ຂ່າວພາຍໃນປະເທດ

ມອບລາງວັນການປະກວດບົດ ຄວາມ ປະຊາກອນໂລກ ຈຳນວນ 7 ຕື້ຄົນ

*(ຂປລ) ກະຊວງແຜນການ ແລະ ການລົງທຶນ ຮ່ວມກັບ ອົງການສະຫະປະຊາຊາດ ກອງທຶນສຳລັບ ປະຊາກອນ(UNFPA) ມອບລາງວັນໃຫ້ນັກຮຽນ ແລະ ນັກສຶກສາ ທີ່ຊະນະເລີດການແຂ່ງຂັນປະກວດບົດຄວາມ ໃນຫົວຂໍ້ “ປະຊາກອນໂລກຈຳນວນ 7 ຕື້ຄົນ: ໂອກາດ, ສິ່ງທ້າທາຍ ແລະ ຄວາມໝາຍຕໍ່ການພັດ ທະນາ ຢູ່ ສປປ ລາວ“ ໃນວັນທີ 20 ທັນວາ 2011 ທີ່ສະມາຄົມນັກຂ່າວແຫ່ງປະເທດລາວ ໂດຍການໃຫ້ກຽດມອບລາງ ວັນຂອງ ທ່ານ ສົມຈິດ ອິນທະມິດ, ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ ແລະ ທ່ານ ນາງ ດຣ. Esther Muia, ຜູ້ຕາງໜ້າ​ອົງການ​ສະຫະ​ປະຊາ​ຊາດ, ກອງ​ທຶນ​ສຳລັບ​ ປະຊາກອນ ປະຈຳ​ລາວ.

ບົດ​ຄວາມ​ທີ່​ໄດ້​ຮັບ​ລາງວັນ​ຊະນະ​ເລີດ ລະດັບ​ມັດທະຍົມ​ຕອນ​ປາຍ ອັນ​ດັບ 1 ​ແມ່ນ ນາງ ຈິນຕະນາ ​ແສງ​ສຸລິນ, ອັນ​ດັບ​ທີ 2 ນາງ ວິລິຍະ ວິລະ​ວົງສາ ​ແລະ ອັນ​ດັບທີ 3 ທ້າວ​ ຄຳ​ຈັນ ທຳ​ມະ​ວົງ ​ແລະ ລະດັບ​ມະຫາວິທະຍາ​ໄລ ອັນ​ດັບ 1 ​ແມ່ນ ທ້າວ ທອງ​ສຸກ ສົມ​ພູ​ວິ​ເສດ, ທີ 2 ທ້າວ ດວງ​ຕາ ມະນີ​ວັນ ​ແລະ ອັນ​ດັບ​ທີ ທ້າວ ຕ້ອມ ​ໄຊ​ສົງຄາມ. ສຳລັບ​ຜູ້​ຊະນະ​ເລີດ ລາງວັນ​ທີ 1 ​ໄດ້​ຮັບ​ເງິນ​ລາງວັນ​ ຈຳນວນ 2.000.000 ກີບ, ລາງ​ວັນ​ທີ 2 ຈຳນວນ 1.500.000 ກີບ ​ ​ແລະ ລາງວັນ​ທີ 3 ຈຳນວນ 1.000.000 ກີບ.

ການ​ປະ​ກວດ​ບົດ​ຄວາມ​ ແມ່ນ​ໜຶ່ງ​ໃນ​ຂະ​ບວນການສະ​ເຫລີ​ມສະຫລອງ​ ວັນ​ປະຊາກອນ​ໂລກ​ກ້າວ​ສູ່ 7 ຕື້ຄົນ ​ໃນ​ວັນ​ທີ 31 ຕຸລາ 2011 ຜ່ານ​ມາ. ​ການ​ປະ ​ກວດ​ບົດ​ຄວາມຄັ້ງນີ້ ແມ່ນ​ແນໃສ່ສ້າງຄວາມ​ເຂົ້າ​ໃຈ​ກ່ຽວ​ກັບ​ຄວາມ​ໝາຍ​ຂອງ​ການ​ຂະຫຍາຍຕົວ​ຂອງ​ປະຊາກອນ​​ໂລກ ຕໍ່​ກັບ ສປປ ລາວ ​ແລະ ຍັງ​ເປັນ​ການ ​ເປີດ​ໂອກາດ​ໃຫ້​ຊາວ​ໜຸ່ມ​ລາວ ສະ​ແດງ​ຄວາມ​ຄິດ​ຄວາມ​ເຫັນ ​ແລະ ​ເສີມ​ສ້າງ​ຄວາມ​ອາດ​ສາມາດ​ຂອງ​ຕົນ. ຊຶ່ງ​ຂະ​ບວນ ການ​ດັ່ງ​ກ່າວ​ ໄດ້​ລິ​ເລີ່​ມຈາກ​ອົງການ UNFPA ​ໃນ​ລະດັບ​ສາກົນ ​ເພື່ອ​ເນັ້ນ​ໃສ່​ຄວາມ​ສຳຄັນ​ໃນ​ການ​ປ່ຽນ​ແປງ​ຂອງ​ປັດ​ໄຈ​ປະຊາກອນ​ຕໍ່​ອະນາຄົດ​ໂລກ. ​ໃນ ສປປ ລາວ, ກະຊວງແຜນ ການ ແລະ ການລົງທຶນ ຮ່ວມກັບ ອົງການສະຫະປະຊາຊາດ ກອງທຶນສຳລັບ ປະຊາກອນ ​ໄດ້​ມີ​ການຈັດຕັ້ງຫລາຍ​ກິດຈະກຳ ​ໂດຍ​ເລີ່​ມ​ແຕ່​ເດືອນ​ພຶດສະພາ ຫາ ທັນວາ 2011 ​ເປັນຕົ້ນ ​ແມ່ນ ການສະ​ເຫລີ​ມສະຫລອງ​ວັນ​ປະຊາກອນ​ໂລກ ​ໃນ​ເດືອນ​ກໍລະກົດ, ການ​ຝຶກ​ອົບຮົມ​ກ່ຽວ​ກັບ​ວຽກງານ​ປະຊາກອນ​ໃຫ້​ແກ່​ນັກ​ຂ່າວ, ກອງ​ປະຊຸມ​ວິຊາ​ການ, ກອງ​ປະຊຸ​ມທີ່​ກ່ຽວ​ພັນ​ກັບ​ປະຊາກອນ ​ແລະ ການ​ພັດທະນາ​ຢູ່ ​ແຂວງ​ຈຳປາ​ສັກ ​ແລະ ການ​ແຂ່ງຂັນ​ຄວາມ​ຮູ້​ດ້ານ​ປະຊາກອນ​ຢູ່ ມະ ຫາວິທະຍາ​ໄລ​ແຫ່ງ​ຊາດ ​ແລະ ອື່ນໆ./.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446