ເຮຮາ ພາສາຊາວບ້ານ ລະຄອນຕະຫລົກກຳລັງເປີດກ້ອງຖ່າຍທຳໃນຕອນທຳອິດທີ່ມີຊື່ວ່າ “ສ່ຽງດວງ” ເຊິ່ງພິທີບວງສວງ ເພື່ອເປັນສິລິມຸງຄຸນໄດ້ຈັດຂຶ້ນໃນຕອນເຊົ້າວັນພຸດທີ 4 ຕຸລາ 2006 ນີ້ທີ່ ບ້ານຫນອງທາເຫນືອ, ນະຄອນຫລວງວຽງຈັນ ທ່າມກາງຫ່າຝົນທີ່ຕົກລົງມາບໍ່ຂາດສາຍ ແຕ່ນັກສະແດງ ແລະ ຜູ້ກຳກັບກໍ່ມີພະລັງໃຈເຕັມປ່ຽມ ເດີນຫນ້າຈົນພິທີບວງສວງສຳເລັດລົງດ້ວຍຄວາມຫວັງ ແລະ ກຳລັງໃຈ. ເອື້ອຍ ມະນີວັນ ບູລົມ ຜູ້ດຳເນີນລາຍການ ໃຫ້ສຳພາດຕໍ່ສື່ມວນຊົນທີ່ເຂົ້າຮ່ວມເປັນສັກຂີພິຍານໃນພິທີດັ່ງກ່າວວ່າ: “ເຮຮາ ພາສາຊາວບ້ານ ລວມລະຄອນຕະຫລົກ 26 ເລື່ອງ ສ່ອງແສງໃຫ້ເຫັນບັນຫາທີ່ເກີດຂຶ້ນໃນສັງຄົມ ເສີມດ້ວຍຂໍ້ຄິດ ແລະ ຄະຕິອັນເປັນປະໂຫຍດຕໍ່ຜູ້ຊົມ ພ້ອມກັບສອດແຊກຕະຫລົກເຂົ້າໄປເພື່ອໃຫ້ເລື່ອງຫນ້າສົນໃຈ ແລະ ຜ່ອນຄາຍຄວາມເຄັ່ງຕຶງ, ໂດຍເລີ່ມຖ່າຍທຳຕອນທຳອິດທີ່ມີຊື່ວ່າ “ສ່ຽງດວງ” ຄາດວ່າຈະໄດ້ແຜ່ພາບອອກອາກາດທາງໂທລະພາບໃນຕົ້ນເດືອນພະຈິກນີ້. ນັກສະແດງຫລັກຂອງ ເຮຮາພາສາຊາວບ້ານປະກອບມີ ຊຽງຍານ, ຕູ້ແຟັບ, ວັນນະລີ, ແສງພະວັນ, ຄຳພູວັນ, ບຸນເລີດ ແລະ ອື່ນໆ, ນອກນີ້ ໃນລະຄອນແຕ່ລະຕອນ ພວກເຮົາຍັງມີນັກສະແດງຮັບເຊີນມາສົມທົບບໍ່ວ່າຈະເປັນນັກຮ້ອງ, ນັກສະແດງ ແລະ ຄົນດັງໃນແວດວົງສັງຄົມອີກດ້ວຍ. ສ່ວນສະຖານທີ່ຖ່າຍທຳ ແມ່ນພວກເຮົາຈັດສາກເອົາສະຖານທີ່ໆສ້າງຂຶ້ນເອງ ເປັນເຮືອນຈິງ, ສວນຈິງ. ການສ້າງລະຄອນແບບນີ້ ບໍ່ແມ່ນເພື່ອສ້າງຄະຕິເຕືອນໃຈ ແລະ ມອບຄວາມສະຫນຸກສະຫນານໃຫ້ຜູ້ຊົມເທົ່ານັ້ນ, ແຕ່ຍັງເປັນການສ້າງຈຸດເລີ່ມຕົ້ນເພື່ອປຸກລະດົມໃຫ້ຜູ້ສ້າງອື່ນໆກ້າເຮັດ ເພື່ອພັດທະນາວົງການລະຄອນລາວໃຫ້ມີຫລາກຫລາຍສີສັນຍິ່ງໆຂຶ້ນ”. ເອົາລະ ! ບັນດາທ່ານທີ່ມັກເລື່ອງລາວຄວາມຕະຫລົກ ເພື່ອເບົາສະຫມອງ ກໍ່ອົດໃຈລໍຖ້າ ບຶດຫນຶ່ງ, ເພາະ ເຮຮາພາສາຊາວບ້ານ ກຽມລົງຈໍແລ້ວ ໄວໆນີ້ !
