ຄົ້ນພົບ​ວັດຖຸບູຮານ​ຍຸກ​ທອງ​ສຳລິດ ​ທີ່​ມີ​ອາຍຸ​ຫລາຍ​ກວ່າ 200 ປີ


ຂປລ. ທ່ານ ດຣ ທອງ​ລິດ ຫຼວງ​ໂຄດ ນັກ​ບູຮານ​ວິທະຍາ​ຈາກ​ກົມ​ມໍລະດົກ ​ເຊິ່ງ​ໄດ້​ປະຈຳ​ຢູ່​ພາກ​ສະໜາມ​ໃນ​ການ​ຂຸດ​ຄົ້ນວັດຖຸ​ບຸ​ຮານ ຢູ່​ໂຄງການຂຸດຄົນ ບໍ່​ຄຳ-ທອງ ​ເຊ​ໂປ​ນ ​ເມືອງ​ວິລະ​ບູລີ ​ແຂວງ​ສະຫວັນ​ນະ​ເຂດ ​ໄດ້​ແຈ້ງ​ໃຫ້​ຮູ້​ວ່າ: ຕາມ​ການ​ບອກ​ເລົ່າ​ຂອງ​ປະຊາຊົນ​ເຂດ​ບ້ານ​ບຸ່ງ​ຄຳ ​ເມືອງ​ວິລະ​ບູລີ ທີ່​ໄດ້​ໄປ​ ເຮັດ​ໄຮ່, ​ເຮັດ​ສວນ ຢູ່​ບໍລິ​ເວນ​ພູ​ແທ່ນ​ຄຳວ່າໄດ້​ພົບ​ເຫັນ​ວັດຖຸບູຮານ​ຢູ່​ບໍລິ​ເວນ​ດັ່ງກ່າວ ພ້ອມນີ້ ຄະນະ​ສຳ​ຫລວດປະ​ເມີນ​ຜົນ​ກະທົບຈາກ​ໂຄງການນີ້ ​ກໍ​ພົບ​ເຫັນ​ວັດຖຸບູຮານ ຢູ່​ເຂດ​ດັ່ງກ່າວ ເຊັ່ນກັນ ເຊິ່ງ​ຄາດ​ວ່າ​​ເປັນ​ເຂດ​ແຫລ່ງຜະລິດ ​ວັດຖຸ​ທີ່​ເຮັດ​ດ້ວຍ​ທອງ ຂອງ​ຊຸມ​ຊົນ​ບູຮານ. ດັ່ງ​ນັ້ນ ທາງ​ກົມ​ມໍ​ລະ​ດົກ ຈຶ່ງ​ໄດ້​ສົ່ງ​ວິຊາ​ການ ​ໂດຍ​ສົມທົບ​ກັບ​ພະ​ແນ​ກຖະແຫລງຂ່າວ ວັດທະນະທຳ ແລະ ທ່ອງທ່ຽວ ​ແຂວງ​ສະຫວັນ​ນະ​ເຂດ, ​ເມືອງ​ວິລະ​ບູລີ ພ້ອມ​ດ້ວຍ​ໜ່ວຍ​ງານ​ ມ​ໍລະ​ດົກ​ ຂອງ​ບໍລິສັດ​ລ້ານ​ຊ້າງ​ມີ​ເນ​​ໂຣນ, ຊ່ຽວຊານ​ ແລະ ​ວິຊາ​ການຈາກ​ຕ່າງປະ​ເທດ ​ລົງມື​ຂຸດ​ຄົ້ນ​ມາ​ແຕ່​ວັນ​ທີ 15 ເດືອນຕຸລາ ປີ 2014 ​ເປັນ​ຕົ້ນ​ມາ ​ໂດຍ​ໄດ້ພົບ​ເຫັນ​ວັດຖຸບູຮານ​ຍຸກ​ທອງ​ສຳລິດ ​ທີ່​ມີ​ອາຍຸ​ຫລາຍ​ກວ່າ 200 ປີ ​ເປັນ​ຈຳນວນ​ຫລວງຫລາຍ ເຊັ່ນ: ​ເບົ້າ​ຫລໍ່, ​ແບບ​ຫລໍ່ ຈົ​ນເປັນທີ່​ມາ​ຂອງ​ຊື່ “​ເປີ້ນ​ເບົ້າ​ຫລໍ່” ນອກ​ນັ້ນ ຍັງ​ໄດ້​ພົບເຟື້ອງ​ໝໍ້, ​ໄຫ, ວັດຖຸ​ທີ່​ເຮັດ​ດ້ວຍ​ທອງ ​ເຊັ່ນ: ຂວານ​ທອງ, ປາຍ​ຫອກ, ອາວຸດ, ໝາກ​ປັດ, ​ເຄື່ອງມື​ເຫລັກ, ຂວານ​ຫີນ, ຂຸມ​ຝັງ​ສົບ ແລະ ​ເຄື່ອງ​ອຸທິດ​ເຖິງ​ຄົນ​ຕາຍ ທີ່ສະ​ແດງ​ໃຫ້​ເຫັນ​ເຖິງ​ພິທີກຳການ​ຝັງ​ສົບ​ໃນ​ສະ​ໄໝ​ບູຮານ.
