ຂ່າວພາຍໃນປະເທດ

ຈະ​ເລີ່​ມກໍ່ສ້າງໂຮງງານໄຟຟ້າພະລັງງານຄວາມຮ້ອນຫົງສາໃນມໍ່ໆນີ້

*(ຂປລ): ການກໍ່ສ້າງໂຮງງານໄຟຟ້າພະລັງງານຄວາມຮ້ອນຫົງສາ ຊຶ່ງເປັນໂຮງງານໄຟຟ້າພະລັງຄວາມຮ້ອນ ແຫ່ງ ທຳອິດ ຢູ່ ສປປ ລາວ ຈະໄດ້ເລີ່ມລົງມື ກໍ່ສ້າງໃນໄວໆນີ້ ພາຍຫລັງທີ່ ໄດ້ມີການວາງສີລາລືກການກໍ່ສ້າງຢ່າງເປັນທາງການ ຊຶ່ງຈະມີຂຶ້ນໃນວັນທີ 18 ພະຈິກ 2011 ນີ້ ທີ່ເມືອງຫົງສາ ແຂວງໄຊຍະບູລີ.

ໂຄງການໄຟຟ້າພະລັງງານຄວາມຮ້ອນຫົງສາ ຕັ້ງຢູ່ຮ່ອມພູ ເມືອງຫົງສາ ແຂວງໄຊຍະບູລີ ຫ່າງຈາກຕົວເມືອງໄປ ທາງທິດຕາເວັນຕົກ ປະມານ 10 ກິໂລແມັດ ແລະ ຫ່າງຈາກຊາຍແດນ ລາວ-ໄທ ປະມານ 34 ກິໂລແມັດ, ສູງຈາກລະດັບນ້ຳ ທະເລ ປະມານ 600 ແມັດ. ໂຄງການນີ້ມີມູນຄ່າການກໍ່ສ້າງທັງໝົດ 3.915 ລ້ານໂດລາສະຫະລັດ. ມີກຳລັງຕິດຕັ້ງ 1.878 ເມກາ ວັດ, ສາມາດຜະລິດໄຟຟ້າໄດ້ 12.582 GWh/ປີ ຕາມແຜນການຈະສຳເລັດ ແລະ ຂາຍໄຟຟ້າໃນປີ 2015, ໃນນັ້ນ ຂາຍໃຫ້ປະ ເທດໄທ 1.473 MW ໃນລາຄາ ປະມານ 5-7 ບາດ (ສະກຸນເງິນໄທ) ຕໍ່KW ຕາມສາຍສົ່ງ 500 KV ຈາກໂຄງການຫາເມືອງ ຊຽງຮ່ອນ ຊາຍແດນ ລາວ-ໄທ ຍາວປະມານ 67 ກິໂລແມັດ ແລະ ຈາກຊາຍແດນເຂົ້າຫາລະບົບຕາຄ່າຍໄຟຟ້າ ແມ່ ເມາະ ປະເທດໄທ ຍາວປະມານ 250 ກິໂລແມັດ; ຊົມໃຊ້ຢູ່ພາກເໜືອຂອງລາວ 100 MW ຕາມສາຍສົ່ງ 115 KV ຈາກໂຮງງານໄປ ຫາສະຖານີໄຟຟ້າ ເມືອງຊຽງເງິນ ແຂວງຫລວງພະບາງ ຍາວ 115 ກິໂລແມັດ ເພື່ອສົ່ງໄຟຟ້າເຂົ້າລະບົບຕາຄ່າຍໄຟຟ້າ ຂອງ ລັດວິສາຫະກິດໄຟຟ້າລາວ, ສ່ວນທີ່ຍັງເຫລືອ 75 MW ແມ່ນຊົມໃຊ້ຢູ່ພາຍໃນໂຮງງານ.

