ລະດົມຄວາມເຫັນຈາກພາກທຸລະກິດໃສ່ຮ່າງກົດໝາຍວ່າດ້ວຍຊັບສິນຂອງລັດ
*(ຂປລ): ກົມຄຸ້ມຄອງຊັບສິນຂອງລັດ, ກະຊວງການເງິນ ໄດ້ຈັດກອງປະຊຸມວິຊາການ ເພື່ອຄົ້ນຄວ້າປະກອບຄຳຄິດ ຄຳເຫັນໃສ່ຮ່າງກົດໝາຍວ່າດ້ວຍຊັບ ສິນຂອງລັດ ໃນວັນທີ 03 ກຸມພາ 2012 ນີ້ ທີ່ສູນຮ່ວມມືສາກົນ ແລະ ການ ຝຶກອົບຮົມ (ICTC) ພາຍໃຕ້ການເປັນປະທານຂອງ ທ່ານນາງ ດຣ. ວຽງທອງ ສີພັນດອນ, ລັດຖະມົນຕີຊ່ວຍວ່າການກະ ຊວງການເງິນ, ມີບັນດາຕົວແທນຈາກພາກທຸລະກິດທັງພາຍໃນ ແລະ ຕ່າງປະເທດເຂົ້າຮ່ວມ ແນໃສ່ເພື່ອເຮັດໃຫ້ມີ ເນື້ອຂອງກົດໝາຍສະບັບດັ່ງກ່າວ ສອດຄ່ອງກັບບັນດາລະບຽບກົດໝາຍອື່ນໆ ແລະ ໃຫ້ແທດເໝາະກັບສະພາບການຂະຫຍາຍຕົວ ດ້ານເສດຖະກິດ-ສັງ ຄົມ ໃນປະຈຸບັນ ແລະ ຕໍ່ໜ້າ.
ຮ່າງກົດໝາຍວ່າດ້ວຍຊັບສິນຂອງລັດສະບັບປັບປຸງນີ້ ມີ 75 ມາດຕາ, ໃນນີ້ ໄດ້ເພີ່ມມາດຕາໃໝ່ ຈຳນວນ 43 ມາດຕາ ທີ່ມີເນື້ອໃນຕິດພັນກັບຫລາຍຫົວຂໍ້ ເຊັ່ນ: ການອະທິບາຍຄຳສັບ, ຫລັກການ-ນະໂຍບາຍ, ຂອບເຂດການຄຸ້ມຄອງ ແລະ ນຳໃຊ້ຊັບສິນຂອງລັດ, ການຮ່ວມມືກັບສາກົນ, ການຕີລາຄາ, ການ ແຈ້ງ, ການຊື້-ຂາຍ, ການມອບໂອນ, ການເຄື່ອນຍ້າຍຊັບສິນຂອງລັດ. ພ້ອມທັງ ກຳນົດການນຳໃຊ້ຊັບສິນແຕ່ລະປະເພດ ເຊັ່ນ: ຊັບສິນລັດຖະສົມບັດ, ຊັບສິນ ຈາກໂຄງການກູ້ຢືມ ແລະ ຊ່ວຍເຫລືອລ້າ, ຊັບສິນລັດຖະປະສົມ, ຊັບສິນຂອງລັດຢູ່ຕ່າງປະເທດ. ນອກນັ້ນ ຍັງໄດ້ເພີ່ມ ພາກໃໝ່ຈຳນວນໜຶ່ງ ທີ່ຕິດພັນ ກັບລາຍຮັບຈາກຊັບສິນຂອງລັດ, ການຈັດຕັ້ງ ແລະ ການເຄື່ອນໄຫວວຽກງານຄຸ້ມຄອງ ຊັບສິນຂອງລັດ, ຂໍ້ຫ້າມ ແລະ ແກ້ໄຂຂໍ້ຂັດແຍ່ງ, ການຄຸ້ມຄອງ ແລະ ກວດກາຊັບສິນຂອງລັດ.
ທ່ານລັດຖະມົນຕີຊ່ວຍວ່າການກະຊວງການເງິນ ໄດ້ກ່າວໃນໂອກາດເປີດກອງປະຊຸມຄັ້ງນີ້ວ່າ: ວຽກງານປັບ ປຸງບັນດານິຕິກຳດ້ານການເງິນ ແມ່ນມີຄວາມ ສຳຄັນຫລາຍ, ໃນນັ້ນ ການປັບປຸງກົດໝາຍວ່າດ້ວຍຊັບສິນຂອງລັດ ເປັນ ວຽກໜຶ່ງທີ່ຈຳເປັນ ແລະ ຮີບດ່ວນ ເພື່ອເຮັດໃຫ້ລັດຖະບານສາມາດຄຸ້ມຄອງ ແລະ ນຳໃຊ້ຊັບສິນຂອງລັດ ໄດ້ຢ່າງມີປະສິດທິຜົນ, ມີຄວາມໂປ່ງໃສ, ໃຫ້ມີເນື້ອໃນສອດຄ່ອງກັບກົດໝາຍອື່ນໆທີ່ກ່ຽວຂ້ອງ ພ້ອມທັງແທດເໝາະກັບສະພາບ ການຂະຫຍາຍຕົວ ດ້ານເສດຖະກິດ-ສັງຄົມ ແຕ່ລະໄລຍະ ເພື່ອສ້າງເງື່ອນໄຂໃຫ້ ສປປ ລາວ ກາຍເປັນລັດແຫ່ງກົດ ໝາຍ, ມີການຄຸ້ມຄອງ ແລະ ປະຕິບັດໜ້າທີ່ວຽກງານໄດ້ຢ່າງຖືກຕ້ອງ ເປັນທຳ ແລະ ເປັນເອກະພາບໃນຂອບເຂດທົ່ວປະເທດ. ໃນໄລຍະຜ່ານມາການຄຸ້ມຄອງ ແລະ ນຳໃຊ້ຊັບສິນຂອງລັດ ແມ່ນອີງໃສ່ກົດໝາຍວ່າດ້ວຍຊັບສິນຂອງລັດ ສະ ບັບເລດທີ 09/ສພຊ ລົງວັນທີ 12 ຕຸລາ 2002 ຊຶ່ງໄດ້ເປັນເຄື່ອງມືທີ່ສຳຄັນຂອງຂະແໜງການເງິນ ເພື່ອນຳໃຊ້ເປັນບ່ອນອີງໃຫ້ແກ່ການຄຸ້ມຄອງ ແລະ ນຳໃຊ້ຊັບສິນຂອງລັດ, ຂອງບັນດາສຳນັກງານ, ອົງການ, ກົມກອງໃນຂັ້ນສູນກາງ ແລະ ທ້ອງຖິ່ນ, ສະນັ້ນ ຈິ່ງມີຄວາມຈຳເປັນຕ້ອງໄດ້ມີການປັບປຸງກົດໝາຍ ສະບັບດັ່ງກ່າວ./.
ກັບສາລະບານ
