ນັກທຸລະກິດແຂວງສະຫວັນນະເຂດ ມອບເງິນ 10 ລ້ານກີບ ເພ່ືອປູກປ່າ ແລະ ກ້າເບັ້ຍ
(ຂປລ): ໃນທ້າຍເດືອນຜ່ານມານີ້, ທ່ານ ບຸນທອນ ພັນຄຳໂຕ້, ນັກທຸລະກິດແຂວງສະຫວັນນະເຂດ ໄດ້ມອບເງິນ ຈຳນວນ 10 ລ້ານກີບ,ໃຫ້ຂະແໜງປ່າໄມ້ແຂວງ ຮັບໂດຍທ່ານ ສົມສະກຸນ ສຸວັນນະສິງ ຫົວໜ້າຂະແໜງປ່າໄມ້ແຂວງ, ເພື່ອນຳໃຊ້ເຂົ້າໃນການປູກປ່າ ແລະ ກ້າເບັ້ຍໄມ້ ໃນສົກປີ 2011-2012 ນີ້.
ທ່ານ ບຸນທອນ ພັນຄຳໂຕ້ ກ່າວວ່າ: ການມອບເງິນປະກອບສ່ວນເຂົ້າໃນການປູກປ່າ ແລະ ກ້າເບັ້ຍຄັ້ງນີ້ ແມ່ນສ່ວນໜຶ່ງທີ່ສຳຄັນ ຍ້ອນວ່າ ໃນໄລຍະຊຸມປີ ຜ່ານມາ, ເນື້ອທ່ີປ່າ ໃນຫລາຍທ້ອງຖິ່ນຖືກບຸກລຸກ ເຮັດໃຫ້ປ່າຈຳນວນບໍ່ໜ້ອຍເຊື່ອມໂຊມລົງເທື່ອລະເລັກເທືອລະໜ້ອຍ ອັນສົ່ງຜົນສະທ້ອນທາງລົບຕໍ່ລະບົບ ນິເວດວິທະຍາ. ແລະ ສິ່ງແວດລ້ອມ ແລະ ທຳມະຊາດ, ຊຶ່ງຫາກມີຫານທຳລາຍຕໍ່ໆໄປ ອາດມີຜົນເຖິງຄຸນນະພາບຊີວິດຂອງປະຊາຊົນ ລວມໄປເຖິງການ ພັດທະນາເສດຖະກິດ-ສົງຄົມ. ຊຶ່ງໃນໄລຍະທີ່ຜ່ານມາ ການນຳຂອງແຂວງ ກໍ່ຄືຂະແໜງການກ່ຽວຂ້ອງໄດ້ມີຄວາມພະຍາຍາມເຮັດໃຫ້ການຄຸ້ມຄອງປ່າໄມ້ເຂົ້າ ສູ່ລະບົບ ໂດຍໄດ້ວາງຍຸດທະສາດ ອອກກົດໝາຍ, ດຳລັດ,ຄຳສັ່ງ ຄຳແນະນຳແລະ ນິກຳອື່ນໆ ທີ່ກ່ຽວຂ້ອງກັບການຄຸ້ມຄອງ ແລະ ພັດທະນາປ່າໄມ້, ໃນຂະນະ ດຽວກັນ ກໍ່ໄດ້ເພີ່ມທະວີໂຄສະນາປູກຈິດສຳນຶກ ໃຫ້ທຸກຊັ້ນຄົນໃນສັງຄົມມີຄວາມເຂົ້າໃຈແລະສ້າງເງື່ອນໄຂໃຫ້ເຂົາເຈົ້າເຂົ້າຮ່ວມໃນການຄຸ້ມຄອງປົກປັກຮັກສາ ປ່າໄມ້ ເພ່ືອເຮັດໃຫ້ການປົກຫຸ້ມຂອງປ່າໄມ້ ພາຍໃນແຂວງເພີ່ມຂຶ້ນ ແລະ ສ້າງຄວາມສົມດູນກັບທຳມະຊາດ.
ກັບສາລະບານ