ໂຄງການດັ່ງກ່າວມີອົງປະກອບທີ່ສຳຄັນຄື: ໂຮງງານໄຟຟ້າພະລັງງານຄວາມຮ້ອນ 3 ເຕົາເຜົາ (3ເຕົາ x 626 MW) ແຕ່ລະເຕົາຈະໃຊ້ທ່ານຫີນລິກໄນ ສະເລ່ຍ 15.800 ໂຕນ/ວັນ; ເຂື່ອນເກັບນ້ຳ 2 ແຫ່ງ: ເຂື່ອນນ້ຳແກ່ນ ແລະ ເຂື່ອນນ້ຳ ເລືອກ ເພື່ອເກັບນ້ຳຮັບໃຊ້ໃນລະບົບທຳຄວາມເຢັນຂອງໂຮງຈັກໄຟຟ້າ ແລະ ຮັບໃຊ້ວຽກອື່ນໆ ຄສດວ່າຈະໃຊ້ປະລິມານນ້ຳ ເຂົ້າມາ ປ້ອນໂຮງງານ ຈຳນວນ 40-50 ລ້ານແມັດກ້ອນຕໍ່ປີ; ບໍ່ທ່ານຫີນລິກໄນ ທີ່ຈະຂຸດຄົ້ນ ແລະ ນຳມາປ້ອນ ໂຮງງານຜະລິດໄຟຟ້າ ປະມານ 13,6 ລ້ານໂຕນຕໍ່ປີ ຄາດວ່າຕະຫລອດອາຍຸສຳປະທານໂຄງການ 25 ປີ ຈະນຳໃຊ້ຖ່ານຫີນປະມານ 341,26 ລ້ານໂຕນ; ໂຄງການໄຟຟ້າພະລັງງານຄວາມຮ້ອນຫົງສາ ໄດ້ກວມເອົາເນື້ອທີ່ສຳປະທານ ປະມານ 60 ກິໂລຕາແມັດ, ໃນນັ້ນ ມີໂຮງງານ ໄຟຟ້າ, ເນື້ອທີ່ຂຸດຄົ້ນບໍ່ຖ່ານຫີນ, ເນື້ອທີ່ຂຸດຄົ້ນຫີນປູນ, ອ່າງເກັບນ້ຳ ແລະ ພື້ນຖານໂຄງລ່າງ ຕ່າງໆເຊັ່ນ: ເສັ້ນທາງເຂົ້າຫາ ໂຄງການ, ຈັດສັນບ້ານທີ່ຖືກຍົກຍ້າຍ ລວມທັງແລວສາຍສົ່ງໄຟຟ້າ. ໄປຄຽງຄູ່ກັບການພັດທະ ນາໂຄງການ ກໍຍັງມີການປະຕິ ບັດພັນທະດ້ານສິ່ງແວດລ້ອມ ແລະ ສັງຄົມ ໄປພ້ອມໆກັນ ໂດຍໄດ້ມີການປັບປຸງແກ້ໄຂເປັນ ແຕ່ລະໄລຍະ ເພື່ອໃຫ້ສອດຄ່ອງກັບ ສັນຍາສຳປະທານ.

ປະຈຸບັນ ໄດ້ມີການກະກຽມ ແລະ ແບ່ງວຽກລະອຽດ ໂດຍມີບໍລິສັດຮັບເໝົາກໍ່ສ້າງທີ່ສຳຄັນຂອງໂຄງການ ເຂົ້າມາ ປະຕິບັດວຽກງານຢູ່ພາກສະໜາມແລ້ວ ຄື: ບໍລິສັດ China National Electric Equipment Corporetion ( CNEEC ) ຈາກປະ ​ເທດ ສປ ຈີນ ຜູ້ຮັບເໝົາກໍ່ສ້າງໂຮງງານ ( EPC ); ບໍລິສັດ ຊ່າງພານິດ ກໍ່ສ້າງ ( CPE ) ຈາກປະທດໄທ ຜູ້ຮັບເໝົາວຽກຂຸດຄອງ ອວ່າຍນ້ຳ ແລະ ວຽກເປີດໜ້າດິນ ບໍລິເວນ ບໍ່ຖານຫີນ ແລະ ບໍລິສັດ ໄທວັດ ຈາກປະເທດ ໄທ ຜູ້ຮັບເໝົາວຽກກໍ່ສ້າງເສັ້ນທາງ ຈາກດ່ານຊາຍແດນເມືອງເງິນ ຫາ ເມືອງຫົງສາ, ເສັ້ນທາງເຂົ້າຫາໂຄງການ ແລະ ເຂື່ອນເກັບນ້ຳ./.

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446