ສະຫວັນນະເຂດ-ຈຳປາສັກ ເພີ່ມທະວີຄວາມຮູ້ກ່ຽວກັບກົດໝາຍສາກົນ
*(ຂປລ) ກະຊວງການຕ່າງປະເທດໄດ້ຈັດຕັ້ງເຜີຍແຜ່ກ່ຽວກັບກົນໝາຍສາກົນຢູ່ແຂວງສະຫວັນນະເຂດ ແລະ ຈຳປາສັກ ໃຫ້ບັນດາ ພະນັກງານ, ຄູອາຈານ, ນາຍແລະ ພົນທະຫານ ແລະ ນັກສຶກສາ ເມື່ອທ້າຍອາທິດຜ່ານມາ, ໂດຍການເຜີຍແຜ່ຂອງ ທ່ານ ອ້ວນ ພົມມະຈັກ, ຫົວໜ້າກົມສົນທິສັນຍາ ແລະ ກົດໝາຍກະຊວງການຕ່າງປະເທດ, ການເຜີຍແຜ່ກ່ຽວກັບກົດໝາຍສາກົນໃນຄ້ັງນີ້, ກໍເພື່ອເພີ່ມທະວີຄວາມຮັບຮູ້ ແລະ ຄວາມເຂົ້າໃຈຂອງນັກສຶກສາກ່ຽວກັບບາງສະພາບການທີ່ພົ່ນເດັ່ນຂອງສາກົນ, ພັນທະພາຍໃຕ້ສົນທິສັນຍາ ທີ່ ສປປ ລາວ ເປັນພາຄີ ແລະ ການເຄື່ອນໄຫວ ໃນຂົງເຂດກົດໝາຍສາກົນ ແລະ ສິດທິມະນຸດ ຂອງ ສປປ ລາວ ໃນເວທີສາກົນ ແລະ ພາກພື້ນ; ເຮັດໃຫ້ນັກສຶກສາມີຄວາມສາມາດໃນການຄົ້ນຄວ້າ, ການວິໄຈບັນຫາສາກົນທີ່ພົ້ນເດັ່ນຂອງສາກົນ ແລະ ພາກພື້ນ ບົນພື້ນຖານທັດສະນະ ແລະ ຈຸດຢືນຂອງລັດຖະບານລາວ. ການຈັດຕັ້ງການເຜີຍແຜ່ດັ່ງກ່າວໄດ້ຮັບການສະໜັບສະໜູນໂດຍໂຄງການກົດໝາຍສາກົນເຊິ່ງຈັດຕັ້ງປະຕິ ບັດໂດຍກົມສົນທິສັນຍາ ແລະ ກົດໝາຍກະຊວງການຕ່າງປະເທດ.
ພ້ອມນີ້ ກະຊວງການຕ່າງປະເທດຍັງໄດ້ນຳເອົາປື້ມຕຳລາກ່ຽວກັບກົດໝາຍສາກົນຈຳນວນໜຶ່ງມາມອບໃຫ້ຫ້ອງສະໝຸດຂອງວິທະຍາໄລກົດໝາຍພາຍໃຕ້ ແລະ ໂຮງຮຽນວຽງໄຊ ເພື່ອເປັນຂໍ້ມູນຂ່າວ ສານ ແລະ ເອກະສານອ້າງອີງໃຫ້ແກ່ການຄ້ົນຄວ້າ, ການຮຽນການສອນໃນສອງສະຖາບັນອີກດ້ວຍ./
ກັບສາລະບານ