ສະນັ້ນ ໃນວັນທີ 15 ເດືອນພະຈິກ ປີ 2014, ທ່ານ ດຣ. ບຸນ​ທ່ຽງ ສີຣິບົວ​ພັນ ຫົວໜ້າ​ກົມ​ມໍລະດົກ ກະຊວງ​ຖະ​ແຫລ​ງຂ່າວ ວັດທະນະທຳ ​ແລະ ​ທ່ອງ​ທ່ຽວ ​ພ້ອມດ້ວຍຄະນະຈຶ່ງໄດ້​ເດີນທາງ​ໄປ​​ເບິ່ງ​ການ​ຂຸດ​ຄົ້ນ​ວັດຖຸບູຮານ ຢູ່​ເຂດດັ່ງ ກ່າວ ແລະ ໄດ້ຮັບຟັງການລາຍງານ ຈາກທ່ານ ດຣ. ໄນ​ໂຈ ຈາງ ຊ່ຽວຊານ​ຈາກ​ມະຫາວິທະຍາ​ໄລ ​ເຈັມສ໌ຄຸກ ປະ​ເທດ​ອົດ​ສະ​ຕາ​ລີ ​ວ່າ: ການ​ພົບ​ວັດຖຸບູຮານ​ຢູ່​ໃນ​ໂຄງການ ​ແມ່ນ​ໄດ້​ພົບ​ເຫັນ​ມາ​ເລື້ອຍໆ ເຊິ່ງ​​ເມື່ອ​ກ່ອນ ພວກ​ເຮົາ​ໄດ້​ຂຸດ​ຄົ້ນ​ຢູ່​ທົ່ງ​ນາງ​ເງືອກ ​ແລະ​ ​ໄດ້​ພົບ​ເຫັນ​ຮ່ອງຮອຍ ​ແລະ ​ວັດຖຸບູຮານ​ໃນ​ລັກສະນະ​ດຽວ​ກັນ​ນີ້ ​ເປັນ​ຈຳນວນ​ຫລາຍ​ເຊັ່ນກັນ ເຊິ່ງວັດຖຸ​ດັ່ງກ່າວ ​ເປັນ​ສິ່ງ​ທີ່​ມີ​ຄຸນຄ່າ​ທາງ​ດ້ານ​ປະຫວັດສາດ, ຄວນ​ອະນຸລັກ​ຮັກສາ, ສຶກສາ​ຄົ້ນຄວ້າປະຫວັດ​ຄວາມ​ເປັນ​ມາ​ໃນ​ແຕ່​ລະ​ຍຸກ, ​ແຕ່​ລະສະ​ໄໝ. ທ່ານ ດຣ.ໄນ​ໂຈ ຍັງ​ແຈ້ງ​ໃຫ້​ຮູ້​ຕື່ມ​ວ່າ: ປັດຈຸ​ບັນ ພວກ​ເຮົາ​ຍັງ​ໄດ້​ຄົ້ນ​ພົບ​ອີກ​ຈຸດ​ໜຶ່ງ ທາງ​ດ້ານ​ທິດຕາ​ເວັນ​ອອກ​ຂອງ​ພູ​ແທ່ນ​ຄຳ ​ເຊິ່ງ​ໄດ້​ພົບ​ເຫັນ​ໂຄງ​ຮ່າງ​ໄມ້​ບູຮານ ຄາດ​ວ່າ​ ປັນ​ບ່ອນ​ຂຸດ​ເອົາ​ແຮ່​ທາດ ​ເພື່ອ​ໄປ​ຫລອມ​ໃນ​ສະ​ໄໝ​ກ່ອນ; ສິ່ງສຳຄັນໃນ​ແຕ່​ລະ​ບ່ອນ​ທີ່​ໄດ້​ຄົ້ນ​ພົບທາງ​ຄະນະ​ຜູ້​ຂຸດ​ຄົ້ນ ກໍ​ຄື​ທາງ​ກົມ​ມໍ​ລະ​ດົກ ຈະ​ສະ​ເໜີ​​ ໄປໃຫ້​ບໍລິສັດ​ລ້ານ​ຊ້າງ​ມີ​ເນ​ໂຣນ ​ໃຫ້​ເຮັດ​​ເປັນ​ເຂດ​ອະນຸລັກ ​ເພື່ອ​ອະນາຄົດ​ຂ້າງ​ໜ້າ​ຈະ​ເປັນ​ບ່ອນ​ສຶກສາ​ຄົ້ນຄວ້າ ​ແລະ ​ພັດທະນາ​ເປັນ​ແຫລ່ງທ່ອງ​ທ່ຽວ ທາງ​ປະຫວັດສາດ​ອີກ​ດ້ວຍ./.

 

ກັບສາລະບານ                ກັບຫນ້າຫລັກ

 

ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446