ຂ່າວພາຍໃນປະເທດ

ຜົນສຳເລັດການປະຕິບັດວຽກງານກໍ່ສ້າງ ຮາກຖານການເມືອງ-ພັດທະນາຊົນນະບົດຮອບດ້ານ

*(ຂປລ): ກອງປະຊຸມ ປະຈຳສົກປີ 2010-2011 ຂອງຄະນະພັດທະນາຊົນນະບົດ ແລະ ລຶບລ້າງຄວາມ ທຸກຍາກຂັ້ນສູນກາງ ຈັດຂຶ້ນໃນວັນທີ 06-07 ກຸມພາ 2012 ທີ່ຫ້ອງວ່າການລັດຖະບານ ໂດຍການເປັນກຽດເຂົ້າຮ່ວມເປັນປະທານ ຂອງທ່ານ ອາງຊາງ ລາວລີ, ຮອງນາຍົກລັດຖະມົນຕີ, ຜູ້ຊີ້ນຳວຽກງານ ກໍ່ສ້າງຮາກຖານ ການເມືອງ ແລະ ພັດທະນາຊົນນະບົດຮອບດ້ານ ແລະ ທ່ານ ບຸນເຮືອງ ດວງພະຈັນ, ລັດຖະມົນຕີປະຈຳຫ້ອງ ວ່າການລັດຖະບານ, ຫົວໜ້າຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ (ຄພທສ) ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ເມກ ພັນລັກ, ລັດຖະມົນຕີຊ່ວຍວ່າການ ປະຈຳຫ້ອງວ່າການລັດຖະບານ, ຮອງຫົວໜ້າ ຄພທສ ໄດ້ສະເໜີຜົນສຳເລັດ ຂອງການຈັດຕັ້ງປະຕິບັດ ວຽກງານຈຸດສຸມ ປະຈຳປີ 2010-2011 ແລະ ທິດທາງແຜນ ການວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ ສົກປີ 2011-2012 ໂດຍທ່ານ ໄດ້ຍົກໃຫ້ເຫັນບາງເນື້ອໃນສຳຄັນວ່າ: ໃນ 1 ປີຜ່ານມາ ຄະນະພັກຂັ້ນຕ່າງໆໄດ້ສຸມທຶນຮອນ, ພະນັກງານເຂົ້າ ໃສ່ວຽກງານດັ່ງກ່າວ ຢ່າງ ເປັນຂະບວນກວ້າງຂວາງ ແລະ ມີຜົນສຳເລັດໃນແຕ່ລະ ລະດັບແຕກຕ່າງກັນ ໂດຍສະເພາະແມ່ນການສຶກສາອົບຮົມການເມືອງ-ແນວຄິດ ແລະ ປັບປຸງ ລະບົບການເມືອງຢູ່ຂັ້ນຮາກຖານ; ຕັ້ງໜ້າຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ, ພັດທະນາພື້ນຖານ ໂຄງລ່າງ ຊົນນະບົດ ແລະ ພື້ນຖານວັດຖຸເຕັກນິກ; ເອົາໃຈໃສ່ສືບຕໍ່ຂະຫຍາຍຕາໜ່າງການສຶກສາ, ສາທາລະນະສຸກ ແລະ ຖະແຫລງຂ່າວ-ວັດທະນະທຳ ລົງສູ່ຊົນ ນະບົດພູດອຍ ເພື່ອບໍລິການ ແລະ ຮັບໃຊ້ປະຊາຊົນ; ເຕົ້າ ໂຮມບ້ານ, ຈັດສັນບ້ານໃຫ້ປະຊາຊົນ, ເຮັດໃຫ້ຈຳນວນບ້ານຫລຸດລົງຍັງເຫລືອ 8.654 ບ້ານ ຈາກ 8.757 ບ້ານ ໃນປີ 2008, ຈຳນວນກຸ່ມບ້ານຫລຸດລົງ 1.097 ກຸ່ມບ້ານ; ສຳເລັດການກຳນົດເມືອງທຸກຍາກ, ກຸ່ມບ້ານ ຫລື ບ້ານທຸກຍາກ, ຫ່າງໄກສອກຫລີກ ທີ່ທຸລະກັນດານ ເພື່ອປະຕິບັດນະໂຍບາຍຍົກເວັ້ນພາສີ ແລະ ອາກອນທຸລະ ກິດ ໃຫ້ຜູ້ໄປລົງທຶນຢູ່ເຂດດັ່ງກ່າວ; ສຳເລັດການສ້າງແຜນ ພັດທະນາຊົນນະບົດ ແລະ ລຶບລ້າງຄວາມທຸກຍາກ 5 ປີ(2011 -2015) ຊຶ່ງໄດ້ກຳນົດ 64 ຈຸດສຸມ ໃນນັ້ນ 10 ຈຸດສຸມ ຂອງລັດຖະບານ ແລະ 54 ຈຸດສຸມຂອງທ້ອງຖິ່ນ ແລະ ສຳເລັດການກຳນົດ 167 ຈຸດສຸມ ເພື່ອຈັດສັນພູມລຳເນົາ ແລະ ບ່ອນທຳມາຫາກິນຖາວອນ ໃຫ້ປະຊາຊົນ; ກວດກາ ແລະ ປະເມີນຄວາມທຸກ ຍາກຊຶ່ງສາມາດກຳໄດ້ ຄື: ຄອບຄົວທຸກຍາກ 198.678 ຄອບຄົວ ໃນ ຈຳນວນ 1.053.337 ຄອບຄົວໃນ 17 ແຂວງທົ່ວປະເທດ, ບ້ານທຸກຍາກ 3.175 ບ້ານຂອງຈຳນວນ 8.654 ບ້ານ, ຄອບຄົວ ພັດທະນາ 494.825 ຄອບຄົວ, ບ້ານພັດທະນາ 883 ບ້ານ, ກຸ່ມບ້ານພັດທະນາ 11 ກຸ່ມບ້ານ ໃນຈຳ ນວນ 1.097 ກຸ່ມບ້ານ ແລະ ອື່ນໆ.

