ຜູ້ປະຈຳການລັດຖະບານ ຕ້ອນຮັບຜູ້ແທນອົງການຯຄ້າໂລກ
*(ຂປລ): ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ປະຈຳການລັດຖະບານ ທັງເປັນປະທານ ຄະນະປະສານ ງານ ລະດັບຊາດວ່າດ້ວຍການເຊື່ອມໂຍງເສດຖະກິດກັບສາກົນ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ອາຣິບ ຮຸດເຊັນ ຫົວໜ້າພະແນກການເຂົ້າເປັນສະມາຊິກ ອົງການຯຄ້າໂລກ ໃນຕອນແລງຂອງວັນທີ 30 ສິງຫາ 2007 ນີ້ທີ່ນະຄອນຫລວງວຽງຈັນ ໂອກາດຢ້ຽມຢາມ ທ່ານພວມເຄື່ອນໄຫວ ຢ້ຽມຢາມ ສປປ ລາວ.ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ໄດ້ສະແດງຄວາມຊົມເຊີຍ ແລະ ຕີລາສູງຕໍ່ການຢ້ຽມຢາມລາວ ຂອງທ່ານ ອາຣິບ ຮຸດເຊັນ ໃນຄັ້ງນີ້ ພ້ອມທັງສະແດງຄວາມຂອບ ອົກຂອບໃຈ ຕໍ່ການອຳນວຍຄວາມສະດວກ ແລະ ໃຫ້ການສະໜັບສະໜູນໃນການກະກຽມ ແລະ ເຈລະຈາເຂົ້າເປັນສະມາຊິກ ອົງການຯຄ້າໂລກຂອງ ສປປ ລາວ ໂດຍສະເພາະແມ່ນການຈັດກອງປະຊຸມໜ່ວຍປະຕິບັດງານທັງສອງຄັ້ງທີ່ຜ່ານມາ. ທ່ານສົມສະຫວາດ ເລັ່ງສະຫວັດ ຍັງໄດ້ຊີ້ແຈງຕື່ມວ່າ: ການເຂົ້າເປັນສະມາຊິກ ອົງການຯຄ້າໂລກ ແມ່ນມີຄວາມຈຳເປັນ ແລະ ພາວະວິໄສ ສຳລັບ ສປປ ລາວ ເພື່ອເພີ່ມທະວີການຮ່ວມມືກັບຕ່າງປະເທດ ແລະ ຍາດແຍ່ງການສະໜັບສະໜູນ ຊ່ວຍເຫລືອ ຈາກວົງຄະນາຍາດສາກົນ ພ້ອມທັງສ້າງຄວາມເຊື່ອໝັ້ນແກ່ນັກລົງທຶນພາຍໃນ ແລະ ຕ່າງປະເທດ ເພື່ອເສີມກຳລັງແຮງສັງລວມ ພາຍໃນ ສົມທົບກັບການເຊື່ອມໂຍງກັບເສດຖະກິດພາຍນອກ, ສ້າງເງື່ອນໄຂໃຫ້ເສດຖະກິດຂະຫຍາຍຕົວຢ່າງແຂງແຮງ ແລະ ໝັ້ນທ່ຽງ ແນໃສ່ບັນລຸຄາດໝາຍການພັດທະນາເສດຖະກິດ-ສັງຄົມ ແຫ່ງຊາດ. ທ່ານສົມສະຫວາດ ເລັ່ງສະຫວັດ ໃຫ້ທັດສະນະວ່າ: ການຢ້ຽມຢາມລາວຂອງ ທ່ານ ອາຣິບ ຮຸດເຊັນ ຄັ້ງນີ້ ມີຄວາມສຳຄັນອັນໃຫຍ່ຫລວງ ຊຶ່ງຈະສ້າງຄວາມສຳພັນ ສັນທະໄມຕີອັນດີງາມ ລະຫວ່າງຜູ້ນຳຂັ້ນສູງຂອງລາວ ກັບກອງເລຂາອົງການການຄ້າໂລກ ໃຫ້ມີຄວາມເຂົ້າໃຈຢ່າງຈະແຈ້ງ ກ່ຽວກັບການພັດທະນາເສດຖະກິດໃນ ສປປ ລາວ, ທັງຮັບຊາບເຖິງເຈດຈຳນົງ ຂອງ ສປປ ລາວ ໃນການເຂົ້າເປັນສະມາຊິກອົງການຯຄ້າໂລກ. ເນື່ອງຈາກລັດຖະບານ ເຫັນໄດ້ຜົນປະໂຫຍດຈາກຂະບວນການເຂົ້າເປັນສະມາຊິກ ໂດຍສະເພາະການຊ່ວຍພັດທະນາລະບຽບກົດໝາຍ ໃນ ສປປ ລາວ ໃຫ້ມີຄວາມໂປ່ງໃສກວ່າເກົ່າ ຕາມລະບຽບຫລັກການຂອງການຄ້າສາກົນ ແລະ ການອຳນວຍຄວາມສະດວກ ໃຫ້ແກ່ການດຳເນີນທຸລະກິດອີກດ້ວຍ.ຢ່າໃດກໍຕາມ ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ຍັງໄດ້ຮຽກຮ້ອງໃຫ້ທ່ານ ອາຣິບ ຮຸດເຊັນ ກໍຄືພະແນກການເຂົ້າເປັນສະມາຊິກອົງການຯຄ້າໂລກ ສືບຕໍ່ສະໜັບສະໜູນ ໃຫ້ ສປປ ລາວໄດ້ເຂົ້າເປັນສະມາຊິກໂດຍໄວ ແລະ ສອດຄ່ອງກັບເງື່ອນໄຂຂອງປະເທດດ້ອຍພັດທະນາ ແລະ ຊ່ວຍວຽກງານພັດທະນາຊັບພະຍາກອນມະນຸດ./.
ກັບສາລະບານ
