ລາວ-ຫວຽດນາມເພີ່ມທະວີເປີດກວ້າງການພົວພັນການຄ້ານຳກັນ
*(ຂປລ): ລາວ ແລະຫຽວດນາມ ໄດ້ວາງເປົ້າຫມາຍມູນຄ່າການຄ້າ ລະຫວ່າງສອງປະເທດ ໃຫ້ໄດ້ 1 ຕື້ ໂດລາສະຫະລັດ ໃນປີ 2010 ແລະ 2 ຕື້ໂດລາສະຫະລັດ ໃນປີ 2015 ແນໃສ່ເພີ່ມທະວີການພົວພັນ ການຄ້າ ລະຫວ່າງສອງປະເທດ ໃຫ້ຫລາຍຂື້ນ ເລື້ອຍໃນຕໍ່ໜ້າ.ເພື່ອບັນລຸເປົ້າຫມາຍດັ່ງກ່າວສອງກະຊວງອຸດສາຫະກຳແລະການຄ້າກຳລັງດຳເນີນການຄົ້ນຄ້ວາໂຄງ ການພັດທະນາການຄ້າລາວ -ຫວຽດນາມ ໃນໄລຍະ ປີ 2008- 2015 ເພື່ອນຳສະເໜີຕໍ່ລັດຖະບານ ສອງປະເທດພິຈາລະນາ ໃນເດືອນ ຕຸລາ 2007, ແນ່ນອນ ຜູ້ຂັບ ເຄື່ອນຕົ້ນຕໍຂອງໂຄງການດັ່ງກ່າວ ແມ່ນພາກທຸລະກິດຂອງສອງປະເທດ ຈຶ່ງຈະສາມາດບັນລຸໄດ້ ຕາມ ເປົ້າ ຫມາຍທີ່ວາງໄວ້ນັ້ນ. ບັນດານັກທຸລະກິດ ລາວ ແລະ ຫວຽດນາມ ໄດ້ດຳເນີນການພົບປະປຶກສາຫາລື ແລະ ສົນທະນາກັນ ໃນລະຫວ່າງການຈັດກອງປະຊຸມ ໃນຕອນເຊົ້າວັນທີ 31 ສິງຫາ 2007. ທີ່ສູນການຄ້າລາວ-ໄອເຕັກ ນະຄອນຫລວງວຽງຈັນ ຊຶ່ງມີທ່ານ ດຣ. ນາມ ວິຍະເກດ, ລັດຖະມົນຕີວ່າການກະຊວງ ອຸດສາຫະກຳ ແລະ ການຄ້າ, ທ່ານ ເລ ຫວງ ກວນ ປະທານຄະນະກຳມະການ ປະຊາຊົນນະຄອນໂຮ່ຈິມິນ, ທ່ານຮອງເຈົ້າຄອງນະຄອນຫລວງວຽງຈັນ, ລັດຖະມົນຕີຊ່ວຍວ່າການກະຊວງອຸດສະຫະກຳ ແລະ ການຄ້າ ສສ ຫວຽດນາມ ພ້ອມດ້ວຍນັກທຸລະກິດ ລາວ-ຫວຽດນາມ ເຂົ້າຮ່ວມ.ລາວ ແລະ ຫວຽດນາມໄດ້ເຊັນສັນຍາການຄ້ານຳກັນ ໃນປີ 1998 ເພື່ອສົ່ງເສີມ ແລະເອື້ອອຳນວຍ ແກ່ການພົວພັນການຄ້າ.ໃນວັນທີ 28 ກໍລະກົດ 2005 ສອງຝ່າຍໄດ້ຮ່ວມລົງນາມ ຂໍ້ຕົກລົງລະຫວ່າງ ສອງ ກະຊວງການຄ້າກ່ຽວ ກັບ ການໃຫ້ບູລິມະສິດອັດຕາພາສີຂາເຂົ້າ ຊຶ່ງກັນ ແລະ ກັນ ສຳລັບສິນຄ້າຂອງ ສປປ ລາວ ແລະຫວຽດນາມ ແລະໄດ້ປັບປຸງເພີ່ມເຕີມໃນວັນທີ 19/12/2006.ການຈັດຕັ້ງປະຕິບັດຂໍ້ຕົກລົງ ຂອງສອງກະຊວງການຄ້າດັ່ງກ່າວ ໄດ້ເຮັດໃຫ້ນັກທຸລະກິດ ຂອງສອງ ປະເທດ ມີຄວາມກະຕືລືລົ້ນ ໃນການຊອກຫາຄູ່ຄ້າ ແລະ ຄ້າຂາຍຮ່ວມກັນ. ນອກຈາກຫົວໜ່ວຍທຸລະກິດ ທີ່ເຄີຍຄ້າ ຂາຍຮ່ວມກັນແລ້ວ ຍັງເກີດມີໜໍ່ແໜງທຸລະກິດໃໝ່ຂື້ນເລື້ອຍໆ ໃນປີ 2006 ມູນຄ່າການຄ້າ ລະຫວ່າງ ສອງປະເທດບັນລຸໄດ້ 260 ລ້ານໂດລາສະຫະລັດ ເພີ່ມຂື້ນ 83% ເມື່ອທຽບໃສ່ປີ 2004 ແລະ ສະເພາະໃນ 4 ເດືອນຕົ້ນປີ 2007 ບັນລຸໄດ້ 92,3 ລ້ານ ໂດລາສະຫະລັດ ເພີ່ມຂື້ນ 21,4% ເມື່ອທຽບໃສ່ໄລຍະດຽວກັນຂອງປີ 2006 ./
ກັບສາລະບານ
