ຍີ່ປຸ່ນຊ່ວຍເຫລືອລາວ ກະກຽມເປັນເຈົ້າພາບຈັດກິລາຊີເກມປີ2009
*(ຂປລ) ລັດຖະບານຍີ່ປຸ່ນ ຕົກລົງໃຫ້ການຊ່ວຍເຫລືອລ້າສຳລັບ ໂຄງການກໍ່ສ້າງສູນກິລາ ບູໂດ ລາວ - ຍີ່ປຸ່ນ, ມູນຄ່າ 400ລ້ານ ເຢັນແລະ ໂຄງການຊ່ວຍເຫລືອນອກໂຄງການ Non-Project, ມູນຄ່າ 1.200 ລ້ານເຢັນ ຊຶ່ງ ການຊ່ວຍເຫລືອຂອງລັດຖະບານ ແລະ ປະຊາຊົນ ຍີ່ປຸ່ນ ຄັ້ງນີ້ ເປັນການປະກອບສ່ວນອັນສຳຄັນ ເຂົ້າໃນ ການກະກຽມເປັນເຈົ້າພາບໃນການຈັດກິລາຊີເກມ ຂອງ ສປປລາວ ໃນປີ 2009. ພ້ອມນັ້ນ ກໍ່ຍັງເປັນການປະກອບສ່ວນເຂົ້າໃນການພັດທະນາພື້ນຖານໂຄງລ່າງເສດຖະກິດ, ການພັດທະນາທາງດ້ານກະສິກຳ, ຊົນນະບົດ, ການສຶກສາ, ວັດທະນະທຳ ແລະ ສາທາລະນະສຸກຂອງສປປລາວ ອີກດ້ວຍ. ໃນຕອນບ່າຍຂອງວັນທີ 31 ສິງຫາ 2007 ຢູ່ທີ່ກະຊວງການຕ່າງປະເທດໄດ້ຈັດພິທີລົງນາມໃນເອກະສານແລກປ່ຽນ ເພື່ອຮັບເອົາການຊ່ວຍເຫລືອລ້າ ຈາກລັດຖະບານຍີ່ປຸ່ນ ສຳລັບ 2 ໂຄງການຄື: 1. ໂຄງການກໍ່ສ້າງສູນກິລາ ບູໂດ ລາວ - ຍີ່ປຸ່ນ, ມູນຄ່າ 400 ລ້ານເຢັນ 2. ໂຄງການຊ່ວຍເຫລືອນອກໂຄງການ Non-Project, ມູນຄ່າ 1.200 ລ້ານເຢັນ ທ່ານ ບຸນເກີດ ສັງສົມສັກ ລັດຖະມົນຕີຊ່ວຍວ່າການ ກະຊວງການຕ່າງປະເທດ, ຕາງຫນ້າໃຫ້ລັດຖະບານ ແຫ່ງ ສປປລາວ ລົງນາມໃນເອກະສານແລກປ່ຽນຄັ້ງນີ້ ຮ່ວມກັບ ທ່ານ ມາໂກໂຕະ ກັດຊຶຣະ ເອກອັກຄະຣາຊະທູດ ຍີ່ປຸ່ນປະຈຳລາວ ຕາງຫນ້າໃຫ້ລັດຖະບານຍີ່ປຸ່ນ. ໃນໂອກາດນີ້ ທ່ານ ບຸນເກີດ ສັງສົມສັກ ໄດ້ຕາງຫນ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ຢ່າງຈິງໃຈໄປຍັງ ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫລື່ອອັນລ້ຳຄ່າ ແລະ ຢຶນຢັນວ່າ ຈະນຳໃຊ້ ທຶນດັ່ງກ່າວໃຫ້ເກີດຜົນປະໂຫຍດ ຕາມຈຸດປະສົງຂອງລັດຖະບານ ແລະ ປະຊາຊົນ ຍີ່ປຸ່ນ./
ກັບສາລະບານ
