ຂ່າວພາຍໃນປະເທດ

ມອບບັດ ໃຫ້ສະມາຊິກພັກສົມບູນ ທີ່ຂຶ້ນກັບຫ້ອງວ່າການສູນກາງພັກ

(ຂປລ): ຫ້ອງວ່າການສູນກາງພັກ ຈັດພິທີມອບບັດສະມາຊິກພັກສົມບູນ ຂອງພັກປະຊາຊົນ ປະຕິວັດລາວ ໃຫ້ສະມາຊິກພັກ ທີ່ຂຶ້ນກັບຫ້ອງວ່າການສູນກາງພັກ ງວດທີ 1 ຈຳນວນ 68 ສະຫາຍ ໃນຕອນ ເຊົ້າວັນທີ 27 ທັນວາ 2012 ນີ້ ໂດຍແມ່ນ ສະຫາຍ ບຸນປອນ ບຸດຕະນະວົງ, ກຳມະການກົມການເມືອງສູນກາງພັກ, ເລຂາທິການສູນກາງພັກ, ເລຂາຄະ ນະພັກ, ຫົວໜ້າຫ້ອງວ່າການສູນກາງພັກ ເພື່ອເຮັດໃຫ້ຄະນະພັກ, ຄະນະໜ່ວຍພັກ, ສະມາຊິກພັກທຸກສະຫາຍ ຮັບຮູ້ ແລະ ເຂົ້າໃຈແຈ້ງກ່ຽວກັບເນື້ອໃນຄວາມໝາຍ ຄວາມ ສຳຄັນຂອງການອອກບັດ ແລະ ມອບບັດສະມາຊິກພັກ ພ້ອມທັງເຮັດໃຫ້ສະມາຊິກພັກມີຄວາມຕື່ນຕົວ ໃນຝຶກຝົນຫລໍ່ຫລອມຕົນເອງ ໃຫ້ກາຍເປັນສະມາຊິກພັກແຂງ ແລະ ມີເງື່ອນ ໄຂໄດ້ຮັບບັດສະມາຊິກພັກ.

ໃນໂອກາດນີ້, ສະຫາຍ ບຸນປອນ ບຸດຕະນະວົງ ຍັງໄດ້ໂອ້ລົມຕໍ່ບັນດາສະມາຊິກພັກ ໂດຍສະຫາຍໄດ້ກ່າວບາງເນື້ອໃນສຳຄັນວ່າ: ການມອບບັດສະມາຊິກພັກໃນມື້ນີ້ແມ່ນມອບ ໃຫ້ຜູ້ມີເງື່ອນໄຂມາດຖານຄົບຖ້ວນ ແລະ ຖືກຕ້ອງຕາມລະບຽບຂອງການມອບບັດສະມາຊິກພັກ ເພື່ອໃຫ້ສະມາຊິກພັກມີບັດປະຈຳຕົວແຕ່ລະຄົນແນໃສ່ເຮັດໃຫ້ ການເຄື່ອນໄຫວ ຂອງສະມາຊິກພັກ ໄປຕາມລະບຽບຂອງພັກ. ການປະກອບບັດໃຫ້ສະມາຊິກພັກນີ້ ກໍແມ່ນຮູບການໜຶ່ງ ຂອງການຍົກສູງບົດບາດ ແລະ ຄວາມສາມາດຂອງການນຳພາຂອງພັກ, ການກຳອຳນາດຂອງພັກ ທັງຊີ້ໃຫ້ເຫັນທາດແທ້ຫລັກໝັ້ນຊົນຊັ້ນຂອງພັກ, ອຸດົມການ, ແນວຄິດ ແລະ ການກະທຳທີ່ມີຄວາມໜັກແໜ້ນຂອງພັກ ຊຶ່ງເປັນບາດລ້ຽວປະຫວັດ ສາດໜຶ່ງ ທີ່ທົ່ວພັກຂອງພວກເຮົາບໍ່ເຄີຍມີມາ ແຕ່ກໍພ້ອມກັນເຮັດຢູ່ບັນດາກະຊວງ, ອົງການ, ບັນດາ ແຂວງ ແລະ ນະຄອນຫລວງວຽງຈັນ ກໍເຮັດໄດ້.

ສະຫາຍ ໄດ້ກ່າວເນັ້ນອີກວ່າ: ເມື່ອພວກເຮົາມີບັດແລ້ວ ເຮັດແນວໃດການປົກປັກຮັກສາ ແລະ ນຳໃຊ້ໄປຕາມຈຸດປະສົງ ແລະ ອຸດົມການຂອງພັກນັ້ນ ມັນແມ່ນບັນຫາໜຶ່ງທີ່ຕັ້ງ ຂຶ້ນ ຊຶ່ງສະມາຊິກພັກຄວນກຳໃຫ້ໄດ້ລະບຽບການ ນຳໃຊ້ຄື: ນຳໃຊ້ເພື່ອຢັ້ງຢືນໃນເວລາເຂົ້າຮ່ວມຊີວິດພັກ ແລະ ເວລາເຂົ້າຮ່ວມກອງປະຊຸມໃຫຍ່ຂອງພັກແຕ່ລະຂັ້ນ; ນຳໃຊ້ເວລາ ລົງທະບຽນ ແລະ ລົງປະຊາມັດຕິໃນກອງປະຊຸມຜູ້ແທນ ຫລື ກອງປະຊຸມໃຫຍ່ຂອງພັກ; ນຳໃຊ້ເພື່ອຢັ້ງຢືນ ຮ່ວມຊີວິດຊົ່ວຄາວ ຢູ່ການຈັດຕັ້ງບ່ອນຕົນໄປເຮັດວຽກໃນໄລຍະສັ້ນ ແລະ ນຳໃຊ້ຢັ້ງຢືນ ເພື່ອເຮັດໃບຍົກຍ້າຍໄປປະ ຈຳການຢູ່ກົມກອງ ແລະ ສຳນັກງານຕ່າງໆ ຢູ່ພາຍໃນ ຫລື ຕ່າງປະ ເທດ./.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446