ຂ່າວພາຍໃນປະເທດ

ຫໍສະໝຸດ​ກາງ ຂອງ ມຊ ສ​ະ​ເລ່ຍ ມີ​ຜູ້​ມາ​ໃຊ້​ບໍລິການ 500 ຄົນ​ຕໍ່​ມື້​

(ຂປລ) ຫໍສະຫມຸດ​ກາງ ຂອງ​ມະຫາວິທະຍາ​ໄລ​ແຫ່ງ​ຊາດ ມີ​ນັກຮຽນ-ນັກ​ສຶກສາ​ເຂົ້າມາ​ໃຊ້​ບໍລິການ ສະ​ເລ່ຍປະມານ 500 ຄົນ​ຕໍ່​ວັນ​ ​ເພື່ອຄົ້ນຄວ້າ​​ເອກະສານ​, ຂໍ້​ມູນ​ຂ່າວສານຕ່າງໆ.

ໃນ​ວັນ​ທີ 25-27 ຕຸລາ​ນີ້, ຫໍ​ສະໜຸດກາງຂອງມະຫາວິທະຍາ​ໄລ​ແຫ່ງ​ຊາດຮ່ວມ​ກັບ​ສະຫະພາບ​ເອີຣົບ (EU) ປະຈຳ​ລາວ ​ໄດ້​ຈັດ​ງານ​ສັບປະດາ​ຫ້ອງ​ສະໝຸດ​ຂຶ້ນ, ໂດຍ​ການ​ເຂົ້າຮ່ວມ ​ແລະ ຕັດ​ແຖບ​ຜ້າ​ເປີດ​ພິທີ​ຂອງ​ທ່ານ ສ​ຈ ດຣ. ສົມ​ສີ ຍໍ​ພັນ​ໄຊ ຮອງ​ອະທິການ​ບໍດີ​ມະຫາວິທະຍາ​ໄລ​ແຫ່ງ​ຊາດ, ທ່ານ ສ​ເຕຟານ ລ໋ອກ (Stefan Lock) ວ່າການ​ອຸປະ​ທູດ​ສຳນັກງານ​ຜູ້ຕາງໜ້າ​ສະຫະພາບ​ເອີຣົບປະຈຳ​ລາວ ພ້ອມ​ດ້ວຍ​ຄູ​ອາຈານ ​ແລະ ນັກ​ສຶກສາ​ເຂົ້າຮ່ວມ​ຢ່າງ​ພ້ອມພຽງ, ​ເຊິ່ງງານ​ ດັ່ງກ່າວ ​ນອກຈາກ​ເປັນ​ກິດຈະກຳ​ທີ່​ແນ​ໃສ່​ສົ່ງ​ເສີມ​ການ​ອ່ານ​ແລ້ວ ຍັງ​ເປັນ​ການສະ​ເຫລີ​ມສະຫລອງ​ວັນ​ສາກົນ ​ແລະ ສັບປະດາ​ແຫ່ງ​ຊາດ​ເພື່ອ​ລຶບລ້າງ​ຄວາ ມທຸກ​ຍາກ.

ທ່ານ ສ​ຈ ດຣ. ສົມ​ສີ ຍໍ​ພັນ​ໄຊ ກ່າວ​ວ່າ: ງານ​ດັ່ງກ່າວ​ມີ​ຈຸດປະສົງ​ເພື່ອ​ເຜີຍ​ແຜ່ ​ແລະ ​ເຂົ້າ​ເຖິງ​ແຫ​ລ່ງຂໍ້​ມູນ​ຂ່າວສານ​ເພື່ອ​ສຶກສາຄົ້ນຄວ້າ​ຂອງ​ນັກ​ສຶກສາ. ​ໃນ​ ຂະນະ​ດຽວ​ກັນ ງານ​ດັ່ງກ່າວ​ແມ່ນ​ກິດຈະກຳ​ໜຶ່ງ​ທີ່​ສະ​ເຫລີ​ມສະຫລອງ​ວັນ​ສ້າງຕັ້ງມະຫາວິທະຍາ​ໄລ​ແຫ່ງ​ຊາດ​ຄົບຮອບ 15 ປີ (1996-2011) ​ເຊິ່ງພາຍ​ໃນ​ງານ​ ໄດ້​ມີ​ການວາງສະ​ແດງ​ປຶ້ມ, ສິ່ງ​ພິມ ​ແລະ ຜົນງານ​ການ​ຂີດ​ຂຽນ​ຕ່າງໆ​ທີ່​ສຳຄັນ​ຈາກ​ພາກສ່ວນ​ຕ່າງໆ​ເຊັ່ນ: ຫໍສະໝຸດ​ກາງ​ມະຫາວິທະຍາ​ໄລ​ແຫ່ງ​ຊາດ, ສະ​ຖາ​ ບັນ​ພັດທະນາ​ຊັບພະຍາກອນ​ມະນຸດ ລາວ-ຍີ່ປຸ່ນ, ຄະນະ​ວິທະຍາສາດ​ປ່າ​ໄມ້, ຄະນະ​ວິ​ສະ​ວະ​ກຳ​ສາດ, ຫໍສະໝຸດ​ແຫ່ງ​ຊາດ, ສູນ​ພາສາ​ຝຣັ່ງ, ມູນ​ນິທິ​ເອ​ເຊຍ, ອົງ ການຣູມທູ​ລິດ, ຫໍ​ສະມຸດ EU ​ແລະ ຮ້ານ​ຈຳໜ່າຍ​ປຶ້ມຕ່າງໆ.