ໃນມື້ທຳອິດຂອງການດຳເນີນກອງປະຊຸມ, ນອກຈາກຮັບຟັງການສະເໜີ ຜົນສຳເລັດຂອງການຈັດ ຕັ້ງປະຕິບັດວຽກງານຈຸດສຸມ ປະຈຳປີ 2010-2011 ແລະ ທິດທາງແຜນການວຽກ ງານກໍ່ສ້າງຮາກຖານການ ເມືອງ ແລະ ພັດທະນາຊົນນະບົດຮອບດ້ານ ສົກປີ 2011-2012 ແລ້ວ, ບັນດາຜູ້ເຂົ້າຮ່ວມ ຍັງໄດ້ຮັບຟັງ ການສະ ເໜີ ຄຳສັ່ງແນະນຳເລກທີ 03/ຄລສພ ກ່ຽວກັບການຜັນຂະຫຍາຍຜົນສຳເລັດຂອງ ກອງປະຊຸມວຽກງານກໍ່ ສ້າງຮາກຖານການເມືອງ ແລະ ພັດທະນະຊົນນະບົດຮອບດ້ານທົ່ວປະເທດ ຄັ້ງທີ III; ດຳລັດເລກທີ 20/ນຍ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ຄພທສ, ດຳລັດເລກທີ 10/ນຍ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ທລຍ; ລັດຖະດຳລັດຂອງປະທານປະເທດ ວ່າດ້ວຍການແຕ່ງຕັ້ງພະນັກງານການນຳ ຂັ້ນສູງ ແລະ ດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງ ບັນດາຮອງຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ແລະ ຂໍ້ຕົກລົງ ກ່ຽວກັບການແບ່ງຄວາມຮັບຜິດຊອບ ຊີ້ນຳວຽກ ງານພາຍໃນຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ./.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446