ເພີ່ມຄວາມຮັບຮູ້ເຂົ້າໃຈ ຕໍ່ ວຽກງານສາສະຫນາ-ຊົນເຜົ່າ-ຊັ້ນຄົນ
*(ຂປລ): ສູນກາງແນວລາວສ້າງຊາດ ໄດ້ຈັດຕັ້ງການຍົກລະດັບຄວາມຮູ້ຄວາມເຂົ້າໃຈຕໍ່ວຽກງານສາສະຫນາ, ຊົນເຜົ່າ ແລະຊັ້ນ ຄົນໂດຍທ່ານຕົງເຢີທໍ ,ຮອງປະທານຜູ້ປະຈຳການສູນກາງແນວລາວສ້າງຊາດໃຫ້ກຽດເປັນປະທານຊຶ່ງມີບັນດາທ່ານຮອງປະທານ, ຫົວຫນ້າກົມ, ຕົວແທນສາສະຫນາທີ່ມີການຈັດຕັ້ງຖືກຕ້ອງຢູ່ລາວ ແນວລາວສ້າງຊາດ ແລະ ປກສ ຂັ້ນແຂວງ, ຂັ້ນເມືອງ ໃນທົ່ວນະຄອນຫລວງ ແລະ ແຂວງວຽງຈັນ ເຂົ້າຮ່ວມຈຳນວນ 70 ກວ່າຄົນ ແລະ ພະສົງ 5 ອົງ. ການຍົກລະດັບທີ່ຈັດຂຶ້ນໃນຮູບແບບການຝຶກອົບຮົມຄັ້ງນີ້ ໄດ້ດຳເນີນເປັນເວລາ 2 ວັນ (28-29/8/2007) ໂດຍຜູ້ເຂົ້າຮ່ວມໄດ້ຮຽນຮູ້ ແລະ ເຊື່ອມຊຶມ 3 ເນື້ອໃນເອກະສານ ວຽກງານສາສະຫນາ ເຊິ່ງມາຮອດປະຈຸບັນ ຢູ່ປະເທດລາວມີ 4 ສາສະຫນາ ທີ່ໄດ້ມີການຈັດຕັ້ງທີ່ຖືກຕ້ອງ, ເອກະສານຄວາມຮູ້ພື້ນຖານ ກ່ຽວກັບວຽກງານຊົນເຜົ່າ ໂດຍສັງລວມວ່າ: ປະຈຸບັນປະເທດລາວມີ 49 ຊົນເຜົ່າ ແລະ ເອກະສານພາລະບົດບາດ ຄວາມສຳຄັນ ຂອງຊັ້ນຄົນ ແລະ ອົງການຈັດຕັ້ງສັງຄົມ, ພ້ອມກັນນັ້ນ ສຳມະນາກອນຍັງໄດ້ຜັດປ່ຽນກັນຂຶ້ນປະກອບຄຳຄິດ ຄຳເຫັນ ຢ່າງກົງໄປກົງມາແລະ ເລິກເຊິ່ງ ເພື່ອເຮັດໃຫ້ພະນັກງານ, ນັກບວດ, ສາສະນິກະຊົນ, ສາສະຫນາຕ່າງໆ, ຕົວແທນຊົນເຜົ່າຕ່າງໆ ແລະ ຕົວແທນຊັ້ນຄົນຕ່າງໆ ໄດ້ເພີ່ມຄວາມຮັບຮູ້ ຄວາມເຂົ້າໃຈ ຕໍ່ວຽກງານສາສະຫນາ, ວຽກງານຊົນເຜົ່າ ແລະ ວຽກງານຊັ້ນຄົນ ເຊິ່ງພັກ-ລັດ ຍາມໃດກໍມີຄວາມເປັນຫ່ວງເປັນໄຍ ຕໍ່ປະຊາຊົນລາວທຸກຊົນເຜົ່າ, ທຸກສາສະຫນາ ແລະ ຊັ້ນຄົນທຸກເພດໄວ ເພາະວຽກນີ້ເປັນວຽກທີ່ລະອຽດອ່ອນ ແລະ ມີຄວາມສຳຄັນຫລາຍ, ພັກ- ລັດ ກໍຄືສູນກາງແນວລາວສ້າງຊາດ ໄດ້ເອົາໃຈໃສ່ ໃນການຄຸ້ມຄອງ ແລະ ປົກປ້ອງ, ການຊີ້ນຳນຳພາ ໃນການເຄື່ອນໄຫວວຽກງານ ແລະ ການຈັດຕັ້ງປະຕິບັດ ໃຫ້ຖືກຕ້ອງສອດຄ່ອງກັບລະບຽບກົດຫມາຍ ແລະແນວ ທາງນະໂຍບາຍ ຂອງພັກ ແລະ ລັດ. ທ່ານ ຕົງເຢີທໍ ໄດ້ກ່າວເນັ້ນບາງຕອນສຳຄັນວ່າ: ປະເທດລາວ ເປັນປະເທດຫນຶ່ງ ທີ່ຕົກເປັນຫົວເມືອງຂຶ້ນ ຂອງຈັກກະພັດຕ່າງດ້າວມາຫລາຍເຊັ່ນຄົນ. ຈົນມາເຖິງວັນທີ 2 ທັນວາ 1975 ຈຶ່ງສາມາດສະຖາປະນາ ເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ໂດຍສັນຕິວິທີແບບບໍ່ມີການນອງເລືອດ ແລະ ບໍ່ມີສຽງປືນແຕກ ທັງຫມົດນັ້ນ ແມ່ນຍ້ອນແນວທາງການນຳພາ ຂອງພັກ ທີ່ຖືກຕ້ອງ ແລະ ເປັນທຳ, ຍ້ອນມີກຳລັງແຮງສັງລວມ ຂອງປະຊາຊົນລາວບັນດາເຜົ່າ, ສາສະຫນາ ແລະ ຊັ້ນຄົນ ທຸກເພດໄວ ໄດ້ຮ່ວມແຮງຮວມໃຈກັນລຸກຂຶ້ນຢຶດອຳນາດມາມື. ມາຮອດປະຈຸບັນນີ້ ເປັນເວລາ 30 ກວ່າປີ ທີ່ລາວເຮົາ ໄດ້ຮັບການສ້າງສາພັດທະນາປະເທດຊາດ, ແຕ່ອິດທິກຳລັງປໍລະປັກ ຍັງຫາທຸກວິທີ ເພື່ອຫວັງມ້າງເພທຳລາຍລະບອບໃຫມ່ ດ້ວຍຫລາຍຮູບການ. ສະນັ້ນ ໃຫ້ທຸກສາສະຫນາ, ຊົນເຜົ່າ ແລະ ຊັ້ນຄົນ ເພດໄວ ຈົ່ງພ້ອມພຽງກັນ ຕ້ານກົນອຸບາຍດັ່ງກ່າວ ເດີນຕາມແນວທາງຂອງພັກ-ລັດ, ພ້ອມກັນເຕົ້າໂຮມ ຄວາມສາມັກຄີປອງດອງໃຫ້ເປັນປຶກແຜ່ນແຫນ້ນຫນາ ພາຍໃຕ້ການນຳພາຂອງພັກ. ທ່ານຍັງກ່າວຕື່ມອີກວ່າ: ການຳຂອງແຕ່ລະສາ ສະຫນາ, ອຳນາດການປົກຄອງ, ເຈົ້າກົກເຈົ້າເຫລົ່າ ຂອງແຕ່ລະຊົນເຜົ່າ, ຊັ້ນຄົນໃນຂັ້ນຕ່າງໆ ຈົ່ງເປັນແບບ ຢ່າງ ໃນການນຳພາ ການເຄື່ອນໄຫວຕ່າງໆ ຊ່ວຍສຶກສາອົບຮົມ ໃຫ້ສາສະນິກະຊົນ ແລະ ປະຊາຊົນບັນດາເຜົ່າ ເຂົ້າໃຈຢ່າງເລິກເຊິ່ງ ແລະ ເຊື່ອມຊຶມແນວທາງນະໂຍ ບາຍຂອງພັກ-ລັດ ຢ່າງແທ້ຈິງ./.
ກັບສາລະບານ
