ຄະນະຜູ້ແທນອົງການກວດກາແຫ່ງລັດລາວ-ຫວຽດນາມ ຖອດຖອນບົດຮຽນດ້ານກວດການຳກັນ
*(ຂປລ): ທ່ານ ອາຊາງ ລາວລີ, ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ປະທານອົງ ການກວດ ກາແຫ່ງລັດ ໄດ້ນຳພາຄະນະ ເຄື່ອນໄຫວຢ້ຽມຢາມ ແລະ ເຮັດວຽກຢູ່ ສສ ຫວຽດ ນາມ ແຕ່ວັນທີ 4-10 ກັນຍາ 2007ນີ້ ຕາມຄຳເຊີນຂອງຄະນະກວດກາລັດຖະບານ ຫວຽດນາມ ເພື່ອແລກປ່ຽນບົດຮຽນດ້ານການກວດກາລັດ, ການສະກັດກັ້ນການສໍ້ລາດບັງຫລວງ, ຄຳຮ້ອງຟ້ອງພົນລະເມືອງ, ແລກປ່ຽນການແຈ້ງຊັບສິນຂອງພະນັກງານ ແລະ ຮ່ວມລົງນາມໃນບົດບັນທຶກການຮ່ວມມື 2007-2012 ນຳກັນ. ຝນໄລຍະເຄື່ອນໄຫວຢ້ຽມຢາມ ສສ ຫວຽດນາມຄັ້ງນີ້ ຄະນະຜູ້ແທນກວດກາລາວ ຍັງຈະໄດ້ເຂົ້າຢ້ຽມຂ່ຳນັບ ບັນດາຜູ້ນຳຂັ້ນສູງຂອງລັດຖະບານ ສສ ຫວຽດນາມ, ແລກປ່ຽນບົດຮຽນ ກັບຄະນະກວດກາລັດ ນະຄອນໂຮ່ຈິມິນ ແລະ ແຂວງບາເຣຍ-ວຸງເຕົາ ແນໃສ່ເສີມຂະຫຍາຍການຮ່ວມມື ແລະ ຮັດແໜ້ນຄວາມສາມັກຄີ ລະຫວ່າງ ສອງພັກ, ສອງລັດ ກໍ່ຄືສອງຄະນະກວດກາ ລາວ - ຫວຽດນາມ ໃຫ້ແໜ້ນແຟ້ນຍິ່ງໆຂຶ້ນ. ພິທີສົ່ງຄະນະຢ່າງເປັນທາງການ ໄດ້ມີຂຶ້ນ ໃນຕອນແລງວັນທີ 4 ກັນຍາ 2007 ນີ້ ທີ່ຫ້ອງການຄະນະ ກວດກາສູນກາງ ຊຶ່ງມີທ່ານ ຈັນສຸກ ບຸນປະຈິດ ຮອງປະທານຄະນະກຳມະການກວດກາສູນກາງ, ທ່ານ ຫງວຽນ ຮຸ່ຍກວາງ ເອກອັກຄະລັດຖະທູດ ວິສາມານຜູ້ມີອຳນາດເຕັມ ແຫ່ງ ສສ ຫວຽດນາມປະຈຳລາວ ແລະ ພະນັກງານທີ່ກ່ຽວຂ້ອງ ເຂົ້າຮ່ວມ./.
ກັບສາລະບານ
