ຳ​ໜອກ ​ແລະ ​ເມກ​ປົກ​ຄຸມ​ມືດ ຕໍ່​ມາ​ວັນ​ທີ 12 ຈະ​ມີ​ຝົນຕົກ​ແຮງ, ນັບ​ແຕ່​ວັນ​ທີ 10-12 ​ຢູ່​ແຂວງ​ຫລວງ​ນ້ຳ​ທາຈະ​ເກີດ​ມີ​ຝົນຕົກ​ຕິດ​ຕໍ່​ກັນ, ແຂວງຫລວງພະ​ບາງຈະມີຝົນຕົກ​ໃນ​ວັນ​ທີ 12, ນະຄອນຫລວງ​ວຽງ​ຈັນ ຈະມີຝົນ ຕົກຕິດ​ຕໍ່​ກັນ​ເປັນ​ເວລາ 3 ວັນ 10-12, ສວ່ນ​ແຂວງ​ສະຫວັນ​ນະເຂດຈະມີຝົນຕົກໃນວັນທີ 12, ແລະແຂວງຈຳປາສັກ ຈະມີຝົນຕົກຟ້າ ຄະນອງນັບ​ແຕ່ວັນທີ 10-12.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446