ຂ່າວພາຍໃນປະເທດ

ສຳ​ເລັດ​ ການ​ຮຽນ-ການ​ສອນ ກຸ່ມ​ອາຊີບ ອຸດ​ສະຫະ​ກຳ​ການ​ພິມ ຮຸ່ນ​ທີ I

*(ຂປລ): ສູນ​ພັດທະນາ​ອາຊີວະ​ສຶກສາ ຮ່ວມ​ກັບ ສະມາຄົມ​ການ​ພິມ ​ແຫ່ງ ສປປ ລາວ ຈັດ​ພິທີ​ມອບ​ໃບ​ປະກາສະນີຍະ ບັດ ​ໃຫ້​ແກ່​ນັກ​ສຶກສາ ກຸ່ມ​ອາຊີບ ​ອຸດສາຫະກຳ​ການ​ພິມ ຮຸ່ນ​ທີ I ຈຳນວນ 19 ຄົນ ທີ່​ສຳ​ເລັດ​ການ​ຮຽນ-ການ​ສອນ ສົກ​ສຶກສາ 2010-2011 ໃນ​ວັນ​ທີ 23 ທັນວາ 2011 ທີ່​ສູນ​ພັດທະນາ ​ອາຊີວະ​ສຶກສາ ​ໂດຍ​ເປັນ​ກຽດ​ມອບ​ຂອງ​ ທ່ານ ໜູ​ພັນ ອຸດສາ, ຮັກສາ​ການ​ຫົວໜ້າ​ກົມ​ອາຊີວະ​ສຶກສາ, ກະຊວງ​ສຶກສາ​ທິການ ​ແລະ ກິລາ, ​ເຂົ້າ​ຮ່ວມ​ໃນ​ພິທີ​ມອບ​ ໃບ​ປະ​ກາ​ຊະນີ​ຍະ​ບັດ​ໃນ​ຄັ້ງນີ້ ມີທ່ານ ສຸລິ​ຄຳ​ກອນ ສີ​ສຸລາ​ດ, ຜູ້ອຳນວຍການ​ສູນພັດທະນາ​ອາຊີ​ວະ​ສຶດສາ, ທ່ານ ຈັນທຽ​ມ ລັດຖະ​ເຮົ້າ, ປະທານ​ສະມາຄົມ ​ການ​ພິມ ແຫ່ງ ສປປ ລາວ ​ແລະ ພາກສ່ວນ​ກ່ຽວຂ້ອງ ​ເຂົ້າ​ຮ່ວມ.

ການຈັດຕັ້ງປະຕິບັດ ​ການ​ຮຽນ​ການ​ສອນ​ ໃຫ້​ແກ່​ນັກ​ສຶກສາ​ກຸ່ມ​ອາຊີບ ອຸດສາຫະກຳ​ ການ​ພິມ ຮຸ່ນ​ທີ I ​ໄດ້​ດຳ​ເນີນ​ມາ​ແຕ່ ​​ເດືອນ​ມັງກອນ 2010 ​ເປັນຕົ້ນ​ມາ ​ໂດຍ​ມີ​ນັກ​ສຶກສາ​ຈາກ​ໂຮງພິມ​ແຫ່ງ​ຕ່າງໆ ຈຳນວນ 21 ຄົນ, ທັງ​ໃນ​ນະຄອນຫລວງ​ວຽງ​ຈັນ ​ແລະ ບັນດາ​ແຂວງ ຈຳນວນ 16 ​ແຫ່ງ, ຊຶ່ງ​ການ​ຮຽນ-ການ​ສອນ ​ແມ່ນ​ປະຕິບັດ​ຕາມ​ຫລັກສູດ​ປະກາສະ​ນີຍະ​ບັດ​ເຕັກນິກ​ລະດັບ 2 ມີ 3 ພາກຮຽນຄື: ຮຽນ​ພາກ​ທິດ​ສະ​ດີ, ພາກ​ປະຕິບັດ​ຕົວ​ຈິງ, ຊຶ່ງ​ເປັນ​ການ​ຮຽນ​ແບບ​ມີ​ສ່ວນ ​ຮ່ວມ​ກັບ 5 ​ໂຮງພິມ​ຄ​ື: ໂຮງພິມ​ແຫ່ງ​ລັດ, ​ໂຮງພິມສີສະ​ຫວາດ, ​ໂຮງພິມ​ສຶກສາ, ​ໂຮງພິມ​ໜຸ່ມ​ລາວ ​ແລະ ​ໂຮງພິມ​ນະຄອນຫລວງ ​ແລະ ພາກຮຽນ​ທີ 3 ສົ່ງ​ນັກ​ສຶກສາ​ລົງ​ຝຶກ​ງານ​ວິຊາ​ສະ​ເພາະ​ຢູ່​ໂຮງພິມ​ແຫ່ງ​ຕ່າງໆ ​ເລີ່​ມ​ແຕ່​ວັນ​ທີ 10/07/2011 ​ເຖິງ 14/10/2011. ຜ່ານ​ການຈັດຕັ້ງ ປະຕິບັດ​ການ​ຮຽນ-ການ​ສອນ ມີ​ນັກ​ສຶກສາ​ສອບ​ເສັງ​ໄດ້​ທັງ​ໝົດ 19 ຄົນ ​ໃນ​ນັ້ນ ​ໄດ້​ຮັບ​ກຽດ​ນິຍົມ​ອັນ​ດັບ 2 ມີ 2 ຄົນ, ປະ​ເພດ​ດີ​ຫລາຍ 4 ຄົນ ​ແລະ ປະ​ເພດ​ດີ​ພໍ​ໃຊ້ 13 ຄົນ.

​ໃນ​ໂອກາດ​ດຽວ​ກັນນີ້, ທ່ານ ສຸລິ​ຄຳ​ກອນ ສີ​ສຸລາ​ດ, ຜູ້ອຳນວຍການ​ສູນພັດທະນາ​ອາຊີ​ວະ​ສຶດສາ, ກໍ​ໄດ້​ອມບ​ໃບຢັ້ງຢືນ​ໃຫ້​ແກ່​ຄູ​ສອນ​ພາກ​ປະຕິບັດ​ຕົວ​ຈິງ ຈຳນວນ 15 ທ່ານ./.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446