ຄຳເຫັນຂອງທ່ານເອກອັກຄະລັດຖະທູດ ສສ ຫວຽດນາມ ປະຈຳ ລາວ (ໃນໂອກາດລະນຶກວັນຊາດຫວຽດນາມຄົບຮອບ 62 ປີ)
*(ຂປລ): ທ່ານ ຫງວຽນ ຮຸຍ ກວາງ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ປະຈຳ ສປປ. ລາວ ໄດ້ມີຄຳເຫັນ ໃນໂອກາດລະນຶກວັນຊາດ ຄົບຮອບ 62 ປີ ຊຶ່ງມີບາງຕອນວ່າ: ຂ້າພະເຈົ້າ ຂໍສົ່ງຄວາມຄຳນັບອັນອົບອຸ່ນ ແລະ ອວຍພອນໄຊອັນປະເສີດ ມາຍັງບັນດາເພື່ອນມິດ ທັງຫລາຍ ຈົ່ງມີແຕ່ຄວາມຜາສຸກ ແລະ ປະສົບຜົນສຳເລັດທຸກປະການ ຕໍ່ພົນລະເມືອງຫວຽດນາມທີ່ພວມດຳລົງຊີວິດ, ເຮັດວຽກ, ອອກແຮງງານ ແລະ ຮ່ຳຮຽນຢູ່ບົນດິນແດນປະເທດລາວອ້າຍນ້ອງ ທີ່ສວຍງາມ. ການສະເຫລີມວັນຊາດຄົບຮອບ 62 ປີ ຂອງພວກຂ້າພະເຈົ້າປີນີ້ ມີຄວາມຫມາຍສຳຄັນເປັນພິເສດເພາະວ່າ ການສະເຫລີມສະຫລອງວັນຊາດດັ່ງກ່າວ ດຳເນີນໄປທ່າມກາງບັນຍາກາດ ແຫ່ງຄວາມເບີກບານມ່ວນຊື່ນ ສະເຫລີມສະຫລອງສອງວັນປະຫວັດສາດຄື: ວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 30 ປີ, ວັນສ້າງຕັ້ງສາຍພົວພັນການທູດ ຫວຽດນາມ-ລາວ ຄົບຮອບ 45 ປີ ພວມດຳເນີນໄປຢ່າງຄຶກຄື້ນ ທົ່ວເຖິງ ບົນດິນແດນສອງປະເທດ ຫວຽດນາມ ແລະ ລາວ ພວກເຮົາ.ກ່ອນຫນ້ານີ້ 62 ປີຄື: ໃນວັນທີ 19 ສິງຫາ 1945 ດ້ວຍການຕໍ່ສູ້ ເພື່ອປົດປ່ອຍຕົນເອງ ປະຊາຊົນຫວຽດນາມ ໄດ້ໂຄ່ນລົ້ມແອກປົກຄອງຂອງລັດທິຟາຊິດ, ລ່າເມືອງຂຶ້ນ, ສະຖາປະນາ ປະເທດສາທາລະນະລັດ ປະຊາຊົນ ຫວຽດນາມ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ກັນຍາ 1945, ປະຈຸບັນ ແມ່ນ ສສ ຫວຽດນາມ. ໃນໄລຍະທາງກວ່າ 2/3 ສະຕະວັດ ນັບແຕ່ມື້ປະເທດຫວຽດນາມໃຫມ່ ໄດ້ມີຊື່ຢູ່ໃນແຜນທີ່ການເມືອງໂລກ, ປະຊາ ຊົນຫວຽດນາມ ໄດ້ດຳເນີນການຕໍ່ສູ້ຢ່າງອົງອາດກ້າຫານ ເພື່ອປົກປັກຮັກສາອິດສະລະພາບ ແລະ ເອກະລາດ ແຫ່ງຊາດ, ທ້ອນໂຮມປະເທດເປັນອັນຫນຶ່ງອັນດຽວ, ຟຶ້ນຟູປະເທດຊາດຈາກການທຳລາຍເຜົາຜານ ຂອງສົງ ຄາມ ຕະຫລອດ 30 ກວ່າປີ ແລະ ໃນ 20 ປີມານີ້ ຫວຽດນາມ ພວມສຸມເຫື່ອແຮງປະຕິບັດການປ່ຽນແປງໃຫມ່ຢ່າງຮອບດ້ານ ເປີດກວ້າງ ແລະ ຫັນເປັນຫລາຍທິດ ຫລາຍຮູບການ ໃນການພົວພັນສາກົນ ຂອງຫວຍດນາມ, ປະຕິບັດການຫັນເປັນອຸດສາຫະກຳ ແລະ ທັນສະໄຫມ ເຮັດໃຫ້ຄວາມມຸ້ງມາດປາຖະຫນາຢ່າງແຮງກ້າ ຂອງ ປະທານໂຮ່ຈິມິນ ຜູ້ໃຫ້ກຳເນີດ ປະເທດຫວຽດນາມໃຫມ່ ກ່ອນຫນ້ານີ້ 62 ປີ ກາຍເປັນຄວາມຈິງ ແມ່ນສ້າງປະເທດຫວຽດນາມ ປະຊາຊົນຮັ່ງມີ, ປະເທດຊາດມັ້ງຄັ້ງເຂັ້ມແຂງ, ສັງຄົມມີຄວາມຍຸຕິທຳ, ປະຊາທິປະໄຕ ແລະ ສີວິໄລ ຢ່າງມີໄຊ ມີຖານະບົດບາດ ຢ່າງສົມກຽດ ຢູ່ໃນຈວົງຄະນາຍາດໂລກ. ຍ້ອນຜົນສຳເລັດຂອງການປ່ຽນແປງໃຫມ່ ນັບແຕ່ປີ 2000 ມາຮອດປະຈຸບັນ ປະເທດຊາດຫວຽດ ນາມ ພວມມີການປ່ຽນເນື້ອ ປ່ຽນຕົວໃນແຕ່ລະມື້, ເສດຖະກິດມີຈັງຫວະຂະຫຍາຍຕົວໄວພໍສົມຄວນ, ພາລະກິດຫັນເປັນອຸດສາຫະກຳ ແລະ ທັນສະໄຫມ, ການພັດທະນາເສດຖະກິດຕະຫລາດ ຕາມທິດສັງຄົມນິຍົມ ໄດ້ຮັບການຍູ້ແຮງຢ່າງບໍ່ຢຸດຢັ້ງ, ຊີວິດການເປັນຢູ່ ຂອງປະຊາຊົນໄດ້ຮັບການປົວແປງດີຂຶ້ນຢ່າງຈະແຈ້ງ, ລະບົບການເມືອງ ແລະ ກ້ອນມະຫາສາມັກຄີທົ່ວປວງຊົນ ໄດ້ຮັບການປັບປຸງ ແລະ ເພີ່ມທະວີຂຶ້ນ, ການເມືອງ, ສັງຄົມມີຄວາມສະຫງົບ, ວຽກງານປ້ອງກັນຊາດ ປ້ອງກັນຄວາມສະຫງົບ ມີຄວາມຫມັ້ນທ່ຽງ, ຖານະບົດບາດ ຂອງຫວຽດນາມ ໄດ້ຮັບການຍົກສູງເດັ່ນຂຶ້ນບົນເວທີສາກົນ ຢ່າງບໍ່ຢຸດຢັ້ງ, ກຳລັງແຮງສັງລວມ ຂອງປະເທດຊາດ ໄດ້ເພີ່ມຂຶ້ນຢ່າງຫລວງຫລາຍ ຈຶ່ງສ້າງທ່າ ແລະ ກຳລັງແຮງໃຫມ່ ໃຫ້ແກ່ປະເທດຊາດສືບຕໍ່ກ້າວຂຶ້ນຢ່າງຫນັກແຫນ້ນ. ຫວຽດນາມ ແລະ ລາວ ເປັນສອງປະເທດບ້ານໃກ້ເຮືອນຄຽງ ທີ່ຕິດພັນກັນ, ເຄີຍຮ່ວມປະຫວັດສາດ ແຫ່ງການຕໍ່ສູ້ ເພື່ອຍາດເອົາເອກະລາດ ແຫ່ງຊາດ ແລະ ປະຈຸບັນ ທັງສອງປະເທດ ພວມສູ້ຊົນ ສ້າງສາພັດທະ ນາປະເທດຊາດຂອງໃຜລາວ ແລະ ເຊື່ອມໂຍງເຂົ້າກັບສາກົນ. ສາຍພົວພັນ ລະຫວ່າງ ສອງປະເທດ ໄດ້ຜ່ານຜ່າ ຂໍ້ຫຍຸ້ງຍາກ ແລະ ການທົດສອບນາໆປະການ ກາຍເປັນສາຍພົວພັນແບບພິເສດ ທີ່ຫາຍາກ ແລະ ການຮ່ວມມືຮອບດ້ານ. ປະຊາຊົນຫວຽດນາມ ມີຄວາມເອກອ້າງທະນົງໃຈເປັນຢ່າງຍິ່ງ ຕໍ່ສາຍພົວພັນສາມັກຄີພິເສດ ແລະການຮ່ວມມືຮອບດ້ານ ຫວຽດນາມ-ລາວ ນັບມື້ນັບແຕກດອກອອກຜົນ ແລະ ຂະຫຍຍຕົວຢ່າງບໍ່ຢຸດຢັ້ງ ເມື່ອຫວນຄືນໄລຍະທາງ ແຫ່ງການພັດທະນາສາຍພົວພັນການທູດ ລະຫວາງສອງປະເທດ 45 ປີ ຜ່ານມາ ແລະ 30 ປີ ແຫ່ງການເຊັນສົນທິສັນຍາ ມິດຕະພາບ ແລະ ການຮ່ວມມື ຫວຽດນາມ-ລາວພວກເຮົາ ມີສິດເອກອ້າງທະນົງໃຈ ເພື່ອຢືນຢັນວ່າ: ຄວາມສາມັກຄີພິເສດ ສະເຫມີຕົ້ນສະເຫມີປາຍ ແລະ ການຮວມມືຮອບດ້ານ ຫວຽດ ນາມ-ລາວ ພວມໄດ້ຮັບການເສີມສ້າງ, ປ່ຽນແປງໃຫມ່ ແລະ ຂະຫຍາຍຕົວຢ່າງກວ້າງຂວາງ ເຂົ້າສູ່ລວງເລິກກວ່າເກົ່າ, ປະກອບສ່ວນເຂົ້າໃນພາລະກິດປົກປັກຮັກສາ, ສ້າງສາປະເທດຊາດ ແລະ ການພັດທະນາ ຂອງແຕ່ລະປະເທດ. ໃນແຕ່ລະບາດກ້າວຂະຫຍາຍຕົວ ຂອງສອງປະເທດຄືປະຈຸບັນນີ້ ລ້ວນແຕ່ມີການປະກອບສ່ວນ ຢາງຕັ້ງຫນ້າຂອງສອງຝ່າຍ, ເຮັດໃຫ້ສາຍພົວພັນພິເສດ ຫວຽດນາມ-ລາວ ນັບມື້ນັບສະຫນິດແຫນ້ນ ແຕກ ດອກ ອອກຜົນຍິ່ງໆຂຶ້ນ.ເນື່ອງໃນໂອກາດລະນຶກວັນປະຫວັດສາດ ອັນສະຫງ່າລາສີ ຂອງປະຊາຊົນຫວຽດນາມ, ຂ້າພະເຈົ້າ ຂໍອວຍພອນ ໄຊອັນປະສີດ ມາຍັງປະຊາຊົນລາວບັນດາເຜົ່າ ອ້າຍນ້ອງ ຈົ່ງຍາດເອົາຜົນສຳເລັດໃຫມ່ ທີ່ໃຫຍ່ຫລວງກວ່າເກົ່າ ໃນການປະຕິບັດມະຕິກອງປະຊຸມ ໃຫຍ່ ຄັ້ງທີ 8 ຂອງພັກປະຊາຊົນປະຕິວັດລາວ ກໍຄືໃນການປົກປັກຮັກສາ ແລະ ສ້າງສາປະເທດຊາດ, ປະຕິບັດເປົ້າຫມາຍສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນາຖາວອນ ຢາງມີໄຊ./.
ກັບສາລະບານ
