ທ່ານຮອງນາຍົກ ດຣ. ທອງລຸນ ສີສຸລິດ ສຳເລັດການຢ້ຽມຢາມ ອາກຊັງຕິນ ແລະ ເປຣູ
*(ຂປລ): ພາຍຫຼັງຢ້ຽມຢາມເຮັດວຽກທີ່ປະເທດ ເບຣຊີນ ແລ້ວ ທ່ານ ດຣ. ທອງລຸນ ສີສຸລິດ , ຮອງນາຍົກລັດຖະມົນຕີ, ລັດຖະມົນ ຕີວ່າການກະຊວງການຕ່າງປະເທດ ໄດ້ສືບຕໍ່ຢ້ຽມຢາມປະເທດ ອາກຊັງຕິນ ແລະ ເປຣູ ຕາມລຳດັບ ແຕ່ວັນທີ26-30 ສິງຫາ 2007.ໃນໄລຍະຢ້ຽມຢາມປະເທດ ອາກຊັງຕິນ ທ່ານ ດຣ. ທອງລຸນ ສີສຸລິດ ໄດ້ພົບປະກັບ ທ່ານ ຊອກອັງຣີເກ ໄຕອານາ (Gorge Enrique TAIANA) ລັດຖະມົນຕີວ່າການຕ່າງປະເທດ ອາກຊັງຕິນ ຊຶ່ງໄດ້ປຶກສາ ແລະ ເຫັນ ພ້ອມນຳກັນ ທີ່ຈະເພີ່ມທະວີການພົວພັນມິດຕະພາບ ແລະ ການຮ່ວມມືອັນດີລະຫວ່າງສອງປະເທດໃຫ້ແຕກດອກອອກຜົນຍິ່ງຂຶ້ນໃນອະນາ ຄົດ, ໃນນັ້ນ ທ່ານ ຮອງນາຍົກລັດຖະມົນຕີ ໄດ້ສະແດງຄວາມຊົມເຊີຍລັດ ຖະບານ ອາກຊັງຕິນ ພາຍໄດ້ການນໍາພາຂອງທ່ານ ແນດສະຕໍ ກຽກສະແນ (Nestor Kirchnev), ປະທານາ ທິບໍດີ ອາກຊັງຕິນ ທີ່ໄດ້ສືບທອດອຸດົມການເປຮອນ ໃນການຢືດຫມັ້ນຄວາມເປັນເອກະລາດແຫ່ງຊາດ ເພື່ອການພັດທະນາການແກ້ໄຂບັນຫາເສດຖະກິດ ເພື່ອຜົນປະໂຫຍດຂອງປະຊາຊົນຜູ້ອອກແຮງງານ ແລະ ເພື່ອຄວາມຍຸຕິທຳໃນສັງຄົມ, ສອງຝ່າຍໄດ້ເຫັນດີ ຈະຮ່ວມມືກັນໃນຂົງເຂດທີ່ເປັນທ່າແຮງຂອງສອງປະເທດ ເຊັ່ນ: ດ້ານພະລັງງານໄຟຟ້ານ້ຳຕົກ, ກະສິກຳ, ບໍ່ແຮ່, ເຫັນດີຟື້ນຟູການປະຕິບັດຈິດໃຈສັນຍາເສດຖະກິດ-ການຄ້າ ລະຫວ່າງສອງປະເທດ ທີ່ໄດ້ເຊັນກັນແລ້ວໃນປີ 2002 ແລະ ເຫັນດີກ້າວໄປເຖິງການສ້າງຕັ້ງກົນໄກຮ່ວມມືລະ ຫວ່າງສອງປະເທດ ລາວ-ອາກຊັງຕນ. ການເຊັນບົດບັນທຶກຄວາມຊົງຈຳການຮ່ວມມື ລະຫວ່າງສອງກະຊວງການຕ່າງປະເທດ ລາວ-ອາກຊັງຕິນ ຈະໃຫ້ມີການສືບຕໍ່ປະສານງານກັນລະອຽດຕື່ມຕາມສາຍການທູດ. ທ່ານຮອງນາຍົກລັດຖະມົນຕີ ໄດ້ແຈ້ງການສະໜັບສະໜູນຂອງ ສປປ ລາວ ຕໍ່ການສະຫມັກຂອງ ອາກຊັງຕິນ ໃນຄະນະກຳມະການວ່າດ້ວຍ ສິດທິເດັກ ສຳລັບສົກປີ 2007-2010 ຕາມການສະເໜີຂອງ ອາກ ຊັງຕິນ ແລະ ໄດ້ເຊື້ອເຊີນລັດຖະມົນຕີວ່າການກະຊວງການຕ່າງປະເທດອາກຊັງຕິນ ມາຢ້ຽມຢາມ ສປປ ລາວ ແລະ ໄດ້ຮັບການຕອບຮັບເປັນຢ່າງດີ ຄາດວ່າຈະເດີນທາງມາຢ້ຽມຢາມ ສປປ ລາວ ໃນຕົ້ນປີ 2008. ທ່ານຮອງນາຍົກລັດຖະມົນຕີ ຍັງໄດ້ໄປວາງພວງມາລາ ທີ່ອານຸສາວະລີວິລະຊົນແຫ່ງຊາດ ແລະ ໄປຢ້ຽມຢາມສະຖາບັນກະສິກຳ-ເຕັກໂນໂລຊີແຫ່ງຊາດ ເພື່ອແລກປ່ຽນ ແລະ ຖອດຖອນບົດຮຽນດ້ານການວິໄຈ, ຄົ້ນຄົ້ວດ້ານກະສິກຳ ຂອງອາກຊັງຕິນ.