ນາຍົກລັດຖະມົນຕີ ສຳເລັດການເຂົ້າຮ່ວມ ສະຫລອງວັນປະກາດເອກະລາດມາເລເຊຍ
*(ຂປລ): ພະນະທ່ານ ບົວສອນ ບຸບຜາວັນ, ນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະ ໄດ້ເດີນທາງກັບຄືນປະເທດ ດ້ວຍ ຄວາມສະຫວັດດີພາບ ໃນວັນທີ 1 ກັນຍາ 2007 ນີ້ ພາຍຫລັງທີ່ໄດ້ສຳເລັດການເຂົ້າຮ່ວມພິທີສະເຫລີມສະຫຼອງ ວັນປະກາດເອກະລາດຂອງມາເລເຊຍຄົບຮອບ 50 ປີ (1957-2007) ຊຶ່ງໄດ້ຈັດຂຶ້ນໃນວັນທີ 31 ສິງຫາຜ່ານມານີ້ ທີ່ນະຄອນຫລວງ ກົວລາລຳເປີ ຕາມຄຳເຊີນ ຂອງພະນະ ທ່ານ ດາໂຕະ ເສຣິ ອັບດູນລາ ອາຣມັດ ບາດາວີ ນາຍົກລັດຖະມົນຕີ ແຫ່ງ ມາເລເຊຍ. ໃນໄລຍະເຂົ້າຮ່ວມງານດັ່ງກ່າວ ພະນະທ່ານ ບົວສອນ ບຸບຜາວັນ ໄດ້ເຄື່ອນໄຫວຮ່ວມກັບບັນດາປະມຸກລັດ ແລະ ຫົວໜ້າຄະນະລັດຖະບານຈາກ 17 ປະເທດ ເປັນຕົ້ນແມ່ນໄດ້ເຂົ້າຮ່ວມຊົມ ການເດີນສວນສະ ໜາມ ທີ່ຈັດຂຶ້ນຢູ່ສະໜາມຫລວງເອກະລາດ (ເມີດິກາ), ເຂົ້າຮ່ວມງານລ້ຽງນ້ຳຊາ ຈັດໂດຍເຈົ້າຊິວິດແຫ່ງມາເລເຊຍ ເພື່ອເປັນກຽດແກ່ຄະນະຜູ້ແທນຕ່າງປະເທດ ແລະ ໄດ້ເຂົ້າຮ່ວມຊົມພິທີສະເຫລີມສະຫລອງອັນຍິ່ງໃຫຍ່ ຢູ່ສະໜາມກິລາເມີດິກາ. ພິທີສະເຫລີມສະຫລອງວັນເອກະລາດ ຄົບຮອບ 50 ປີ ຂອງປະເທດມາເລເຊຍ ໄດ້ຈັດຂຶ້ນຢ່າງໃຫຍ່ໂຕມະໂຫລານ ໂດຍມີການເຂົ້າຮ່ວມຂອງມວນຊົນ ຢ່າງຫລວງຫລາຍ ເຊິ່ງເປັນການສະແດງອອກເຖິງຄວາມ ເປັນໜຶ່ງອັນດຽວ ແລະ ຄວາມປອງດອງຂອງປະຊາຊົນ ທີ່ປະກອບດ້ວຍຫລາຍເຊື້ອຊາດ, ສາສະໜາ ແລະ ມີຄວາມມຸ້ງໝັ້ນພັດທະນາປະເທດ ສູ່ຄວາມຈະເລີນວັດທະນາ. ການສະເຫລີມສະຫລອງ ຍັງເປັນການສະແດງອອກເຖິງຄວາມເອກອ້າງທະນົງໃຈ ຕໍ່ຜົນສຳເລັດອັນຍິງໃຫຍ່ໃນ 50 ປີຜ່ານມາ ພາຍໃຕ້ການນຳພາ ຂອງນາຍົກລັດຖະມົນຕີ ມາເລເຊຍ 5 ທ່ານ ນັບແຕ່ປີ 1957 ເປັນຕົ້ນມາຈົນເຖິງປະຈຸບັນ ຊຶ່ງເຮັດໃຫ້ມາເລເຊຍໄດ້ຮັບການພັດທະນາ ຈາກການເປັນປະເທດກະສິກຳຫລ້າຫລັງ ກາຍມາເປັນປະເທດກະສິກຳ-ອຸດສາຫະກຳພັດທະນາຢ່າງວ່ອງໄວ./.
ກັບສາລະບານ
