ຫໍ່ເຂົ້າຕົ້ມ ບຸນເຂົ້າພັນສາ
ເຂົ້າຕົ້ມໃສ່ຫມູ, ເຂົ້າຕົ້ມໃຈກ້ວຍ ຫລື ຖົ່ວເຫລືອງ, ເຂົ້າຫນົມແຫນບ ແລະ ອື່ນໆ ທີ່ຖືກຫໍ່ດ້ວຍໃບ ຕອງ ໄດ້ສົ່ງກິ່ນຫອມຫວນ ເປັນພິເສດ ຢູ່ແຕ່ລະຫລັງຄາເຮືອນ, ເຂົ້າຕົ້ມຂອງຫວານເຫລົ່ານີ້ ແມ່ນກະກຽມໄວ້ສຳລັບໄປຕັກບາດຢາດ ນ້ຳຢູ່ວັດມື້ອື່ນໃນໂອກາດ ບຸນ ເຂົ້າພັນສາ ເຊິ່ງໄດ້ຈັດຂຶ້ນ ໃນ ເດືອນແປດເພັງ 15 ຄ່ຳ ເຊິ່ງ ກົງກັບ ເດືອນກໍລະກົດຂອງທຸກໆປີ ແລະ ປີນີ້ກໍກົງກັບວັນທີ ວັນທີ 7 ກໍລະກົດ 2009. ບຸນເຂົ້າພັນສາ ແມ່ນບຸນເພື່ອເຊີດຊູສົ່ງເສີມກິດຈະກຳທາງພຸດທະສາສະໜາຕາມຮີດສິບສອງ, ໂດຍສະເພາະແມ່ນ ຂອງ ພະສົງ ສາມະເນນ. “ພັນສາ” ຫມາຍວ່າ: ປີ ຫລື ລະດູການ, ສ່ວນຄຳວ່າ: “ເຂົ້າພັນສາ” ຫມາຍເຖິງ ເຂົ້າປະຈຳລະດູການໃນຍາມ ຝົນຢູ່ ບ່ອນ ໃດໜຶ່ງຕະຫລອດໄລຍະ 3 ເດືອນ. ຕາມປົກກະຕິ ພະສົງ ຈຳເຂົ້າພັນສາໃນມື້ແຮມ 1 ຄ່ຳ ເດືອນ 8, ແຕ່ຖ້າປີອະທິກະມາດ (8 ສອງ ຫົນ) ພະສົງຈະເຂົ້າຈຳພັນສາໃນມື້ແຮມ 1 ຄ່ຳເດືອນ 9. ດັ່ງນັ້ນ ການເຂົ້າພັນສາ ຈຶ່ງມີ ສອງວັນຄື: ປຸລິມິກາ ເຂົ້າພັນສາໃນເດືອນ8 ເພັງ 15 ຄ່ຳ ແລະ ວັນສຸປະນະນີກາ ເຂົ້າພັນສາໃນເດືອນ 9 ແຮມ 1 ຄ່ຳ. ບຸນເຂົ້າພັນສາ ມີມູນເຫດມາ ຈາກ ສະ ໄຫມກ່ອນ ພະສົງທ່ອງ ທ່ຽວ ໄປ ໃນຊົນນະບົດທັງລະດູແລ້ງ ແລະ ລະດູຝົນ ບໍ່ມີຍາມພັກຜ່ອນ, ໂດຍສະເພາະໃນລະດູຝົນ ເຊິ່ງເປັນລະດູປູກຝັງຂອງ ຊາວນາ ຊາວສວນ, ພະສົງໄດ້ຢຽບຢ່ຳ ເຂົ້າກ້າໄຮ່ນາຮົ້ວສວນຂອງປະຊາຊົນເປັນເຫດເຮັດໃຫ້ຜົນລະປູກໄດ້ຮັບຄວາມເສຍຫາຍ. ເລື່ອງ ນີ້ໄດ້ຍິນຮອດຫູຂອງ ພະພຸດທະ ເຈົ້າ, ພະພຸດທະອົງ ຈຶ່ງຊົງອະນຸຍາດໃຫ້ພະສົງເຂົ້າ ຈຳພັນ ສາ ຕະຫລອດ 3 ເດືອນໃນປີໜຶ່ງໆ, ໂດຍສະເພາະລະດູຝົນ ບໍ່ໃຫ້ພະ ສົງ ໄປນອນຄ້າງຄືນຢູ່ ບ່ອນ ອື່ນ ແລະ ຖ້າໄປຕ້ອງອາບັດທຸກກົດ, ເວັ້ນເສຍແຕ່ມີທຸລະຈຳເປັນເຊັ່ນ: ພະອຸປັດຊາຄູບາອາ ຈານ, ພໍ່ແມ່ເຈັບ ປ່ວຍລົ້ມຕາຍ, ໄຟໄຫມ້ກຸຕິວິຫານ ແລະ ເຫດການຮ້າຍ ແຮງອື່ນໆ. ໃນ ການ ໄປຕ້ອງໄດ້ຈຳພັນສາໄປພາຍໃນ 7 ວັນຕ້ອງກັບ ອາວາດ ທີ່ຈຳພັນສາຢູ່ທີ່ນັ້ນ. ໃນມື້ບຸນເຂົ້າພັນສາ ນອກຈາກຖວາຍເຂົ້າປາອາຫານແດ່ພະສົງສາມະເນນ ເພື່ອອຸທິດເຖິງ ດວງວິນທີ່ລ່ວງລັບໄປແລ້ວ ຍັງມີ ການແຫ່ຕົ້ນທຽນ, ແຫ່ຜ້າອາບ ນ້ຳຝົນ, ຄາລະວະພະ ເຖລາ ຕາມຫົວວັດຕ່າງໆ, ອອກຕົນຍາດໂຍມ ຖວາຍຜ້າຈຳພັນສາ ຫລື ຜ້າອາບນ້ຳ ຝົນ ເພື່ອໃຫ້ພະ ພິຂຸສົງໄດ້ນຸ່ງຍາມຝົນ ແລະ ຕອນແລງ ຂອງວັນດຽວກັນກໍມີການວຽນທຽນອ້ອມວັດ (ແຫ່ດອກ ໄມ້ ທູບ ທຽນ) ເພື່ອຮັກສາ ຮີດຄອງປະເພນີ ທັງເປັນສິລິມຸງຄຸນຕໍ່ຜູ້ເຂົ້າຮ່ວມດ້ວຍ. ຢ່າງໃດກໍຕາມ, ໃນໄລຍະເຂົ້າພັນສາ ນອກຈາກພະສົງສາມະເນນແລ້ວ ສາສະນິກະຊົນທັງຫລາຍ ກໍມີຄວາມເຊື່ອຖືຫລາຍ ຢ່າງ ສືບຕໍ່ກັນມາເຊັ່ນໄລ ຍະເຂົ້າພັນ ສາ ບໍ່ນິຍົມແຕ່ງດອງ, ປຸກເຮືອນໃຫມ່ ດັ່ງນີ້ເປັນຕົ້ນ ຫລື ເວົ້າອີກຢ່າງຫນຶ່ງວ່າ ຄະລຳ . ສຳລັບນັກດື່ມ ນ້ຳ ມຶນ ເມົາເລົ້າຢາ ຫລາຍໆຄົນກໍຖືເອົາໂອກາດ ນີ້ເຊົາ ເຫລົ້າ ຊົ່ວຄາວ ເພື່ອຮັກສາສຸຂະພາບຂອງຕົນເອງ ທັງເປັນບາດກ້າວທຳອິດ ເພື່ອຈະເ ຊົາ ເຫລົ້າຖາວອນ.
ກັບສາລະບານ
