ສືບຕໍ່ໂຄງການປັບປຸງບູລະນະການປົກຄອງເພື່ອການບໍລິການທີ່ດີ
*(ຂປລ): ກະຊວງພາຍໃນ ໄດ້ຈັດກອງປະຊຸມ ສະຫລຸບໂຄງການປັບປຸງບູລະນະການປົກຄອງ ແລະ ການບໍລິການທີ່ດີ ແລະ ສືບຕໍ່ໂຄງການໃໝ່ພາຍ ໃຕ້ແຜນງານປັບປຸງການບູລະນະການປົກຄອງແຫ່ງຊາດ ໄລຍະໃໝ່ ໃນວັນທີ 3 ກຸມພາ 2012 ຢູ່ທີ່ກະຊວງພາຍໃນ ໂດຍການເປັນປະທານຂອງທ່ານ ຄຳປານ ພິລາວົງ, ລັດຖະມົນຕີວ່າການກະຊວງພາຍໃນ, ທ່ານ ມິນ ຟາມ, ຜູ້ປະສານງານອົງການ ສປຊ ປະຈຳລາວ, ມີບັນດາທູຕານຸທູດ ຈາກປະເທດ ຜູ້ໃຫ້ທຶນສະໜັບ ສະໜູນໂຄງການດັ່ງກ່າວ ແລະ ບັນດາຜູ້ຕ່າງໜ້າອົງການຈັດຕັ້ງສາກົນ ອື່ນໆ ເຂົ້າຮ່ວມ.
ໂຄງການປັບປຸງບູລະນະການປົກຄອງ ເພື່ອສົ່ງເສີມການບໍລິການທີ່ດີ ຫລື ໂຄງການ GPAR SBSD ທີ່ຊີ້ນຳ ໂດຍກະຊວງພາຍໃນ ຫລື ທະບວງການ ປົກຄອງ ແລະ ຄຸ້ມຄອງລັດຖະກອນ ໃນເມື່ອກ່ອນໄດ້ຈັດຕັ້ງປະຕິບັດ ຜ່ານມາ ແຕ່ ປີ 2007 ຫາ 2011 ໂດຍໄດ້ເນັ້ນໃສ່ 5 ວຽກງານຕົ້ນຕໍ ປະກອບດ້ວຍ ວຽກງານ ສະໜັບສະໜູນລັດຖະບານ ໃນການສ້າງ ແລະ ປະຕິບັດແຜນຍຸດທະສາດ ແລະ ປະສານງານ ໃນວຽກປັບປຸງບູລະນະການປົກຄອງ ໂດຍຜ່ານ ຊ່ອງທາງ ໜ່ວຍງານດ້ານການປົກຄອງ; ສະໜັບສະໜູນການສ້າງນະໂຍບາຍ ເພື່ອສ້າງຄວາມເຂັ້ມແຂງ ໃຫ້ແກ່ອົງການບໍລິຫານລັດ ແລະ ລັດຖະກອນ; ສະໜັບ ສະໜູນການພັດທະນາອົງ ການຈັດຕັ້ງໃນກົງຈັກລັດຖະບານ ຊຶ່ງກວມເອົາການສ້າງຍຸດທະສາດ, ວິທີ ແລະ ການຈັດຕັ້ງປະຕິບັດນະໂຍບາຍ ແລະ ການ ທົດລອງ; ສະໜັບສະໜູນວຽກງານຄຸ້ມຄອງຊັບພະຍາກອນມະນຸດ ແລະ ການສ້າງຂີດຄວາມສາມາດໃນຂັ້ນສູນກາງ ແລະ ທ້ອງຖິ່ນ ເພື່ອຊ່ວຍໃຫ້ ສາມາດຈັດຕັ້ງປະຕິບັດ ນະໂຍບາຍລັດຖະບານຢ່າງມີປະສິດທິພາບ ແລະ 5 ສະໜັບສະໜູນ ການຂະຫຍາຍການຈັດຕັ້ງປະຕິບັດ ທີ່ປະສົບຜົນສຳເລັດ ຈາກການທົດລອງ ຊຶ່ງທັງ 5 ໜ້າວຽກດັ່ງກ່າວ ໃຊ້ງົບປະມານປະມານ 10 ລ້ານໂດລາສະຫະລັດ. ຫລັງຈາກນັ້ນ ທີ່ປະຊຸມໄດ້ຈັດພິທີລົງນາມ ເຊັນບົດບັນ ທຶກຄວາມເຂົ້າໃຈ ສືບຕໍ່ທຶນຊ່ວຍເຫລືອໂຄງການ ພາຍໃຕ້ແຜນງານປັບປຸງ ບູ ລະນະການປົກຄອງແຫ່ງຊາດ ຂຶ້ນສອງໂຄງການ ຄື: ໂຄງການສ້າງຂີດ ຄວາມສາມາດ ແກ່ອົງການບໍລິຫານລັດຂັ້ນ ທ້ອງຖິ່ນ ແລະ ການບໍລິການ, ໂຄງການສະໜັບ ສະໜູນ ກອງເລຂາ ຂອງແຜນງານປັບປຸງບູລະນະການປົກ ຄອງແຫ່ງຊາດ ຈຳນວນ 13,7 ລ້ານໂດລາສະຫະລັດ, ຈາກອົງການ ສປຊ ເພື່ອການພັດທະນາ, ອົງການກອງທຶນພັດທະນາຂອງ ສປຊ, ອົງການເພື່ອ ການພັດທະນາ ແລະ ຮ່ວມມືສະວິດເຊີແລນ ແລະ ສ ເກົາຫລີ ໃຫ້ກຽດລົງນາມໂດຍທ່ານ ຄຳປານ ພິລາວົງ, ລັດຖະມົນຕີວ່າການກະຊວງພາຍໃນ ແລະ ທ່ານ ມິນຟາມ, ຜູ້ຕາງໜ້າອົງການ ສປຊ ປະຈຳລາວ ໂດຍການ ເປັນສັກຂີພິຍານຂອງທ່ານ ອາຊາງ ລາວລີ, ຮອງນາຍົກລັດຖະມົນຕີ.
ໃນໂອກາດນີ້ ທ່ານ ອາຊາງ ລາວລີ ກໍດ້ໃຫ້ທິດຊີ້ນຳ ກ່ຽວກັບໂຄງການ ປັບປຸງປູລະນະການປົກຄອງ ໂດຍ ທ່ານໄດ້ເນັ້ນໃຫ້ການສະໜັບສະໜູນການ ຈັດຕັ້ງປະຕິບັດໃນຂັ້ນທ້ອງຖິ່ນ ຊຶ່ງເປັນສິ່ງຈຳເປັນທີ່ສຸດ ທີ່ຈະຕ້ອງໄດ້ສືບຕໍ່ສ້າງຄວາມເຂັ້ມແຂງໃນຂັ້ນທ້ອງຖິ່ນ, ການຍົກລະດັບຄວາມອາດສາມາດໃນ ຂັ້ນທ້ອງຖິ່ນ ຍັງຈະເປັນການສ້າງພື້ນຖານທີ່ດີ ໃຫ້ແກ່ລັດຖະບານ ໃນການຈັດຕັ້ງປະຕິບັດວຽກງານຕ່າງໆຂອງລັດຖະບານ ລວມທັງການປະຕິບັດໂຄງການ ພັດທະນາຕ່າງໆ ແລະ ຍັງຈະຊ່ວຍໃຫ້ຜົນປະໂຫຍດ ຈາກການພັດທະນາ ເຂົ້າໄປເຖິງປະຊາຊົນລາວບັນດາເຜົ່າ ໃນເຂດ ຫ່າງໄກສອກຫລີກ, ທັງເປັນການ ກະຕຸກຊຸກຍູ້ຄວາມສາມັກຄີລະຫວ່າງ ປະຊາຊົນ ແລະ ອຳນາດການປົກຄອງລັດ, ການຮ່ວມມືທີ່ດີຂອງທຸກກະຊວງ ທີ່ພົວພັນໃນແຜນງານປັບປຸງ ບູລະນະ ການປົກຄອງແຫ່ງຊາດ ຖືວ່າເປັນສິ່ງທີ່ສຳຄັນທີ່ສຸດ, ເພາະຈະຮັບປະກັນໃຫ້ມີການປະສານງານ ແລະ ຮ່ວມມືຢ່າງມີປະສິດທິພາບ ລະຫວ່າງ ກົມ-ຫ້ອງການ ໃນທຸກໆຂັ້ນ ເພື່ອປະຕິບັດແຜນງານໃຫ້ປະສົບຜົນສຳເລັດ, ໂຄງການສ້າງຂີດຄວາມສາມາດ ແກ່ອົງການລັດຂັ້ນທ້ອງຖິ່ນ ແລະ ການບໍລິການ ຄາດວ່າ ຈະນຳໃຊ້ງົບປະມານ ຈຳນວນ 12.568.800 ໂດລາ, ໂຄງການດັ່ງກ່າວ ໄດ້ອອກແບບມາ ເພື່ອໃຫ້ສາມາດປະກອບສ່ວນ ໃຫ້ປັບປຸງຊີວິດ ການເປັນຢູ່ ຂອງປະຊາຊົນຜູ້ທຸກຍາກ ແລະ ດ້ອຍໂອກາດ ໂດຍຊ່ວຍໃຫ້ພວກເຂົາເຈົ້າ ສາມາດເຂົ້າເຖິງການບໍລິການຂອງລັດໄດ້ເພີ່ມຂຶ້ນ ແລະ ໄວຂຶ້ນ ໂດຍປະກອບມີ 7 ຜົນໄດ້ຮັບຄື: ວຽກງານ ນະໂຍບາຍລະບຽບການ ເພື່ອໃຫ້ອຳນາດການປົກຄອງຂັ້ນເມືອງມີປະສິດທິພາບ, ການປັບປຸງຂີດຄວາມສາມາດ ຂອງ ອຳນາດ ການປົກຄອງທ້ອງຖິ່ນ, ການປັບປຸງ ສຸມໃສ່ບັນລຸເປົ້າໝາຍສະຫັດສະວັດ ເພື່ອການພັດທະນາ, ການປັບປຸງການ ເຂົ້າເຖິງການບໍລິການຂອງປະຊາຊົນ ໂດຍຜ່ານສູນບໍລິການຜ່ານປະຕູດຽວ, ຈັດຕັ້ງກອງທຶນພັດທະນາຂີດຄວາມສາມາດ ແລະ ກ້າວໄປສູ່ຄວາມທັນສະໄໝ, ສ້າງກົນໄກສຳລັບການສົ່ງເສີມ ການສະໜອງການບໍລິການ ທີ່ວ່ອງໄວ ແລະ ກວດສອບໄດ້, ຜົນໄດ້ຮັບສຸດທ້າຍແມ່ນ ການສ້າງວິໄສທັດ, ການຄຸ້ມຄອງ, ການປະສານງານ ແລະ ການຕິດຕາມ ໂດຍ ອີງໃສ່ຜົນໄດ້ຮັບຈາກການຈັດຕັ້ງປະຕິບັດ, ສ່ວນໂຄງການສະໜັບສະໜູນກອງເລຂາ ຂອງແຜນງານປັບປຸງບູລະນະ ການປົກຄອງ ແຫ່ງຊາດໄດ້ ອອກແບບມາ ເພື່ອໃຫ້ສາມາດບໍລິການທີ່ມີປະສິດທິພາບ ສາມາດກວດສອບໄດ້ ໂດຍການຈັດຕັ້ງຊີ້ນຳ-ນຳພາໃນລະດັບສູງ, ມີການຄຸ້ມຄອງ ຢ່າງມີຍຸດທະສາດ ແລະ ສະໜັບສະໜູນທຸກອົງປະກອບຂອງແຜນງານ ແຫ່ງຊາດງົບປະມານ ໂດຍລວມສຳລັບໂຄງການປະມານ 1,2 ລ້ານໂດລາ ສະຫະລັດ./.
ກັບສາລະບານ
