ບົດບາດສຳຄັນຂອງສະມາຄົມມິດຕະພາບລາວ-ເຢຍລະມັນ
*(ຂປລ) ໃນວັນທີ 23 ພະຈິກ 2007 ຢູ່ທີ່ໂຮງແຮມລ້ານຊ້າງ, ນະຄອນຫລວງວຽງຈັນ, ຄະນະບໍລິຫານງານສະມາຄົມມິດຕະພາບລາວ-ເຢຍລະມັນໄດ້ຈັດກອງປະຊຸມຄົບຄະນະເປີດກວ້າງ ເພື່ອຜ່ານ ຮ່າງແຜນ ປະຕິບັດວຽກງານປະຈຳປີ 2007-2008 ໂດຍການເປັນ ປະທານຂອງ ທ່ານ ຮອງສາດສະດາຈານ ດຣ. ສົມອົກ ກິ່ງສັກດາ, ປະທານສະມາຄົມມິດຕະພາບລາວ-ເຢຍລະມັນ ຊຶ່ງມີມີບັນດາສະມາຊິກສະມາຄົມ ແລະອະດີດນັກສຶກສາ ທີ່ສຳເລັດການສຶກສາຈາກປະເທດເຢຍລະມັນ ເຂົ້າຮ່ວມ ປະມານ 100 ຄົນ. ໃນກອງປະຊຸມຄັ້ງນີ້ ໄດ້ມີການປຶກສາຫາລື ຄົ້ນຄວ້າປຶກສາຫາລື ໂຄງຮ່າງການຈັດຕັ້ງພາຍໃນ ແລະລະບຽບການເຄື່ອນໄຫວຂອງສະມາຄົມແລະແຜນການດຳເນີນງານຂອງສະມາຄົມໃນຕໍ່ໜ້າ ຊຶ່ງການເຄື່ອນໄຫວຂອງສະມາຄົມນີ້ ແມ່ນເພື່ອບັນລຸເປົ້າຫມາຍ ແລະ ຈຸດປະສົງລວມຄືເປັນຄູ່ ປະສານ ງານກັບສະມາຄົມມິດຕະພາບ ເຢຍລະມັນ-ລາວ ເຮັດຫນ້າທີ່ ການທູດປະຊາຊົນ, ສົ່ງເສີມ ແລະ ຜູກແຫນ້ນ ຄວາມເຂົ້າໃຈ ແລະ ຄວາມສຳພັນອັນດີ ລະຫວ່າງປະຊາຊົນລາວ ແລະ ເຢຍລະມັນ ລວມທັງການ ຮ່ວມມື ແລະ ຊ່ວຍເຫລືອກັນໃນເວທີສາກົນ, ທັງເປັນສື່ກາງ ອຳນວຍ ຄວາມສະດວກ ໃຫ້ແກ່ອົງກອນ ທັງພາກ ລັດແລະ ເອກະຊົນ ເພື່ອສົ່ງເສີມການ ຮ່ວມມືທາງດ້ານເສດຖະກິດ, ການຄ້າ ແລະ ການລົງທຶນ, ວິທະຍາ ສາດ-ເຕັກນິກ, ວັດທະນະທຳ-ສັງຄົມ, ເປັນສູນກາງ ເຕົ້າໂຮມອະດີດ ນັກສຶກສາ ແລະ ນັກຝຶກງານໃນທຸກລະດັບທີ່ຈົບຈາກປະເທດເຢຍລະມັນເພື່ອຮ່ວມກັນຈັດຕັ້ງປະຕິບັດກິດຈະກຳທີ່ເປັນປະໂຫຍດແກ່ສັງຄົມຂອງທັງສອງປະເທດ ແລະ ໃຫ້ການຊ່ວຍເຫລືອລະຫວ່າງສະມາຊິກດ້ວຍກັນ. ສະເພາະທິດທາງລວມນັ້ນຈະມີການປະສານກັບສະມາຄົມມິດຕະພາບເຢຍລະມັນ-ລາວໃນການສ້າງແຜນປະຕິບັດງານ ແລະສ້າງໂຄງການຮ່ວມມືກັນໂດຍເນັ້ນໃສ່ການຂະຫຍາຍການຄ້າ-ການລົງທຶນ, ການທ່ອງທ່ຽວ ແລະການສຶກສາເປັນບູລິມະສິດ, ຂໍການສະຫນັບສະຫນູນທຶນການສຶກສາ ແລະ ການຝຶກອົບຮົມວິຊາຊີບໃຫ້ແກ່ຊາວໜຸ່ມລາວໂດຍເນັ້ນໃສ່ຂົງເຂດວິຊາການທີ່ເຢຍລະມັນນຳຫນ້,ຊຸກຍູ້ແລະ ປຸກລະດົມໃຫ້ຄົນ ເຢຍລະມັນມາທ່ອງທ່ຽວ ຢູ່ສປປລາວຫລາຍຂຶ້ນ ເພື່ອໄຂທາງ ສູ່ການຍາດແຍ່ງ ຊ່ວຍເຫລືອແລະ ການຄ້າ ການ ລົງທຶນໃນອະນາຄົດ. ສະເພາະແຜນການປີ 2007-2008 ນີ້ ຈະເນັ້ນການ ສ້າງຖານຂໍ້ມູນສະມາຊິກ ແລະຂໍ້ມຸນປະຊາສຳພັນຂັ້ນຕົ້ນ, ສ້າງຂະບວນເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດລາວ-ເຢຍລະມັນ ຄົບຮອບ 50 ປີ (31/1/1958-31/12008), ສ້າງໂຄງການ ແລະແຜນປະຕິບັດງານຮ່ວມກັນໃນໄລຍະກາງປີນີ້ຮອດປີ 2010, ສະໜັບສະໜູນບາງວຽກງານໃນງານກິລາຊີເກມທີ່ ສປປ ລາວໄດ້ຮັບກຽດເປັນເຈົ້າພາບໃນປີ 2009 ແລະ ສົ່ງເສີມພາກເອກະຊົນ ເຢຍລະມັນມາລົງທຶນໃນ ລາວ./.
ກັບສາລະບານ