ສຳລັບການຢ້ຽມຢາມປະເທດເປຣູ ແຕ່ວັນທີ 28-29 ສີງຫາ 2007 ນັ້ນ ທ່ານຮອງນາຍົກລັດຖະມົນຕີ ດຣ. ທອງລຸນ ສີສຸລິດ ກໍໄດ້ພົບປະກັບທ່ານ ໂຈເຊ ກາຊີອາ ບີໂລເອນເດ (Jose Gacia Belaunde), ລັດຖະມົນຕີວ່າການກະຊວງການຕ່າງປະເທດເປຣູ. ໃນໂອກາດການພົບປະດັ່ງກ່າວ ທ່ານ ຮອງນາຍົກລັດຖະມົນຕີ ໄດ້ສະແດງຄວາມຫ່ວງໃຍ ແລະ ເສົ້າສະຫຼົດໃຈອີກເທື່ອໜຶ່ງ ຕໍ່ເຫດການອັນຮ້າຍແຮງຂອງແຜ່ນດິນໄຫວ ຢູ່ພາກໃຕ້ຂອງປະເທດເປຣູ ແລະ ເຊື່ອຫມັ້ນວ່າ: ສະພາບການຫຍຸ້ງຍາກຕ່າງໆ ຈະກັບຄືນຄວາມເປັນປົກກະຕິຢ່າງໄວວາແນ່ນອນ. ທ່ານຮອງນາຍົກລັດຖະມົນຕີ ໄດ້ສະແດງຄວາມຂອບໃຈ ແລະ ຮູ້ບຸນຄຸນ ຕໍ່ປະເທດເປຣູ ຊຶ່ງໃນປະຫວັດສາດຜ່ານມາ ພາຍຫຼັງສົງຄາມໂລກຄັ້ງທີສອງ ເປຣູໄດ້ຊ່ວຍປົກປອ້ງອະທິປະໄຕແຫ່ງຊາດລາວ ໃນການໄກ່ເກ່ຍບັນຫາດີນແດນ ລະຫວ່າງ ລາວ-ສະຫຍາມ (ໂດຍສະເພາະແມ່ນອະທິປະໄຕໃນ 2 ແຂວງຂອງລາວ: ໄຊຍະບູລີ ແລະ ຈຳປາສັກ). ນອກນັ້ນ ສອງຝ່າຍກໍ່ໄດ້ຢືນຢັ້ນນຳກັນ ຈະຮ່ວມກັນເສີມຂະຫຍາຍການພົວພັນຮ່ວມມືໃຫ້ແໜ້ນແຟ້ນຍິ່ງໆຂຶ້ນໃນອະນາຄົດ ໂດຍຝ່າຍເປຣູ ຈະຊຸກຍູ້ອຳນວຍຄວາມສະດວກໃຫ້ນັກລົງທືນ ກໍ່ຄືພາກສວນທຸລະກິດ ມາລົງທືນຢູ່ລາວໃນຂະແໜງການຕ່າງໆ ເປັນຕົ້ນ ຂະແໜງກະສິກຳປຸງແຕ່ງ, ຈະພິຈາລະນາກໍ່ສ້າງພະນັກງານການທູດໃຫ້ແກ່ລາວ ແລະ ຈະສະໜັບສະໜຸນລາວ ໃນການເຂົ້າເປັນສະມາຊິກຂອງອົງການ ຄ້າໂລກ ຫຼື ອົງການ APEC ໃນອະນາຄົດ. ສອງຝ່າຍໄດ້ຮ່ວມກັນລົງນາມໃນຂໍ້ຕົກລົງ ວ່າດ້ວຍການປົກປ້ອງລິຂະສິດຊັບສິນທາງປັນຍາ ແລະ ຂໍ້ຕົກລົງ ວ່າດ້ວຍການສ້າງຕັ້ງຄະນະກຳມາທິການຮ່ວມມືລາວ-ເປຣູ. ນອກຈາກນັ້ນ ຄະນະຜູ້ແທນລາວ ຍັງໄດ້ແລກປ່ຽນ ຖອດຖອນ ບົດຮຽນດ້ານການຄ້າ-ການລົງທຶນ ກັບເຈົ້າໜ້າທີ່ການຄ້າ ແລະ ການລົງທຶນຕ່າງປະເທດຂອງເປຣູຕື່ມອີກ ເພື່ອຊອກຊ່ອງທາງທີ່ຈະຊຸກຍູ້ການສົ່ງເສີມການຄ້າ ແລະ ການລົງທຶນ ລະຫວ່າງສອງປະເທດໃຫ້ເກີດດອກອອກຜົນຍິ່ງຂຶ້ນ./.
ກັບສາລະບານ
