ກະຊວງສຶກສາມອບຄູ ແລະ ອຸປະກອນການຮຽນການສອນໃຫ້ບ້ານ ຜາຫລັກ
*(ຂປລ): ກະຊວງສຶກສາທິການ ຮ່ວມກັບ ພະແນກສຶກສາແຂວງ ວຽງຈັນ ໄດ້ມອບ ຄູສອນ ແລະ ອຸປະກອນການຮຽນການສອນ ໃຫ້ບ້ານພັດທະນາຜາຫລັກ ເມືອງກາສີ ແຂວງວຽງຈັນ, ທັງນີ້ ກໍເພື່ອຕອບສະຫນອງຕາມແນວທາງນະໂຍບາຍຂອງ ພັກ- ລັດຖະບານ ໃນການພັດທະນາວຽກງານການ ສຶກສາ ເຮັດໃຫ້ປະຊາຊົນລາວໃນຂອບເຂດທົ່ວປະເທດ ສາມາດອ່ານອອກ ຂຽນໄດ້ ແລະຈົບການສຶກສາຂັ້ນພື້ນຖານ ໂດຍສະເພາະແມ່ນ ລູກຫລານຂອງປະຊາຊົນລາວ ບັນດາເຜົ່າທີ່ດຳລົງຊີວິດຢູ່ເຂດຫາງໄກສອກຫລີກ.ໃນໂອກາດສົກຮຽນໃຫມ່ປີ 2007- 2008 ນີ້. ບ້ານພັດທະນາຜາຫລັກ ແມ່ນບ້ານສ້າງຕັ້ງຂື້ນໃຫມ່ ປະຈຸບັນມີ 11 ຫລັງຄາເຮືອນ ມີປະຊາກອນທັງຫມົດ 66 ຄົນ, ໃນນັ້ນມີເດັກນ້ອຍໃນເກນອາຍຸເຂົ້າຮຽນ 20 ກວ່າຄົນ. ເຂົາເຈົ້າເຫລົ່ານີ້ ແມ່ນປະຊາຊົນລາວເຜົ່າມົ້ງ ທີ່ຖືກຕົວະຍົວະຫລອກລວງ ໃຫ້ຂ້າມໄປຢູ່ ບ້ານ ຫ້ວຍນ້ຳຂາວ ແຂວງ ເພັດສະບູນ, ປະເທດໄທ ແລະ ລັດຖະບານລາວເຮົາໄດ້ຮັບເອົາຄືນມາ ເມື່ອກາງປີ 2007 ທີ່ຜ່ານມານີ້.ທ່ານ ສຸລິສັກ ອາສາກິດຕິຄຸນ, ເຈົ້າເມືອງໆກາສີ ໄດ້ກ່າວລະຫວ່າງການພົບປະໂອ້ລົມພໍ່ແມ່ ປະຊາຊົນໃນໂອກາດມອບອຸປະກອນການຮຽນ ພ້ອມທັງກ່າວວ່າ: ພັກ- ລັດຖະບານ ເວລາໃດກໍເປັນຫ່ວງເປັນໄຍ ແລະ ໃຫ້ຄວາມສະເຫມີພາບ ແກ່ປະຊາຊົນບັນດາເຜົ່າ ຢ່າງທົ່ວເຖິງ ໂດຍສະເພາະ ແມ່ນດ້ານການສຶກສາ, ການທີ່ກະຊວງສຶກສາທິການໄດ້ນຳເອົາຄູ ແລະ ອຸປະກອນການຮຽນການສອນມາມອບໃຫ້ແກ່ພໍ່ - ແມ່ ປະຊາ ຊົນ ບ້ານພັດທະນາຜາຫລັກນີ້ຖືໄດ້ວ່າ ເປັນບາດກ້າວທຳອິດທີ່ລູກຫລານຈະໄດ້ມີໂອກາດເຂົ້າຮຽນ ແລະຈະກາຍເປັນຊັບພະຍາກອນທີ່ດີຂອງປະເທດຊາດໃນອະນາຄົດ ເພື່ອປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕໍ່ໄປ. ທ່ານ ຢົງເຊີ ຮອງຫົວຫນ້າພະແນກສຶກສາແຂວງ ວຽງຈັນ ກໍໄດ້ກ່າວວ່າ: ພົນລະເມືອງລາວທຸກຄົນ ທຸກຊົນຊາດ ຊົນເຜົ່າ ແມ່ນມີສິດສະເຫມີພາບ ທຸກຄົນມີໂອກາດໄດ້ຮັບການສຶກສາເທົ່າທຽມກັນ, ຄົນມົ້ງພວກເຮົາ ຫລາຍຄົນຈົບການສຶກສາຂັ້ນສູງ ແລະ ໄດ້ດຳລົງຕຳແຫນ່ງທີ່ສຳຄັນຫລາຍໆທ່ານ. ດັ່ງນັ້ນ ຈຶ່ຶງຮຽກຮ້ອງໃຫ້ ພໍ່ແມ່ ປະຊາຊົນຈົ່ງເອົາໃຈໃສ່ຊຸກຍູ້ສົ່ງເສີມ ໃຫ້ລູກຫລນຂອງຕົນໄດ້ເຂົ້າຮຽນ, ມີການສຶກສາເທົ່ານັ້ນ ຈຶ່ງສາມາດຊ່ວຍໃຫ້ທຸກຄົນຫລຸດພົ້ນອອກຈາກການຕົວະຍົວະຫລອກລວງ, ຫລຸດພົ້ນອອກຈາກຄວາມທຸກຍາກ ແລະ ປະກອບສ່ວນເຂົ້າໃນການພັດທະນາປະເທດໃຫ້ຈະເລີນກ້າວຫນ້າໄປໄດ້. ນາງ ມົວຊົງ ຊຶ່ງແມ່ນຄູອາສາສະຫມັກ ກໍໄດ້ກ່າວວ່າ: ນາງມີຄວາມຮູ້ສຶກດີໃຈທີ່ສຸດທີ່ໄດ້ມີໂອກາດ ມາຮັບໃຊ້ສິດສອນລູກຫລານຂອງປະຊາຊົນເຜົ່າມົ້ງ ເຊິ່ງແມ່ນເຜົ່າດຽວກັນ ເຖິງແມ່ນວ່າຈະພົບຄວາມຫຍຸ້ງ ຍາກ ແນວໃດກໍຕາມ ນາງຈະອົດທົນຜ່ານຜ່າເພື່ອອະນາຄົດອັນຍາວໄກ ຂອງລູກຫລານ. ອຸປະກອນການຮຽນ - ການສອນ ທີ່ນຳມາມອບຄັ້ງນີ້ ແມ່ນການປະກອບສ່ວນຂອງມູນນິທິສົ່ງເສີມການສຶກສາ. ນອກນັ້ນ, ຂັ້ນເທິງຍັງໄດ້ສະຫນອງອຸປະກອນຮັບສັນຍານດາວທຽມ ເພື່ອໃຫ້ພະນັກງານພໍ່ - ແມ່ປະຊາຊົນບ້ານບ້ານພັດທະນາຜາຫລັກ ໄດ້ມີໂອກາດເບິ່ງໂທລະພາບ ແລະ ຮັບຂໍ້ມູນຂ່າວສານ ກ່ຽວກັບການສ້າງສາພັດທະນາປະເທດຊາດພາຍໃຕ້ການນຳພາຂອງພັກປະຊາຊົປະຕິວັດລາວໃນແຕ່ລະໄລຍະອີກດ້ວຍ./.
ກັບສາລະບານ
