ແຂວງຫຼວງພະບາງເລັ່ງປູກພຶດພັກປອດສານພິດ
*(ຂປລ): ທ່ານ ສົມສັກ ບຸນອານຸວົງ, ຫົວ ໜ້າໜວ່ຍງານບໍລິຫານ ແຜນການ ແລະ ການເງິນ ຂະແໜງສົ່ງເສີມກະສິກຳ ທັງເປັນຫົວໜ້າໂຄງການພັດທະນາ ແລະ ສົ່ງເສີມການປູກພືດຜັກປອດສານພິດເປັນສິນຄ້າ ໄດ້ໃຫ້ຮູ້ເມື່ອບໍ່ດົນ ມານີ້ວ່າ: ເພື່ອເຮັດໃຫ້ຊີວິດການເປັນຢູ່ຂອງປະຊາຊົນ ກໍຄື ຜູ້ຜະລິດ, ຜູ້ຈຳໜ່າຍ ແລະ ຜູ້ບໍລິໂພກພືດຜັກຕ່າງໆ ມີຄວາມປອດໄພ ຈາກສານເຄມີຕົກຄ້າງ ແລະ ປາສະຈາກໂລກໄພໄຂ້ເຈັບຕ່າງໆ ແລະ ແຂວງຫຼວງພະບາງ ເປັນແຂວງ ເຕົ້າໂຮມນັກທ່ອງທ່ອງທັງພາຍໃນ ແລະ ຕ່າງປະເທດ ເປັນຈຳນວນຫຼວງຫຼາຍ ດັ່ງນັ້ນ, ພະແນກກະສິກຳ ແລະ ປ່າໄມ້ແຂວງຫຼວງພະບາງ ຈຶ່ງຊອກຫາແຫຼ່ງທຶນ ແລະ ສະຖານທີ່ປູກພືດຜັກປອດສານພິດທີ່ເໝາະສົມ, ຍ້ອນຄວາມພະຍາຍາມ ດັ່ງກ່າວ ຈຶ່ງໄດ້ຮັບທຶນຊ່ວຍເຫຼືອ ຈາກປະເທດສະວິດສະແລນ ໂດຍຜ່ານໂຄງການຕາບີ ແລະ ໂຄງການສົ່ງເສີມການ ທ່ອງທ່ຽວແບບຍືນຍົງ ການຜະລິດກະສິກຳສະອາດ ຈາກອົງການສະຫະປະຊາຊາດ.
ໂຄງການພັດທະນາ ແລະ ສົ່ງເສີມການປູກພຶດຜັກປອດສານພິດເປັນສິນຄ້ານີ້ ໄດ້ເລີ່ມມາແຕ່ເດືອນກໍລະກົດ 2011 ໃນເບື້ອງຕົ້ນ ມີຜູ້ເຂົ້າຮ່ວມໂຄງການ 5 ເມືອງ 15 ບ້ານ 402 ຄອບຄົວຄື: ເມືອງຫຼວງພະບາງ 4 ບ້ານ 169 ຄອບ ຄົວ, ເມືອງປາກອູ 4 ບ້ານ 115 ຄອບຄົວ, ເມືອງຊຽງເງິນ 4 ບ້ານ 47 ຄອບຄົວ, ເມືອງຈອມເພັດ 2 ບ້ານ 50 ຄອບຄົວ ແລະ ເມືອງໂພນໄຊ 1 ບ້ານ 11 ຄອບຄົວ,ໃນເນື້ອທີ່ທັງໝົດ 85,27 ເຮັກຕາ. ກ່ອນການລົງມືເຮັດ ທາງໂຄງການໄດ້ມີ ການເຝິກອົບຮົມເຕັກນິກການປູກ ແລະ ສາທິດການເຮັດຝຸ່ນບົ່ມ, ປຸ່ຍຊີວະພາບ, ນ້ຳສະກັດຊີວະພາບ, ສະໝູນໄພຂັບໄລ່ແມງໄມ້ ແລະ ອື່ນໆ ໃຫ້ຊາວສວນໄດ້ເຂົ້າໃຈຢ່າງຈະແຈ້ງ ແລະ ສາມາດນຳເອົາຄວາມຮູ້ດັ່ງກ່າວ ໄປປະຕິບັດຕົວຈິງໃຫ້ເກີດດອກອອກຜົນ. ພ້ອມນັ້ນ ຍັງໄດ້ຕິດຕາມ ເຕັກນິກການຜະລິດຂອງຊາວສວນ ແລະ ສະໜອງແນວພັນພືດ, ກາກນ້ຳຕານ ແລະ ອຸປະກອນຜະລິດຝຸ່ນຊີວະພາບ ລວມມູນຄ່າ 150 ລ້ານກວ່າກີບ. ຜ່ານການຈັດຕັ້ງປະຕິບັດຕົວຈິງ ເຫັນວ່າມີບາງຄອບຄົວກໍບໍ່ສາມາດປະຕິບັດລະບຽບຂອງໂຄງການໄດ້ ແລະ ອີກຢ່າງໜຶ່ງ ກໍຍ້ອນສະພາບແວດລ້ອມບີບຮັດ ຈຶ່ງເຮັດໃຫ້ການຜະລິດບໍ່ໄດ້ຕາມຄາດໝາຍ ຊຶ່ງມັນສະແດງອອກ ປະຈຸບັນ ຍັງມີຄອບຄົວທີ່ເຮັດຕົວຈິງ 364 ຄອບຄົວ ໃນເນື້ອທີ່ 83 ເຮັກຕາ, ໃນນັ້ນ ເມືອງໂພນໄຊ 11 ຄອບຄົວ, ເມືອງຊຽງເງິນ 40 ຄອບຄົວ, ຈອມເພັດ 20 ຄອບຄົວ, ຫຼວງພະບາງ 138 ຄອບຄົວ ແລະ ເມືອງປາກອູ 115 ຄອບຄົວ, ຊາວສວນສາມາດຜະລິດພືດຜັກໄດ້ທັງໝົດ 632.086 ກິໂລ, ໃນນັ້ນ ຈຳໜ່າຍອອກ 612.354 ກິໂລ ສາມາດສ້າງລາຍຮັບໄດ້ທັງໝົດ 2 ຕື້ 718 ລ້ານກວ່າກີບ, ສະເລ່ຍໃສ່ຄອບຄົວໜຶ່ງໄດ້ 6 ລ້ານ 7 ແສນກວ່າກີບ.
ທ່ານ ສົມສັກ ຍັງເວົ້າຕື່ມວ່າ: ໃນຕໍ່ໜ້າ ຖ້າຊາວສວນຄອບຄົວໃດຜະລິດຖືກຕາມເງື່ອນໄຂ ແລະ ມາດຖານຂອງໂຄງການ ແມ່ນຈະເໜີໃຫ້ກະຊວງກະສິກຳ ແລະ ປ່າໄມ້ ລົງມາກວດກາ ແລະ ອອກໃບຢັ້ງຢືນ (ໂລໂກ) ກະສິກຳອິນຊີຕິດໃສ່ພືດຜັກຂອງເຂົາເຈົ້າ ແລະ ສາມາດສົ່ງອອກຂາຍຕ່າງປະເທດໄດ້./.
ກັບສາລະບານ