ທ່ານ ສ​ເຕຟານ ລ໋ອກ ກ່າວ​ວ່າ: ປີນີ້​ເປັນ​ປີ​ທີສອງ​ທີ່ EU ​ໄດ້​ໃຫ້ການ​ສະໜັບສະໜູນ​ງານ​ວາງສະ​ແດງ​ປຶ້ມ, ຈຸດປະສົງ ​ເພື່ອ​ສະ​ແດງ​​ເຖິງ​ຄວາມ​ຕັ້ງ​ໃຈ​ຕໍ່​ການ​ພັດ ທະນາ​ການ​ສຶກສາ ​ແລະ ບົ່ງ​ບອກ​ເຖິງ​ສາຍ​ພົວພັນ​ຮ່ວມ​ມື​ທີ່​ເພີ່ມ​ຂຶ້ນລະຫວ່າງ​ສະຫະພາບ​ເອີຣົບ ​ແລະ ມະຫາວິທະຍາ​ໄລ​ແຫ່ງ​ຊາດ.

ທ່ານ ອາຈານ ສົມ​ໄຊ ຄຳ​ພາ​ວົງ ຮອງ​ອຳນວຍ​ການ​ຫໍສະໝຸດ​ກາງ ​ໃຫ້​ຮູ້​ວ່າ: ປັດຈຸບັນ​ຫໍສະໝຸດ​ກາງຂອງ​ມະຫາວິທະຍາ​ໄລ​ແຫ່ງ​ຊາດ​ມີ​ປຶ້ມ​ໃຫ້​ບໍລິການ​ປະມານ 30 ພັນ​ກວ່າ​ເຫລັ້ມ ​ໃນ​ນີ້ 60% ​ແມ່ນ​ເປັນ​ປຶ້ມພາສາ​ຕ່າງປະ​ເທດ ​ເຊິ່ງຫ້ອງ​ສະໝຸດ​ດັ່ງກ່າວ​ໄດ້​ຕອບ​ສະໜອງ​ຂໍ້​ມູນ​ຕ່າງໆ​ໃຫ້​ແກ່​ຄູ​ອາຈານ, ພະນັກງານ, ນັກ​ສຶກສາ​ ໃນ​ມະຫາວິທະຍາ​ໄລ ສະ​ເລ່ຍມີ​ຜູ້​ເຂົ້າ​ມາ​ໃຊ້​ບໍລິການ​ປະມານ 500 ຄົນ​ຕໍ່​ມື້ ​ເຊິ່ງຖື​ວ່າ​ໄດ້​ປະກອບສ່ວນ​ສຳຄັນ​​ໃຫ້​ແກ່​ພາລະກິດ​ການ​ຮຽນ-ການ​ສອນ, ການຄົ້ນ ຄວ້າ​ຂອງ​ມະຫາວິທະຍາ​ໄລ​ແຫ່ງ​ຊາດ. ນອກຈາກ​ນີ້ ຫໍສະໝຸດ​ດັ່ງກ່າວ​ຍັງ​ກະກຽມ​ນຳ​ໃຊ້​ເອ​ເລັກ​ໂຕຣນິກ​ໃນ​ການ​ເກັບ​ກຳ​ຂໍ້​ມູນ​ຂອງ​ຫໍສະໝຸດ (I Laberg) ​ເພື່ອ​ ບໍລິການ​ຂໍ້​ມູນ​ຂ່າວສານ​ທີ່​ທັນ​ສະ​ໄໝ​ກວ່າ​ເກົ່າ.

ກັບສາລະບານ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446