ການໄຫຼເຮືອໄຟ
* ກ່ອນໜ້ານີ້ໄດ້ນຳສະເໜີກ໋ຽວກັບບຸນຊ່ວງເຮືອໄປແລ້ວ ຊຶ່ງໃນການຊ່ວງເຮືອນີ້ແມ່ນໄດ້ມີການຄົບງັນດ້ວຍມະໂຫລີຕ່າງໆ,ມີການປະກວດເຮືອງາມລວມທັງການເຊີ້ງ, ການຕີຊ້າງນ້ຳນອງ ແລະ ອື່ນໆຊຶ່ງຖືເປັນສີສັນສາມາດດຶງດູດຄວາມສົນໃຈຂອງຜູ້ຄົນທັງຫຼາຍບໍ່ວ່າຈະເປັນຄົນລາວກໍຄືຄົນຕ່າງຊາດ ແລະ ຄຽງຄູ່ກັນນີ້,ກໍຍັງມີການໄຫລເຮືອໄຟຕື່ມອີກ ຊຶ່ງມັນໄດ້ເພີ່ມ ສີສັນໃຫ້ແກ່ວັນບຸນຊ່ວງເຮືອໃນແຕ່ ລະປີອີກຕ່າງຫາກ..ເປັນຫຍັງຈຶ່ງມີການໄຫລເຮືອໄຟ?ເພິ່ນເຮັດແນວ ໃດແດ່? ເປີດຄໍລຳ “ ຊີວິດວັດທະ ນະທຳ “ ທາງໜ້າໜັງສືພິມປະເທດ ລາວມື້ນີ້ຂໍນ້ອມນຳສະເໜີບົນພື້ນ ຖານຕຳນານແຫ່ງການເຊື່ອຖືມາແຕ່ບູລ້ຳບູຮານເພິ່ນພຸ້ນ! ການໄຫລເຮືອໄຟນີ້ແມ່ນໄດ້ມີຄວາມເຊື່ອຖືມາຈາກພະຍານາກໃນສະໄໝພຸດທະການບັນພະບູລຸດ ຊຶ່ງເພິ່ນເຄີຍເຮັດມາຈົນເຖິງປະຈຸບັນໂດຍໃນນິທານພື້ນເມືອງໄດ້ກ່າວໄວ້ໃນເລື່ອງ” ກາເຜືອກ” ຫຼື “ ກາຂາວ “ ນັ້ນເອງ ຊຶ່ງເລື່ອງມີຢູ່ວ່າ: ຄັ້ງໜຶ່ງພະພຸດທະເຈົ້າໄດ້ສະເດັດໄປຢ້ຽມຢາມເມືອງບາດານ ແລະ ກ່ອນຈາກເມືອງນັ້ນ, ບັນດານາກທັງຫຼາຍໄດ້ໄຫວ້ວອນໃຫ້ເພິ່ນຢຽບຮອຍພະບາດ (ຮອຍຕີນ)ຂອງເພິ່ນໄວ້ແຄມມະຫາສະໝຸດເພື່ອເປັນບ່ອນໃຫ້ນາກທັງຫຼາຍໄດ້ສັກກາລະບູຊາ.ຈາກຄວາມເຊື່ອຄືດັ່ງ ກ່າວນີ້,ເມື່ອຮອດບຸນເຂົ້າພັນສາ ຫຼື ບຸນອອກພັນສາຂອງພະສົງ ພຸດທະສາສະ ນິກກະຊົນໄດ້ພາກັນເຮັດເຮືອໄຟເພື່ອຈຸດປະສົງບູຊາຮອຍພະພຸດທະບາດຢູ່ທີ່ເມືອງບາດານນັ້ນ. ບັດນີ້ມາຮູ້ຈັກວ່າ: ຊາວລາວພວກເຮົານິຍົມເຮັດເຮືອໄຟປະເພດ ໃດແດ່ ? ມີຢູ່ 2 ປະເພດຄືໜຶ່ງແມ່ນປະເພດເຮືອໄຟໂຄກ ໂດຍເພິ່ນເອົາກາບກ້ວຍມາເຮັດເປັນຮູບເຮືອແລ້ວເຮັດຮາວໃຫ້ຄັກແນ່ເພື່ອຕິດເຜິ້ງ, ທູບທຽນ ພ້ອມທັງເຂົ້າຕົ້ມ,ເຂົ້າໜົມ ແລະ ດອກໄມ້ປະດັບໃສ່ໃຫ້ມີຄວາມສວຍສົດງົດງາມ. ຈາກນັ້ນກໍພາກັນຈູດໃຫ້ເຮື່ອເຮືອງ.ເຮືອໄຟໂຄກເພິ່ນເຮັດຢູ່ເດີ່ນວັດ ແລະ ບາງຄົນກໍເຮັດໃສ່ໜ້າເຮືອນ ນີ້ເພິ່ນເອີ້ນວ່າ: ໄຕ້ເຮືອໄຟໂຄກ.ສ່ວນປະເພດທີສອງແມ່ນເຮືອໄຟນ້ຳ ຊຶ່ງລັກສະນະຮູບ ຮ່າງກໍຄືກັນກັບເຮືອໄຟໂຄກ ໂດຍຢູ່ໃນເຮືອນັ້ນມີແຕ່ເຄື່ອງກິນຂອງທານທັງຫວານ ແລະ ຄາວຄົບ ຖ້ວນ.ເມື່ອຮອດ ເວລາ 20:00 ໂມງ ຂອງມື້ນັ້ນໄດ້ມີຊາວໜຸ່ມຍິງ-ຊາຍ,ເຖົົ້າແກ່ອາວຸໂສ ໄດ້ພ້ອມພາກັນຫາມເຮືອນັ້ນລົງໄປຫານ້ຳທີ່ຈະປ່ອຍ ແລ້ວກໍໄຕ້ທູບທຽນໃສ່ຢ່າງຮຸ່ງເຮືອງເຫຼືອງເຫຼື້ອມທີ່ສຸດ.ຈາກນັ້ນກໍປ່ອຍເຮືອລົງໄປຕາມກະແສນ້ຳ.ໃນຄວາມເປັນຈິງແລ້ວ, ການກຳນົດເວລາໄຫລເຮືອໄຟນັ້ນມີຄວາມແຕກຕ່າງກັນ ເຊັ່ນວ່າ: ຢູ່ບາງທ້ອງຖິ່ນແມ່ນເຮັດຂຶ້ນໃນເດືອນສິບເພັງ (ກົງກັບກາງເດືອນກັນຍາ) ຊຶ່ງແມ່ນ ວັນບຸນຫໍ່ເຂົ້າສະຫຼາກ.ສຳລັບຢູ່ຕົວເມືອງໃຫຍ່ເຊັ່ນ ຢູ່ນະຄອນຫຼວງວຽງຈັນນັ້ນ ເພິ່ນຈັດຂຶ້ນໃນເດືອນ ສິບເອັດເພັງ (ກົງກັບເດືອນຕຸລາ) ຊຶ່ງແມ່ນວັນບຸນອອກພັນສາປະວໍລະ ນາ ຂອງພະສົງ ແລະ ສະຖານທີ່ນັ້ນກໍຄືຢູ່ທ່າວັດຈັນ ,ເມືອງຈັນທະບູລີ ທຸກໆປີ. ປະເພນີບຸນຊ່ວງເຮືອ-ໄຫລເຮືອໄຟ ແມ່ນໜຶ່ງໃນ 19 ປະເພນີ ຫຼືວ່າ: ທຳນຽມ,ລະບຽບແບບແຜນ ການປະພຶດປະຕິບັດທີ່ສືບສານຕໍ່ໆກັນມາແຕ່ອະດີດຕະການຈົນເທົ່າເຖິງທຸກວັນນີ້./.
